Fēfē ʻEku Ngāue Maʻuʻanga Moʻuí?

Tēvita Hūsoni, Lonitoni, ʻIngilani

Ne kamata ke lele lelei e meʻa kotoa. Kuó u ʻosi mei he ʻUnivēsiti ʻOkisifōtí mo hoku mataʻitohi ʻi he mūsiká pea kamata ngāue ʻi ha ʻōkesitulā fakapalofesinale ʻi ʻEtinipua, ʻi Sikotilani. Ne laka ki muʻa ʻeku ngāue maʻuʻanga moʻuí, pea tokolahi mo hoku ngaahi kaungāmeʻá.

Lolotonga ʻeku akó, ne u fakakaukau ke toloi ʻeku ngāue fakafaifekau taimi kakató. Naʻe ʻikai ke u toe fakakaukau ki he ngāue fakafaifekaú. Naʻe lahi e ngaahi meʻa ne u manavasiʻi ki aí, fakatautefito ki heʻeku manavasiʻi naʻa tuʻu ai ʻeku ngaahi palani fakangāué, ʻo u fakakaukau ʻoku fakaʻatā makehe au pea ʻikai fie maʻu ia ke u ʻalu ʻo ngāue fakafaifekau. Ne ngali lahi fau ʻa e ngaahi feilaulau ke fakahokó.

Neongo ia, ne kamata ke liliu hoku lotó ʻe ha ngaahi kaungāmeʻa lelei mo ha ngaahi meʻa fakaʻofoʻofa ne u ʻaʻusia mo e Laumālié. Naʻe tokoni e ʻofa ʻa ha pīsope naʻe mātuʻaki tokanga ke u maʻu ha fakamoʻoni mālohi mo loloto ange ki he ongoongolelei kuo fakafoki maí. Naʻe vave pē ʻeku ʻiloʻi naʻe fie maʻu ke u tali ha uiuiʻi ke tokoni. Naʻe ʻikai ke u ʻiloʻi pe ʻe hoko fēfē atu ʻeku ngāue maʻuʻanga moʻuí hili ha tutuku taʻu ʻe ua, ʻi ha ʻātakai ʻoku lahi ai ʻa e feʻauʻauhí, ka naʻá ku falala ʻe faitāpuekina au ʻe he ʻEikí ʻi he fili ne u faí. Ne u nofo mei he ngāué pea ʻikai ke u ʻilo pe ko e hā e meʻa ʻe iku ki aí.

Naʻe uiuiʻi au ke u ngāue ʻi he Misiona ʻInitiisi Hihifó, ʻa ia naʻe lea faka-Falanisē. Naʻe faingataʻa e ngaahi meʻa ne u fetaulaki mo iá, ka naʻá ku manako he tokoni ki he kakaí mo mamata ki he liliu ʻenau moʻuí. Ne u nofo taha pē ʻi he fekumi ki he finangalo ʻo ʻeku Tamai ʻi Hēvaní lolotonga e taʻu ko ia ʻe uá. Ne u maʻu ha fiefia lahi ange ʻi ha fiefia kuó u maʻu ʻi ha toe taimi ʻi heʻeku tokoni taʻesiokita ki he niʻihi kehé.

Hili ʻeku foki ki ʻapí, ne u vakai ki māmani mei hano fokotuʻutuʻu foʻou ʻo e ngaahi meʻa ʻoku mahuʻingá mo e tuʻunga ʻulungāanga mahuʻingá, peá u feinga ke hoko e ongoongolelei ʻo Sisū Kalaisí ko e uho ia ʻo ʻeku moʻuí. Naʻá ku kamata leva ke kumi ha ngāue ka naʻe siʻi e ngaahi faingamālie ngāué. Naʻá ku fakatokangaʻi hili ha ngaahi fakaʻekeʻeke taʻeola lelei lahi, mahalo ne hoko ʻa ʻeku ngāue taʻu ʻe ua ko ʻeni he malaʻe ne kehe ia mei he meʻa naʻá ku ako ki aí, ke ʻoua ʻe tali au ʻe kinautou ne u kumi ngāue ki aí. ʻE hoko nai ʻeku ngāue fakafaifekaú ke mole ai ʻeku ngāue maʻuʻanga moʻuí?

ʻOku ou fakamālō ko e tali ki aí ko e ʻikai. ʻI ha ʻosi ha meimei māhina ʻe tolu mei ai, ne u fakatokangaʻi ha ngāue naʻe feʻunga ʻaupito mo au. Ne u maʻu e ngaahi pōtoʻi ngāue fekauʻaki mo e faʻahinga ngāue ko iá. ʻIkai ko ia pē, ka naʻe fie maʻu ke poto lelei ʻa kinautolu naʻe tohi ki aí he lea faka-Falaniseé! Ne fakaava ʻe heʻeku ngāue fakafaifekaú ʻa e matapā ki he faingamālié ni. Hili ha ʻinitaviu tuʻo tolu, naʻá ku maʻu e ngāué. Ne fuʻu lelei ange ʻaupito e kahaʻu ʻeku ngāué koeʻuhí he naʻá ku ngāue fakafaifekau. Ne u ongoʻi e ʻaloʻofa pea mo e ʻofa ʻa e ʻEikí. ʻOku ou ʻilo ʻokú Ne teuteuʻi ʻa e ngaahi tāpuaki maʻatautolu ʻi he taimi ʻoku tau fakahoko ai ʻetau kongá.

ʻOku moʻoni ʻa e meʻa naʻe akonaki ʻaki ʻe he Palōfita ko Siosefa Sāmitá: “Tau fai ʻi he loto fiefia ʻa e ngaahi meʻa kotoa pē ʻoku tau maʻu ʻa e mālohi ke faí; pea te tau toki lava ʻo tuʻu maʻuʻi he loto-fakapapau, ke mamata ki he fakamoʻui ʻa e ʻOtuá, pea ke fakahā mai ʻa hono toʻukupú” (T&F&C 123:17).

Naʻá ku fakatokangaʻi hili ha ngaahi fakaʻekeʻeke taʻeola lelei lahi, mahalo ne hoko ʻa ʻeku ngāue taʻu ʻe ua ko ʻeni he malaʻe ne kehe ia mei he meʻa naʻá ku ako ki aí, ke ʻoua ʻe tali au ʻe kinautolu ne u kumi ngāue ki aí.