“Etke baam̧le eo ao rej ioon men ko rejjab em̧m̧an ak jej etal ñan jikkin jar ko, jej kōm̧m̧ane nokin in jota ko an baam̧le, im jej kajjioñ mour kōn gospel eo. Ta jej maroñ in kōm̧m̧ane?”

Mour kōn ko̧jpeļ eo ej bōktok kōjeram̧m̧an ko bōtaab ejjab meļeļe in kom̧ij jamin ioon apan̄ ko. Mālijon̄ ko remaron̄ kōkajoorļo̧k tōmak eo ami kōn im̧we kom̧ n̄an pukōt jipan̄ eo an Jemed Ilan̄. Ņa mejļan jorrāān ko kōn jipan̄ eo An ej katakin kom̧ ekōjkan n̄an kōm̧m̧ani jokālōt ko rejim̧we.

Em̧ōj ke ami kar kōnono kake jekjek in āinwōt juon baam̧le? Jān kapilōk ippān doon, kom̧ maron̄ lo ļōmņak ko eļap aer jipan̄. Em̧ōj ke ami kar jitlo̧k im kar jar kōn jekjek ko āinwōt juon baam̧le? Em̧ōj ke ami kar etali jeje ko rekwojarjar im kōnono ko an kweilo̧k eo eļap? Bōlen baam̧le eo ami ej aikuj kōm̧m̧ane jet oktak ko n̄an kōkōm̧anm̧anļo̧k jekjek eo, ak bōlen kom̧ij aikuj niknik, kijenmej ilo kōttar im lōke bwe Irooj enaaj kōkajoorļo̧k kom̧ ilo iien mālijon̄ in (lale Mosaia 24:15).

Eļan̄n̄e ro jet raar kōm̧m̧an bwe baam̧le eo ami en metak, kajion̄ jeorļo̧k aer bōd im jab jekpen ņae er. Men̄e jeorļo̧k bōd emaron̄ jab m̧ōkaj an ņa mejļan jorrāān eo, enaaj bōktok aenōm̧m̧an n̄an būruwōmi im kōm̧m̧an bwe jorrāān eo en pidodo ļo̧k n̄an jerbale.

Rikapo eo ej luko̧ro̧re baam̧le ko kōnke kajoor eo aer eļap an aorōk n̄an Kabun̄ in im jukjuk in pād eo ami. Kōn menin niknik wōt. Etal wōt n̄an jar, kōm̧m̧ane nokin in jota an baam̧le, im mour kōn ko̧jpeļ eo. Pokake ekōm̧m̧an bwe kom̧in en̄jake Jetōb Kwojarjar, im tōl eo An ej aorōk n̄an pukōt uwaak ko kom̧in pukōti. Mour ilo juon baam̧le ekajoor, em̧ool juon eo me eaar anjo ioon inepata ko, ej juon iaan menin kōttōpar ro raorōk tata emaron̄ wōr ippāmi.

Kōjerbal Tōl ko Em̧ōj Kar Litok N̄an Kōj

Em̧ool juon baam̧le ejjab kajoorļo̧k m̧ae iien em̧ōj idajon̄jon̄ e. Jeram̧m̧an, jej jab aikuj in jelm̧ae inepata ko make ļo̧k iaad; Jemed Ilan̄ ej kōņaan bwe jen wejepedik āinwōt juon armej make im āinwōt baam̧le ko. N̄an jipan̄ kōj, Eaar letok tōl ko raorōk, āinwōt jeje ko rekwojarjar, juon rikanaan emour, ritōl ro jet an Kabun̄ in, im Jetōb Kwojarjar. Remaron̄ jipan̄ kōj meļeļe im kōjerbal pedped ko an ko̧jpeļ eo me renaaj bōktok lan̄lōn̄ n̄an kōj im baam̧le ko ad. Ilo kakobaba, jab meļo̧kļo̧k n̄an jiron̄ ro jinemi im jememi bwe kom̧ij kam̧oolol im iakwe er. Ijeļā bwe Irooj enaaj lewaj juon iaļ n̄an baam̧le eo ami n̄an koba ippān doon, kajoor, im ebōkkak. Ijeļā bwe baam̧le ej ekkapit jān Anij.

Jared L., 18 iiō, Mindanao, Philippines

Wōr Tōmak ilo Irooj

Ta eo ej jipan̄ eō n̄e Ij kajjitōk etke baam̧le eo aō ewōr an inepata ko, jekdoon n̄e kōmij kōm̧m̧ani aolep men ko kōm maron̄i, bwebwenato eo an Job im ewi jon̄an eo eaar dibuki. Job 19:25–26 ej riiti: “A kōn n̄a, Ij jeļā bwe aō Rilo̧mo̧r ej mour wōt, im ilo iien eo āliktata Enaaj jutak ioon laļ in; im ālkin an jako kilō, ilo ānbwinnō in wōt inaaj lo Anij.” Job eaar jelm̧ai jet iaan apan̄ ko reppen tata, im aaet eaar jeļā wōt bwe Ripinmuur eo an ej mour! N̄e jej maron̄ ļōmņak im mour āinwōt Job, Ijeļā bwe jenaaj maron̄ in inepata ko ad im lo bwe ewōr juon ad Ripinmuur, eo ej ļōn̄aj kōj ilo mālijon̄ kein.

