Kaminene an Bok in Bōk Meļeļe Ej Kwaļo̧k Jerbal in Lo̧mo̧o̧r
Ilo juon iien kaminene in tōl peļaakin laļ in ilo Pāpode 2011, membōr ro uwaan Būreejtōnji eo Kein Kajuon im Doulul eo an Jon̄oul Ruo Rijjilōk kar katakin ro raar bōk kuņaaer kōn wāween wājepdik ļo̧k ilo kōjerbal bok in bōk meļeļe ko rekāāl. Kweilo̧k eo ekar itok ālkin kaminene in tōl eo ilo Nobōm̧ba 2010 ke bok in bōk meļeļe ko rekar jino kwaļo̧k kadkad.
Rikōnono ro rekar kwaļo̧k wāween eo n̄an kōjerbal bok in bōk meļeļe ko ilo juon wāween eļapļo̧k an im̧we, aorōk in meļeļe pedped in katak ko an bok in bōk meļeļe ko rekāāl, wāween kōjerbali pedped ko im ukooktak ko n̄an būrookraam̧ ko an Kabun̄, wāween an oktak ko an bok in bōk meļeļe ko maron̄ in jerbal n̄an kōwōnm̧aanļo̧k jerbal in lo̧mo̧o̧r eo, im eddo eo an kōrā ro ilo ko̧o̧njeļ ko.
Ro raar bōk koņaer ilo kadiwōjļo̧k eo Būreejtōn Henry B. Eyring, Rikakpilōklōk eo Kein Kajuon ilo Būreejtōnji eo Kein Kajuon; Eļtōr Russell M. Nelson, Dallin H. Oaks, Richard G. Scott, Robert D. Hales, Jeffrey R. Holland, David A. Bednar, Quentin L. Cook, D. Todd Christofferson, im Neil L. Andersen jen Doulul eo an Jon̄oul Ruo Rijjilōk ro; Eļtōr Craig C. Christensen; Bruce D. Porter im W. Craig Zwick jen Doulul eo an Jimjuonn̄oul eo; im būreejtōn ro routiej an radik ko.
Jejjet ļo̧k Wāween Kōjerbal Bok in Bōk Meļeļe ko
Ņae etan kweilo̧k eo “kein karuo iien em̧m̧an n̄an meļeļe wāween kōjerbal bok in bōk meļeļe eo ilo jejjet ļo̧k,” Būreejtōn Eyring ekar kōketak ritōl ro n̄an kōļapļo̧k eddo ko aer n̄an ebbōk m̧adenļo̧k.
“Ej kōn wōt Jetōb eo naaj kōm̧m̧an bwe kwon jeļā ekōjkan kōjerbal ta eo kwoj riiti ilo Bok in Bōk Meļeļe eo,” ekar ba. “… Emaron̄ in āinwōt n̄an kom̧ jab jejjet n̄an kōtmene ak em̧ool kōjatdikdik kōn to̧o̧rtok in m̧adenļo̧k eo kom̧ij aikuji ilo jerbal in jipan̄ eo ami raan otemjej. Ejjamin itok kōn ejjeļo̧k tōmak im kijejeto ilo jerbal, bōtaab epidodo.”
Būreejtōn Eyring ekar kallim̧m̧ur bwe āinwōt ritōl ro rej jerbal im jar n̄an “meļeļe im ļoor naan ko an mour” kar leļo̧k n̄an er, Irooj eo enaaj kar jipan̄ er kōm̧m̧an jerbal in jipan̄ im tōl ilōn̄ļo̧k kajoor ko aer make.
Pedped in Katak ko an Bok in Bōk Meļeļe ko
“Bok in Bōk Meļeļe ko rej katak ko,” Eļtōr Oaks ekar ba, “im ekaduļo̧k jen bok in bōk meļeļe ko m̧okta kōn elōn̄ unin kōnono ko rej bōjrak jen kwaļo̧k kien ko ak letok tōl. Ijjilo̧kin, ej letok pedped ko me rej im̧we ritōl ro n̄an kōjerbali … ekkar n̄an jekjek ko aer ilo jikin ko aer.”
Eļtōr Bednar im Eļtōr Christofferson rekar kakkōļ ritōl ro ņae aer kōjooļ jepta ko im̧aan an Bok in Bōk Meļeļe 2 n̄an tōpar kakien ko ilo jepta ko tokālik. Jepta ko im̧aan rej katōt juon pedped an katak ko n̄an meļeļe im kōjerbal pedped ko im kakien ko me rej itok ļo̧kertok.
Eļtōr Bednar ekar ba bwe n̄an an bok in bōk meļeļe ko erom “lukkuun pedped ko, kōn jejjo wōt jerbal ko rej alikkar, ej juon menin aikuj eļapļo̧k ilo jetōb im menin aikuj epen n̄an kōjwōj aolep.”
