Jej Kōnono kōn Kraist

Ukweļok, Oktakļo̧k n̄an Irooj, im Mour

Jen David L. Frischknecht

Ijo ej lolorjake Laajrak in Kein Katak

Eo em̧ōj an ukweļo̧k jān jerawiwi ko an em̧ōj meļo̧kļo̧ki, im Irooj ejjab bar kememeji (lale D&C 58:42).

Jem̧aanļo̧k juon kōrā eo em̧m̧an im tiljek Ijeļā kajien eaar kanooj jorrāān ilo juon itaak in wa. Ilo jorrāān in ko an eaar rup dii in katin im juon dii dik ilo dilepān. M̧ōttan kilen bar kōm̧akūtkūti ej aikuj bwe en kōņaak juon kein bōbrae ilo likūn im kōnwaan bwe en ren jab emakūtkūt. Kein bōbrae kein raar lukkuun in kabōņōņō. Bōtaab eaar menin aikuj. Ej leļo̧k juon jekjek eo me ilikūn im kōņwaan ren maron̄ ājmour ļo̧k.

Ukweļo̧k ej āinwōt kein bōbrae eo. N̄ej jej jerawiwi, jej kakkure jetōb eo ad, im kōm̧adm̧ōd eo ekwojarjar ej menin aikuj n̄an kōm̧m̧an bwe jen bar mour. Ukweļo̧k ej letok jekjek eo me ej kōtļo̧k bwe Rilo̧mo̧o̧r eo, kōn kajoor in Pinmuur eo an, n̄an kemour kōj (lale 3 Nipai 9:13). Eļan̄n̄e jet m̧ōttan ukweļo̧k eo ekabōņōņō—āinwōt kein bōbrae eo ioon juon likūn—jej aikuj in ukweļo̧k jekdoon ta.

Būreejtōn Dieter F. Uchtdorf, Rikakipilōklōk eo Kein Karuo ilo Būreejtōnji eo Kein Kajuon, eaar katak: “Ukweļo̧k em̧ool ej bar bōkļo̧k kōj n̄an kōm̧m̧ane ta eo ejim̧we. N̄an m̧ool in ukweļo̧k jej aikuj kile jerawiwi ko ad im en̄jake ajļo̧k, ak būrom̧ōj kaki, im kwaļo̧k jerawiwi kein n̄an Anij. Eļan̄n̄e jerawiwi ko ad reļļap, jej aikuj barāinwōt kwaļo̧ki n̄an ritōl in priesthood eo ad kar kōmālimi. Jej aikuj kajjitōk ippān Anij n̄an meļo̧kļo̧ki im kōm̧m̧ane aolep men jemaron̄ n̄an kajim̧we jabdewōt men eaar kakkure m̧akūtkūt ko ad me emaron̄ kwaļo̧ke. Ukweļo̧k meļeļe in juon oktak in ļōmņak im bōro—jej bōjrak kōm̧m̧ani men ko me repōd, im jej jino kōm̧m̧anin men ko me rejim̧we. Ej bōktok jan kōj juon m̧wil eo ekāāl n̄an Anij, juon make, im mour.”¹

N̄e jej kadedeļo̧k bun̄tōn eo an ukweļo̧k, uwaak eo ej kemour, deoor, im m̧ōņōņō. Dorothy J. R. White eaar je:

Ļōmņak kōn dān in kemejaļaļ ko me rej wōtļo̧k itunam̧ōj,

Bōtaab ej karreoik jetōb ko ad ilowaad.²

Irooj ej akweļo̧k kōn kije, iakwe, im kareel bwe jen ukweļo̧k, kōnke Ekōņaan kemour kōj. Eaar en̄taaan ilo Ānbwiniin im jetōb n̄an kōļļāik kaje eo n̄an jerawiwi ko ad eļan̄n̄e jej ukweļo̧k. Ej kōmeļeļeik:

Jisōs eaar ba bwe eaar en̄taan kōn men kein n̄an aolep bwe ren maron̄ jab en̄taan eļan̄je renaaj ukweļo̧k.

Bōtaab eļan̄n̄e rejjamin ukweļo̧k, rej aikuj en̄taan em̧ool āinwōt Eaar en̄taan.

Eo en̄taan eo eaar kōm̧m̧an bwe E—em̧ool Anij, eo eļaptata iaan aolep—n̄an udiddid kōnke kōn metak, to̧o̧r bōtktōk ilo aolepen ānbwiniin, en̄taan jim̧or ilo ānbwin im jetōb, im kajjitōk bwe En jab maron̄ idaake kab eo emeeo̧ im dikļo̧k.