Megan B., 17 iiō, Utah, USA

Jelm̧ae Inepata ko kōn Kōjatdikdik

Inepata ko rej kōm̧m̧an bwe jen kajoorļo̧k n̄e jelm̧ae ilo jim̧we. Ta eo kom̧ij aikuj kōm̧m̧ane ej n̄an jelm̧ae inepata ko kōn kōjatdikdik im peran. Kom̧ maron̄ kōm̧m̧ane ijo em̧m̧an tata jān pād ilo m̧ōn jar im kajion̄ n̄an mour kōn ko̧jpeļ eo, kōn menin kom̧ij aikuj in kile m̧ool eo bwe inepata ko ami rej n̄an ukōt kom̧ imi kōm̧m̧an bwe kom̧ij em̧m̧anļo̧k ilo jem̧ļo̧kin. Barāinwōt kajion̄ n̄an kile jet men ko ejjab jim̧we ami kōm̧m̧anin im kōm̧m̧aen juon kōttōpar n̄an kajm̧weiki. Kōmakijkij kajion̄ jipan̄ ro jet, im ilo ami kōm̧m̧ane menin, inepata ko ami renaaj āinwōt meraļo̧k. Eļaptata, kapilōk ippān Irooj iien otemjej. Jar kōn inepata ko ami im kajjitōk ippān Jemed Ilan̄ n̄an tōl kom̧.

Raymond A., 18 iiō, Accra, Ghana

Katak jān Apan̄ ko Ami

Jekdoon ta ewi jon̄an ami kajion̄, enaaj wōr iien otemjeje apan̄ ko. Idajon̄jon̄ kein rej n̄an jipan̄ kōj eddōkļo̧k. Ej pedped wōt ioon ekōjkan ami ņa mejļan apan̄ ko. Kii eo ej n̄an katak jāni. Ekkatak kake im lale ta eo ej lukkuun in kōm̧m̧an ipeļaakimi. Jar kōn mālijon̄ ko kom̧ij dibuki im wōt tōmak bwe Irooj enaaj jipan̄ kom̧ eļļā jāni. Remaron̄ erom kajoor n̄an kom̧, im kōn menin kom̧ maron̄ erom kajoor n̄an ro jet.

Makenzie C., 18 iiōt, Chihuahau, Mexico

Bōk Ankilaan Jemed Ilan̄

Ij ļōmņak bwe juon wāween Jemed Ilan̄ ej idajon̄jon̄ e kōj ej kōn inepata ko. Ta eo jej jab iakuj meļo̧kļo̧ke ej bwe E ej Jemed im āindein eļap An iakwe kōj im kōn menin ekōņaan ta eo em̧m̧antaa n̄an kōj. Ijeļā bwe juon wōt iaļ jemaron̄ anjo ioon inepata ko ad ej kōn dim in kijejeto im bōk ankilaan Jemed.

José C., 18 iiō, Ancash, Peru

Riiti Kean̄ eo an Baam̧le

Inepata ko rej itok eļan̄n̄e jej kōm̧m̧ani jar ko ad ak jaab. Rejjab n̄an kaje kōj bōtaab n̄an kōkajoorļo̧k kōj. Inepata ko jej iooni ilo mour ej letok juon iien em̧m̧an n̄an baam̧le ko n̄an jerbal ippān doon. Ilo an baam̧le eo aō anjo ioon inepata, jorrāān ko kōn jāān, im kajion̄ in pukōt iien n̄an ippān doon, kōmij epaakeļo̧k doon im Jemedwōj Ilan̄. Juon men kōmij kōm̧m̧an ilo iien ko reppen ej riiti “Baam̧le Eo: Juōn Naan in Kean̄ n̄an Laļ.” Ej kakememej kōm kōn jemjerā eo ekwojarjar kōmij kwaļo̧k im ewi jon̄an an aorōk n̄an kejaprok bujen ko am.

Anna G., 15 iiō, Georgia, USA

Niknik n̄an Jem̧ļo̧kin

Baam̧le ej ioļapļap eo an karōk eo an Rikōm̧anm̧an eo, kōn menin aaet rikapo enaaj kōm̧m̧ani aolep men ko emaron̄e n̄an kabōjrak kōj jān mour ippān doon āinwōt baam̧le eo em̧ōņōņō, ej kalimjōk wōt ko̧jpeļ eo. Jejeļā bwe jej jab maron̄ kōjatdikdik mour enaaj pidodo ak bwe n̄e jej etal n̄an jar im kōm̧m̧an nokin in jotan an baam̧le, mour enaaj ejjeļo̧k an kapo ko. N̄e men ko rej eppenļo̧k, riiti jeje ko rekwojarjar ami, jar, im kōnono āinwōt juon baam̧le.

Eļtōr Dudley, 21 iiō, Indonesia Jakarta Mijen