Ron̄jake Āliktata
“Liin eaar juon m̧ōtta etto, im eaar jab juon iien bwebwenato,” Iaar jiron̄ eō make. Kōn menin etke Jetōb eo eaar peddo kakkōl eō Ijjab aikuj in pād ijo?
Ke iaar pād ilo kaļōōj, Iaar jeram̧m̧an kōn juon jerbal ke iaar rijikuul wōt epen ilo juon jikin ettoļo̧k jān ijo jikū. Juon m̧ōtta jān etto eaar jokwe ijo epaake, im men̄e kōmro kar jab pād wōt ilo juon kabun̄, oktak ko am raar jab kabōjrak kōm jān am m̧ōttā.
Ke Iaar jino ioon Madeline (āt eo em̧ōj an oktak), kōmro kar jerbal ippān bar juon jiron̄ me eaar juon waanjon̄ak em̧m̧an in Armej ro Rekwojarjar ilo Raan Kein Āliktata. Ij kememej an Jetōb eo kwaļo̧k oktak ko ikōtaan jiron̄ ro kajjojo, em̧ool kōmeļeļeik ekōjkan an kālōt ko reddik maron̄ kōm̧m̧ane juon iaļ n̄an mour ilo iien ko tok ālik. Ilo m̧ool Iaar kememej en̄jake kein ilo jetōb ium̧win elōn̄ iiō ko.
Kiiō ilo aō bar tōpar e ālkin jet iiō ko, Madeline im N̄an kar karōk juon iien n̄an koba ippān doon. Ke joten eo eaar itok, Iaar bwilōn̄ kōn aō jino ikūmkūm. Iaar iuwe ilo tūreein eo n̄an bukōt eo an, im ke Iaar epaakļo̧k, juon ainikien ilowaan ļōmņak eo aō im būruwō eaar ba, “Kwoj aikuj in kar jerā wōt ippān armej ro me jon̄ak ko aer reutiej.”
“Menin ejjab juon jerā,” Iaar ļōmņak. “Ij kain ņe koba ippān doon āinwōt juon m̧ōtta jān etto.” Jetōb eo eaar bar āliji kakkōl eo, kepaakļo̧k eō m̧ae iien eo Iaar kile bwe eaar ilo m̧ool juon jerā im Iaar jino ļōmņak kōn jon̄ak ko an eo m̧ōtta im jekjek in mour eo an. “Liin ejeļā Ij juon LDS,” Iaar jekpen ņae. “Liin ejeļā kōn jon̄ak ko aō, im enaaj kar ejjeļo̧k jorrāān.”
Iaar, ijowōt ke, jino in ļōmņak eļan̄n̄e “oktak ko reddik” Iaar jeļā m̧okta jān an kar waļo̧k iaļ ko am roktak eļapļo̧k jān Iaar kōtmene. Kōn menin Iaar ļoor im̧we eo an Jetōb, im Iaar kūrļo̧k eo m̧ōttan n̄an joļo̧k karōk eo. Iaar lukkuun mijak in kaiepataik e. Ekōkjan Aō maron̄ in kōmeļeļeik en̄jake ko an ilo jetōb n̄an juon m̧ōtta eo eaar jab kam̧oolol kōn mijen eo an Jetōb Kwojarjar?
Iaar kōmeļeļeik bwe ejjab em̧m̧an Aō en̄jake kōn juon iaan m̧akūtkūt ko kōm kar ļōmņake im kar kōjatdikdik menin enaaj kar leļo̧k n̄an eō juon un eo epidodo n̄an jab pād ilo joten eo. Eaar inepata im kwaļo̧k n̄an ukōt karōk ko am. Iaar aenōm̧m̧an im kar errā kōn oktak eo kōnke Iaar ļōmņak, “Bōlen m̧akūtkūt eo eaar etke Jetōb eo eaar kakkōl eō.” Bōtaab inepata eo Iaar en̄jake ejjamin kar jako.