Pedped ko kōn Ukooktak
“Jekjek ko kōn katak ko, bujen ko, im kakien ko kar ejaak jen Būreejtōnji eo Kein Kajuon im Jon̄oul Ruo ro, jej jab ukōt jekjek eo m̧okta jān bok in bōk meļeļe eo,” Eļtōr Nelson ekar ba. “Kōmaron̄ Ukooktak ej reļo̧k n̄an bar jet m̧akūtkūt ko jet n̄an tōpar wāween an jikin eo.”
Ekkar n̄an Eļtōr Porter, Jepta 17, “Meļeļe Ejjab Oktak im Kakkobaba,” kar kobaitok n̄an jipan̄ ritōl ro an jikin ko ļoor Jetōb eo im ļōmņake n̄āāt ej ekkar n̄an kobaiktok jet būrookraam̧ ko. Jepta eo ej kōmeļeļeik ta eo ejjab maron̄ oktak im letok ļalem jekjek ko ium̧win ukooktak ko remaron̄ kōm̧m̧an: jekjek ko an baam̧le, jab bwe iaļ im wāween leto letak meļeļe ko, doulul ko reddik ak kūlaaj ko, jabwe oran ritōl ro, im wāween ko n̄an kōjparok.
“Ukooktak ko rekkar rej jab kōm̧ōjņo̧ļo̧k Kabun̄ eo; rej kōkkajoorļo̧k e,” Eļtōr Porter ekar ba ilo juon an ennaan jen Eļtōr W. Craig Zwick jen Jimjuonn̄oul eo ekar riiti. Ilo kōm̧m̧an ukooktak ko rej im̧we, ritōl ro an jikin ko rej jab aikuj en̄jake ke rej kōm̧m̧ane jidik wōt ļōmņak eo. “Aolep iunit ko an Kabun̄ rej deļo̧n̄e katak ko, kain̄i ko, im kajoor in priesthood eo, im menin letok ko an Jetōb remenin aorōk n̄an lo̧mo̧o̧r im ijo ilōn̄ tata an ajri ro nejin Anij,” Eļtōr Porter ekar je.
Jerbal in Lo̧mo̧o̧r
Oktak ko rekar kōm̧m̧an ilo aolepen Bok in Bōk Meļeļe 2 kōttōpar ko aer n̄an le m̧aanļo̧k jerbal in lo̧mo̧o̧r. Būreejtōn Eyring ekar ba: “Bok in Bōk Meļeļe eo enaaj erom juon menin aorōk n̄an kwe ilo am̧ kōjerbal e n̄an jipan̄ eok tōl ro jet n̄an kālōt iaļ eo n̄an mour indeeo. En̄in ej kōttōpar eo an.”
Jepta 5 ej lukkuun boktok ippān doon ium̧win taitōļ eo “Jerbal in Lo̧mo̧o̧r ilo Ward im Stake eo” oran unin kōnono ko rekar kōjno̧lo̧ki m̧oktaļo̧k, ekitbuuj jerbal in mijinede an membōr, dāpij ro rekāāl, kōkajoorļo̧k membōr rejeniknik, jerbal an tampeļ im menmenbwij an baam̧le, im katakin ko̧jpeļ eo.
“Paul ekar ba bwe n̄an jerbal an iien ko re jejjet, bwe En kobaik men ko otemjej ilo Kraist, men ko i lan̄, im men ko I laļ,” Eļtōr Bednar ekar ba (lale Epesōs 1:10). “Ewōr wōt juon jerbal.”
N̄an waanjon̄ak, jet iaan men ko kōtmeni m̧oktaļo̧k āinwōt mijen ko rejenolo̧k an Kabun̄ eo rej “ejja jerbal eo wōt ilo eria ko reoktak,” ekar ba. Jerbal in mijinede ej kwaļo̧k ko̧jpeļ eo im karuwaineneiktok ro jet n̄an bōk kain̄i ko rekwojarjar im kōm̧m̧an bujen ko. Kōwāppenļo̧k armej ro rekwojarjar—ekitbuuj jerbal in kōrooltok, kōkajoorļo̧k, im katakin—ej jerbal in karuwaineneiktok armej n̄an kautiej kain̄i ko im bujen ko. Peptaij kōn ro remej kōn menmenbwij an baam̧le im jerbal in tampeļ ej boktok iien em̧m̧an n̄an bōk kain̄i ko im kōm̧m̧an bujen ko n̄an jabdewōt ro remej.
Eļtōr Holland eaar ba bwe ilo m̧ool oktak ko n̄an bok in bōk meļeļe eo ej tōl ļo̧k n̄an juon meļeļe eo me ritōl ro an doulul im radik ko rejjab pād ilo ward ko̧o̧njeļ eo ļōmņak kōn membōr ro an doulul im radik ko aer make, bōtaab ewōr aer eddo n̄an ajije n̄an menin jipan̄ an jetōb an aolep memebōr ro.
Eļtōr Cook eaar jipan̄ kalikkar ekōjkan an jet iaan ukooktak in kakien ko ilo Bok in Bōk Meļeļe 2 jipan̄ leļo̧k n̄an jerbal in lo̧mo̧o̧r eo.
