Nōbar ko jen Bar kalōki
Ke Iaar lo jorrāān ko jān m̧akūtkūt in laļ eo, Iaar būrom̧ōj. Bōtaab Iaar kile bwe Anij ej iakwe ro raar mej barāinwōt ro me raar mour.
Kōnke Iaar jokwe ilo Shaghai, China, eaar wōr aō iien em̧m̧an n̄an etal ippān juon kumi in jikuul n̄an Bukōt eo Sichuan ilo iturōkiturilik in China n̄an jipan̄ kalōk im̧ōko n̄an ro raar ļanwōtōt jān m̧akūtkūt in laļ eo me eaar kanooj kakkure eria eo jet iiō remootļo̧k. Kōm kar buuļ jerbal birōōk, iiōk jimeeņ, būlli wiiļbaro ko rebooļ kōn birōōk, im elleļo̧k birōōk ko “ejaaki ļain” in armej ro. Ilo raan eo kein karuo eaar metak likū, im tebūbro̧ ko aō raar epotaktak. Mekarta, tūreep eo eaar juon en̄jake eo ban meļo̧kļo̧ke n̄an n̄a im eaar kōkajoorļo̧k naan in kam̧ool eo aō make im aorōk eo an kajjojo armej, juon iaan aorōk ko an Doulul eo an Jiron̄ ro.
Ilo aō kar buuļ jerbal kajjojo raan, Iaar kile bwe tōmak eo aō ilo aorōk eo aō make eaar eddōkļo̧k. Eaar em̧m̧an aō en̄jake kōn n̄a make kōnke Iaar kōm̧m̧ani men ko n̄an kōkōm̧anm̧anļo̧k jekjek in mour eo me ejjab ļap jeram̧m̧an eo aer jān n̄a.
Eaar barāinwōt wōr am iien em̧m̧an n̄an loļo̧k juon jikuuļ ilo eria eo. Ke kōm kar tōkākļo̧k, juon ikitōltōl in ajri ro reddik rem̧m̧an raar ettōrtok n̄an kōm̧. Ke Iaar lo aolepen ajri jiddik rein raiboojoj, Iaar kile aorōk eo aer kajjojo barāinwōt. Rej aolep ajri ro raiboojoj nejin Anij, im eaar kajoor Aō en̄jake bwe Ej iakwe im ejeļā kajjojo iaer.
Iturinļo̧k jem̧ļo̧k in tūreep eo aō kōm kar wōr am iien n̄an etal n̄an juon jikin kakkūje, ijo kōm̧ kar etal n̄an m̧ōn̄ā in raelep. Ke kōm kar tōparļo̧k ijo, ijowōt ke, kōm kar lo bwe em̧ōj an kar jorrāān ilo m̧akūtkūt in laļ eo. Eaar jorrāān eo enana tata Ij kab tōn kar loe. Eaar kōm̧m̧an bwe in kōņaan jan̄. Jiļiin̄ ko im dāpdāp ko an im̧ōko raar joon doon, wōjke ko iturin raar wure, im eaar meno̧kno̧k aolep jikin. Juon dekā kileplep eaar jabūlbūl laļ tak jān toļ eo im itaak ilo dipin juon iaan m̧ōko, kōm̧m̧an bwe jiļiin̄ eo im depdep eo ren joon doon. Eaar wōr juon juuj ej pād ilo juon iiaan kōjām ko.
Ke Iaar ļōmņak kōn menin im jeļā eo bwe armej em̧ōj aer mej ilo jorrāān in, Iaar tarpok n̄an meļeļe ekōjkan an Jemed Ilan̄ kōm̧m̧an bwe menin en waļo̧k. Ejjab iakwe er ke? Innām Iaar ļōmņak kōn ta eo kōm kar ekōnono kake ilo kūlaj eo an Doulul eo an Jiron̄ ro im kar kile bwe aaet, Eaar iakwe er. Eaar jeļā im iakwe er kajjojo. Ro raar mej ilo raan jab eo raar aolep ajri ro nejin Anij. Ilo jinoin, eaar kōm̧m̧an bwe in lukkuun in būrom̧ōj ļōmņak kōn men eo. Bōtaab Iaar kile bwe armej ro raar pād ilo laļ eo an jetōb im remaron̄ in bar rool n̄an Jemed Ilan̄ bar juon alen. Ļōmņak in eaar kaenōm̧m̧an eō im kar letok n̄an eō juon en̄jake in aenōm̧m̧an.
Ijeļā bwe N̄a ij juon ajri nejin Anij, kōn aorōk an juon make eļap. Jej aolep ajri ro nejin Jemedwōj Ilan̄, eo ejeļā kajied make. Ej iakwe kōj kōn juon iakwe eo me em̧wilaļ ļo̧k im kajoor ļo̧k jān jabdewōt iaad emaron̄ in ļōmņak kake. Meļeļe in eaar m̧wilaļ an eddōk ilo būruwō ilo Aō kar jerbal ippān im jerbal ibwilijin armej ro me raar lukkuun en̄taan ilo m̧akūtkūt in laļ eo ilo Sichuan.
Ashley Dyer (ituanbwijmaron̄) eaar jipan̄ bar kalōk im̧ōko im̧ōn armej ro raar jokwe ijo ālkin m̧akūtkūt in laļ eo ilo 2008 eo ilo Sichuan, China.
Pija kōn jipan̄ eo an Ashley Dyer