Kōm kar m̧ōņōņō ilo bon̄ōn eo, bōtaab jān iien n̄an iien, Jetōb eo eaar jiron̄ eō kakkōl eo m̧oktaļo̧k eaar aorōk. Ilo jino ejjeļo̧k kar menin n̄ūrbōktak, bōtaab ke joten eo eaar wōnm̧aanļo̧k, eaar alikkar ļo̧k bwe ke kōm maron̄ kar itok jān jekjek in mour ko rej jon̄ak wōt juon, kōm kar ilo̧k ilo iaļ ko eļap aer oktak jān doon. Jon̄ak ko am raar jab jokkun wōt juon—jekdoon ilo men ko reddik. Ke eaar wōrtar waiin, Iaar kōmeļeļeik bwe Ijjamin kōļļā wōņaan dān in karōk. Eaar kautiej kōņaan eo aō im eaar kōļļā wōņaan kōn e make.
Inepata eo aō ilo jetōb eaar ļapļo̧k wōt ilo an joten eo wōnm̧aanļo̧k wōt. Ke kōjota eo eaar jem̧ļo̧k, Iaar jijet im̧aan tata jea eo aō, pojak in ilo̧k, kōke Iaar jeļā tūreein eo āliktata ilo joten eo ejjab to enaaj kar em̧m̧akūt im Iaar jokwe ettoļo̧k n̄an bōk juon tāākji. Jeļā kōn inepata eo aō, eo m̧ōtta eaar ba Imaron̄ kiki ilo m̧weo im̧ōn. Kiiō Jetōb eo ejjamin kar kōmakeikļo̧k eō make, kapen ta eo Iaar jeļā kadede: pād eaar jab juon ļōmņak.
Ke Iaar ān̄inļo̧k n̄an m̧weo im̧ōņ, Iaar kōm̧m̧an bwe in ineem̧m̧an wōt. “Kwoj m̧ool ke bwe kojjab kōņaan pād wōt?” liin eaar kajjitōk Iaar m̧ool. Liin eaar jab kipeļ ak lāāj, bōtaab Jetōb eo eaar alikkar ļo̧k jān ainikien jourur. Ijjamin tūm̧ jān tūreiin eo aō!
Iaar kōttar m̧ae iien eo Iaar jeļa liin eaar pād ilowa, innām Iaar ettōn jon̄an wōt aō m̧ōkaj n̄an tōpar jikin iuwe an tūreiin eo ilo iien eo ejejjet. Ejjab bōjrak aō ļōmņak kōn Joseph in Egypt eo ke eaar ko jān kapo (lale Jenesis 39:7–12).
Ke Iaar ļōmņak likļo̧k ilo ta ko raar waļo̧k bon̄ōn eo, Ij en̄jake jim̧or mijak im kam̧oolol: mijak kōn ta eo emaron̄ kar waļo̧k im kam̧oolol kōn jemjerā eo an Jetōb Kwojarjar. Jetōb eo eaar kōnono, im em̧ool men̄e Iaar aikuj in kar kōm̧m̧ane ilo iien eo em̧ōkajtata, Ij m̧ōņōņō Iaar āliktata ron̄jake.
Ealikkar bwe jeļā eo aō kōn jekjek eo kar bon̄ōn eo eaar jab lukkuun in alikkar āinwōt eo an Irooj. Āinwōt an Isaiah kar je:
“Bwe lōmņak ko Aō re jab ļōmņak ko ami, im iaļ ko ami re jab iaļ ko Aō, Jeova ej ba.
“Bwe āinwōt lan̄ ko re utiej jān laļ, āindein iaļ ko Aō re utiej jān iaļ ko ami, im ļōmņak ko Aō jān ļōmņak ko ami” (Aiseia 55:8–9).
Jet kālōt ko jej jelm̧ai ilo mour in em̧ōkaj kōm̧m̧anin im meļo̧kļo̧ki. Ewōr bar jet kālōt ko me rej itok kōn katak ko renaaj em̧m̧an ad kōm̧m̧ani jejjamin meļo̧kļo̧ki. Eļap aō kam̧oolol n̄an jeļā bwe n̄e jej ron̄jake im̧we ko an Jetōb Kwojarjar—im n̄e em̧ōkaj ad kōm̧m̧ane—emaron̄ ļapļo̧k an pidodo n̄an ad pād wōt ilo iaļ eo Jisōs Kraist eaar kōm̧m̧ane n̄an kōj n̄an ļoore.
Pija jān Jeff Ward