Eaar kwaļo̧k aorōk in kweilo̧k eo an bisop ro im ward ko̧o̧njeļ ko n̄an tōpar aikuj ko an menin jipan̄ ko kiiō me kweilo̧k eo an menin jipan̄ ko ejako an kōm̧m̧an. Eaar kōmeļeļeik ļapļo̧k in jerbal eo an ritōl ro an Melkisedek Priesthood eo ilo kapilōk ippān membōr in doulul eo. Eaar etal wōt kalikkar oktak ko me rej kōtļok bwe ro jemen me rejjab lukkuun erreo n̄an tampeļ ren bōk kuņaer ilo kain̄i im kōjeram̧m̧an ko an baam̧le membōr ro ilo jet jekjek ko.
“Jejjab pād ilo juon pejnej in tōl būrookraam̧ ko ak bōk eddo in juon doulul,” Eļtōr Bednar eaar ba. “Emenin aorōk, bōtaab ejjab men eo eļap an aorōk. En̄in ej jerbal in lo̧mo̧o̧r. Im n̄e jej jino ļōmņak kōn kain̄i ko im bujen ko, innām ritōl ro an priesthood renaaj kar bōlen kajjitōk kajjitōk eo, ta kain̄i eo tok juon me emenin aikuj ilo mour an kajjojo armej ak baam̧le in, im ilo wāween rōt jemaron̄ in jipan̄ ilo kōppopo eo?”
Kōrā ro ilo Ko̧o̧njeļ eo
Eļtōr Scott eaar kwaļo̧k an n̄urbōktak bwe ilo jet jikin ko, ritōl ro rej likjab n̄an kobaik kōrā ro n̄e rej kapilōk ippān doon. “N̄e [kōrā ro] remaron̄ in kōketak n̄an bōk kuņaer ilo kweilo̧k ko an ward ko̧o̧njeļ ko, ļōmņak ko aer rej iien otemjej kanooj jipan̄ im kōbōkakkak,” eaar ba.
Ritōl ro remaron̄ kōketak bōk kuņaan kōn kūr jejtōr ro kōn etaer im kōn kwaļo̧k kam̧oolol kōn ļōmņak ko im elmakot ko rej kwaļo̧ki, Eļtōr Scott eaar kōmeļeļeik.
“Juon kōjeram̧m̧an em̧m̧an me ej itok n̄an im̧ōko im̧ōn ritōl ro an priesthood” ro rej ļoor unin tōl kein ej bwe “em̧m̧aan rein remaron̄ in ļapļo̧k aer kam̧oolol kōn jerbal eo ekwojarjar an lim̧aro ippāer ilo im̧ōko im̧weier make,” eaar kakobaba.
Eaar katakin kōn aorōk eo an pukōt errā eo ibwilijin membōr ro an ko̧o̧njeļ eo. N̄e jejeļā en̄jake jab in, juon ritōl emaron̄ kile im kūr n̄an juon bout. Ilo waanjon̄ak ko n̄e membōr ro remaron̄ jab errā, ritōl ro rej aikuj kajjitōk kapilōk jān kajjojo membōr an ward ko̧o̧ņjeļ eo, kwaļo̧k kam̧oolol kōn ļōmņak ko kwaļo̧ki, kōm̧m̧ane juon jokālōt, im kajjitōk ippān membōr ro an ko̧o̧njeļ eo n̄an juon wōt ilo rejtak ilo jokālōt jab eo. Eļtōr Scott eaar āliji aorōk eo kōn ittiņo̧ eo ilo jerbal ko an ward ko̧o̧ņjeļ eo.
Tōprak ko Kōtmene Kaki
Eļtōr Nelson eaar kōjem̧ļo̧k kaminene eo kōn kwaļo̧k jilu kōjatdkdik ko: ennaan in enaaj kōtļo̧k iien im jipan̄ ko an membōr ro n̄an kōjerbale kōn jejjet ļo̧k, kajoor in an priesthood eo enaaj eddōkļo̧k ilo kajjojo rikabwijer priesthood eo n̄an kōjeram̧m̧an aolep kajjojo armej im aolep baam̧le ilo Kabun̄ in, im bwe kajjojo membōr renaaj en̄jake juon jeļā eo eļapļo̧k kōn ujilepļo̧k im kaļoor.
Ilo jerbal in lo̧mo̧o̧r eo, ritōl ro an priesthood rej aikuj ļōmņak kōn kain̄i ko tok jet kajjojo armej rej aikuji im ewi wāween n̄an jipan̄ ilo kōppopo jab in.
Pija jān craig dimond, © IRI
Ritōl ro an Kabun̄ in raar ba bwe jim̧or em̧m̧aan im kōrā ro rej aikuj in jon̄an wōt juon im ilo ejjeļo̧k kalijōkļo̧k kwaļo̧k ļōmņak ko aer ilo kweilo̧k ko an ritōl.
PIJA JEN CRAIG DIMOND