Mekarta, Eaar leļo̧k aiboojoj eo n̄an Jemen. Eaar bōk m̧ōttan im kar kadedeļo̧k kōppopo ko An n̄an Kōj.

Kōn menin, E barāinwōt kakien kōj n̄an ukweļo̧k (lale D&C 19:16–20).

Kōm̧m̧an bwe jen ukweļo̧k kiiō, oktakļo̧k n̄an Irooj, im mour.

Kakememej ko

1. Dieter F. Uchtdorf, “Point of Safe Return,” Liahona, Māe 2007, 100.

2. Dorothy J. R. White, “Repentance,” Ensign, Juļae 1996, 27.

Ta kōjeram̧man ko an ukweļo̧k im jeorļo̧k bōd?

• Jetōb Kwojarjar enaaj kam̧ool n̄an kōj bwe em̧ōj jeorļo̧k ad bōd.

• Anij enaaj bōkļo̧k eddo in bōd in jerawiwi ko ad.

• Jenaaj lem̧ōņōņō kōn kareel eo an Jetōb Kwojarjar ilo eļapļo̧k kōjeram̧m̧an.

N̄an meļeļeļ ko rellōn̄ļo̧k kōn unin kōnono in, lale Ezekiel 33:15–16; Alma 12:33–34; 36:13, 17–20; im Boyd K. Packer, “The Brilliant Morning of Forgiveness,” Ensign, Nob. 1995, 18–21.

Kōjeram̧m̧an ko an Ukweļo̧k

“Jerawiwi ej kōņaan jab pokake an kien ekwojarjar. Pinmuur eo an Jisōs Kraist ej juon menin letok an Anij n̄an ajri ro Nejin n̄an kajim̧we im anjo ioon kaje ko an jerawiwi. …

“Menin letok eo an Pinmuur eo an Jisōs Kraist ej letok n̄an kōj iien otemjej im ilo jikin otemjej kōn kōjeram̧m̧an eo an ukweļo̧k im jeorļo̧k bōd.”

President Dieter F. Uchtdorf, Rikakipilōklōk eo Kein Karuo ilo Būreejtōnji eo Kein Kajuon, “Point of Safe Return,” Liahona, Māe 2007, 99, 101.

Etke Ukweļo̧k Ej Kemour Kōj?

Eļtōr Neil L. Andersen an Doulul eo an Jōn̄oulruo Rijilōk ro ej jipan̄ kōj uwaake kajjitōk in ilo kōnono eo an ilo kweilo̧k eo eļap, “Repent … That I May Heal You” (Liahona, Nob. 2009, 40–43). Rikanaan Alma ej barāinwōt jipan̄ kōj meļeļe kōn ukweļo̧k im Pinmuur eo (lale Alma 42).

1. Ukweļo̧k eo ad ekōm̧m̧an bwe jen deļo̧n̄e Pinmnuur eo anKraist im mour. En̄taan eo an Kraist ilo Gethsemane ioon Golgotha kar en̄taan kōn jerawiwiw ko adwōj aolep. Emaron̄ im kijororo n̄an jeorļo̧k jerawiwi ko ad.

2. N̄e jej jerawiwi, jej oktakļo̧k jān Anij. Menin ej kōjorrāān jetōb eo ad.

3. N̄e jej ukweļo̧k, jej “bar-oktakļo̧k” n̄an Anij. Menin ej jipan̄ kadikļo̧k būrom̧ōj eo ad. Jeorļo̧k bōd ej barāinwōt bōk “ļo̧k ruōd jān buruōd” (Alma 24:10) im bōktok “aenōm̧m̧an in bōklekōt” (Mosaia 4:3), kōn menin ej kemour kōj.

Ļōmņak kwoj kwaļo̧k naan in kam̧ool eo am̧ kōn kōjeram̧m̧an ko me raar itok n̄an eok āinwōt tōprak in ukweļo̧k.

Nejin eo ejerwaan eaar ettā ilo an bar rool n̄an ippān jemen im ba, “‛Jema, I ar kōm̧anm̧an nana ņae lan̄, im im̧aan mejōm̧, ij patkake bwe bwe ren likūt eta nejōm̧’” (Luke 15:21). Jemen eaar karuwaineneik e n̄an m̧weo im̧ōn. Ejja āinwōt Jemedwōj Ilan̄ ej karuwaineneik kōj n̄e jej ukweļo̧k.

Bar Jepļaaktok eo an Nejin eo Ejerwaan, jān James Tissot