ʻE tokoniʻi fēfē au ʻe he ongoongoleleí ke u fiefia?

Ko e vahevahe ʻe ʻEletā Neil L. Andersen ʻo e Kōlomu ʻo e Kau ʻAposetolo ʻe Toko Hongofulu Mā Uá ha ngaahi fakakaukau fekauʻaki mo e tefito ko ʻení.

Ko e maʻuʻanga mo e tupuʻanga ʻo e fiefia moʻoní ʻa e moʻoni ʻo e ongoongoleleí mo e talangofua ki he fono taʻengatá.

ʻOku fakataumuʻa e palani ʻo e fiefia ʻa e Tamai Hēvaní ke ʻomi ha fakahinohino maʻa ʻEne fānaú, ke tokoniʻi kinautolu ke nau fiefia, pea ʻomi kinautolu ke nau aʻu malu kiate Ia ʻi ʻapi.

ʻOku tau aʻusia ʻi he moʻuí ni ʻa e manavaʻofá, ʻofá, angaleleí, fiefiá, loto-mamahí, siva ʻa e ʻamanakí, mamahiʻiá, mo e ngaahi fakangatangata fakatuʻasino ʻi ha ngaahi founga ʻoku teuteuʻi ai kitautolu ke toe nofo fakataha mo ʻetau Tamai ʻi Hēvaní. ʻOku ʻi ai ha ngaahi lēsoni kuo pau ke tau ako mo e ngaahi meʻa kuo pau ke tau aʻusia ʻi he māmaní.

ʻOkú ke ʻiloʻi e meʻa ʻoku totonú mo ia ʻoku halá, pea ko ho fatongia ke ʻilo ʻiate koe pē “ ʻi he ako pea ʻi he tui foki” (T&F 88:118) ʻa e ngaahi meʻa ʻoku totonu ke ke faí mo ia ʻoku ʻikai totonu ke ke faí.

ʻOku fakaafeʻi mai ʻe he talangofua ki he ngaahi tefitoʻi moʻoni ʻo e ongoongoleleí ʻa e takaua maʻu ai pē ʻo e Laumālie Māʻoniʻoní. ʻOku tokoniʻi kitautolu ʻe he Laumālie Māʻoniʻoní ke tau ʻiloʻi, ke mahino pea tau moʻui ʻaki e ngaahi akonaki ʻa Sīsū Kalaisí.

ʻOku ou fakaafeʻi koe ke ke ako pea moʻui fakamātoato ange ʻaki e ongoongolelei ʻa e Fakamoʻuí ke ke fiefia mo malu ai. ʻOku ʻikai totonu ke ngata pē ʻi heʻetau moʻui ʻaki e ongoongoleleí, ka ʻoku totonu ke tau manako hono moʻui ʻaki ʻo e ongoongoleleí. ʻI heʻetau fai iá, te tau maʻu ha ngaahi tāpuaki taʻefaʻalaua, ha mālohi ʻoku lahi angé, mo e fiefia moʻoní.

Mei ha lea ʻi ha fakataha fakalaumālie ʻi he ʻUnivēsiti Pilikihami ʻIongi–ʻAitahoó ʻi he ʻaho 23 ʻo ʻAokosi, 2002.

Tā fakatātaaʻi ʻe Brian Beach