Jerbal ilo Kabun̄ eo
“Aolepen Menin Ej Kōjeram̧m̧an Eō”
Eļan̄n̄e ej Jādede, kwonaaj lo Elvira Guagliarello boub ilo jikin kōmaat eo an ilo m̧weo im̧ōn ilo Puerto Madryn, epād ilo pārijet in Nuevo Gulf in Argentina ilo iturōk in bukōn in Chubut.
Ej jon̄e pilawe im dān innām jōbjōb ļo̧k n̄an kein kere ko jet. Edik an ekōnono jān an jerbal, m̧akūtkūt ko an eļapļo̧k aer eļļaaj jān naan ko an. Ālkin men otemjeje, e ej pād ilo jerbal eo an Irooj.
“Em̧m̧an Aō en̄jake kōnke Ijeļā Ij kōm̧m̧ane juon men em̧m̧an,” Jejtōr Guagliarello eaar ba ilo an kereiik kāre ko. Ej kememej Rilo̧mo̧r eo ilo an jerbal, m̧ōņōņō kōn ļōmņak eo me ej waļo̧k jān jerbal in jipan̄ eo an enaaj jipan̄ membōr ro jet an Kabun̄ in kememej E.
Jejtōr Guagliarello, 82 iiō dettan, ej lem̧ōņōņō in jerbal āinwōt juon rūkaki in loļo̧k m̧ōko an kōrā, jipan̄ tōl al ilo ward eo an, im kōm̧m̧an pilawe n̄an kōjerbal ilo kain̄i in kwojkwoj eo—juon kūr eaar kōļapļok enan̄in 10 iiō ko. Ej kōpooj juon pilawe n̄an e make ilo jinoin wiik eo, bōtaab ilo Jādede ko ej kōjeno̧lo̧k juon iien n̄an kōm̧m̧an pilawe “eļaptata n̄an Kabun̄ in,” ej ba. “Ij jiron̄ eō make, ‘Ij aikuj kōm̧m̧an pilawe, im Ij aikuj etal n̄an jar.’ Ijjab kōņaan likjab.”
N̄e ej em̧m̧an an mour, ej barāinwōt etal n̄an tampeļ eo—kōm̧m̧aen ilo juon iiō 20-awa in baaj ituiiōn̄ ļo̧k n̄an Buenos Aires Argentina Tampeļ eo.
“Jejtōr Guagliarello iien otemjeļo̧k ej m̧ōņōņō n̄an jerbal ilo aolep wāween emaron̄e,” bisop eo an ej ba, Jesús Santos Gumiel. “Membōr ro an ward eo rejeļā remaron̄ pedped ioon. Men̄e iiō eo an, e ej tiljek ilo kōpooj pilawe eo aolep Jādede im ej itok n̄an jar aolep Jabōt. E ej juon waanjon̄ak em̧m̧an.”
Jejtōr Guagliarello eaar iioon mijenede ro rej jerbal aolep raan ilo 1962 ilo Mar Del Plata, iturōk in Buenos Aires, ke eaar jerbal ilo juon im̧ōn reen ijo raar jokwe ie. Ke eaar kile aer kōļaļļaļ ilo kōjām ko 15 iiō tok ālik, ālkin an kar em̧m̧akūt ļo̧k n̄an Puerto Madryn, eaar bōk katak ko, kar peptaij, im kar jino mour in jerbal in jipan̄ eo an ilo Kabun̄ in.
Rainin ej mour ippān make, bōtaab ejjab en̄jake an make ļo̧k iaan. Ewōr ippān jeje ko rekwojarjar an im ward baam̧le eo an, im emakijkij an kōnono ippān Jemen Ilan̄ ilo jar. Ilo kakobaba, ej lem̧ōņōņō kōn jemjerā eo an Jetōb, eo Irooj eaar kaļim̧m̧ur kake n̄an ro me rej jerbal n̄an E ilo jerbal n̄an ro jet.1
“Aolepen men kein rej kōjeram̧m̧an eō,” Jejtōr Guagliarello ej ba kōn juon ettōn̄ dikdik. “Kabun̄ in ej kōm̧m̧an bwe jen jerbal, im ej kōm̧m̧an bwe jen m̧ōņōņō. Iien otemjeļo̧k Iaar lo lan̄lōn̄ ilo jerbal n̄an Jemedwōj ilo Lan̄.”
Elvira Guagliarello
Itulōn̄: pija jān Michael R. Morris