Kememej E Iien Otemjej
Jān juon ennaan kar kwaļo̧ke ilo Brigham Young University–Idaho ilo Jānwōde 27, 2009. N̄an ron̄jake ennaan eo ilo In̄lij, etal n̄an web.byui.edu/devotionalsandspeeches/default.aspx.
N̄e jej iien otemjej kememej Rilo̧mo̧o̧r eo, jemaron̄ “kōm̧m̧ane aolep men ilo lem̧ōņōņō me rej pād ilo kajoor eo ad,” lōke bwe kajoor eo An im iakwe eo An n̄an kōj enaaj lo kōj.
Jak ko an kwojkwoj eo ej kapen bwe juon iaan un ko reļļap an kwojkwoj eo āinwōt an kar kōm̧m̧ane jān Irooj Jisōs Kraist js bwe jen maron̄ “kememej e iien otemjej” (Moronai 4:3; 5:2). Kememej Rilo̧mo̧r eo alikkar bwe ekoba kememej Pinmuur eo An, eo ej jutak kōn pilawe im dān eo āinwōt kōkaļļe in en̄taan im mej eo An. Jej jab aikuj in meļo̧kļo̧k ta eo Eaar kōm̧m̧ane n̄an kōj, bwe n̄e ejjab kōn Pinmuur im Jerkakpeje eo An, mour enaaj kar ejjeļo̧k tokjen. Kōn Pinmuur im Jerkakpeje eoAn, ijowōt ke, mour ko ad ewōr aer kalim̧m̧ūr ko indeeo, ekwojarjar.
Ikōņaan kobaik jilu jekjek ko kōn ta meļeļe in “kememej e iien otemjej”: m̧o̧ktata, pukōt n̄an jeļā im ļoor kōņaan eo An; ruo, kile im bōk eddo eo ad n̄an uwaak n̄an Kriast bwe aolep ļōmņak, naan, im kōm̧m̧an; im jilu, mour kōn tōmak im ilo ejjeļo̧k mijak bwe jen maron̄ iien otemjej reilo̧k n̄an Rilo̧mo̧r eo kōn jipan̄ eo jej aikuji.
1. Pukōt n̄an jeļā im ļoor an kilaan Kraist ejja āinwōt An kar pukōt ankilaan Jemen.
Kōjeram̧m̧an eo an kwojkwoj eo ioon pilawe eo ej letok n̄an kōj n̄an kōņaan bōk iood etan Nejin “im kememej e iien otemjej im kejparok kien ko an ko eaar litok n̄an [kōj]” (Moronai 4:3). Enaaj barāinwōt jejjet n̄an riiti bujen in āinwōt “kememej E iien otemjej n̄an kejparok kien ko An.” En̄in ej wāween An kar kememej Jemen iien otemjej. Āinwōt An kar ba, “I jab make maron̄ in kōm̧anm̧an men eo jabdewōt: āinwōt Ij ron̄ Ij ekajete; im Aō ekajet e wānōk: bwe I jab pukot ankil Aō wōt, a ankilaan Jema eo Ear jilkintok Eō” (Jon 5:30).
Jisōs eaar bōk juon ippān doon eo eweppān ippān Jemen kōn ajeļo̧k E make, jim̧or ilo ānbwin im jetōb, n̄an ankilaan Jemen. Kōnono kōn Jemen, Jisōs eaar ba, “bwe iien otemjej Ij kōm̧m̧an men ko rej kabun̄būruon” (Jon 8:29). Kōnke eaar ankilaan Jemen, Jisōs eaar ajeļo̧k e em̧ool n̄an mej, “ankilaan Nejin naaj oran̄ļo̧k ilo ankilaan Jemān” (Mosaia 15:7). Jipadpad eo An ioon Jemen ej juon un in pedped ko kwaļo̧k eo an Jisōs eaar kanooj alikkar im kajoor.
Ilo ejja wāween in wōt, kwe im N̄a maron̄ likūt Kraist ilo ioļapļap in mour ko ad im erom juon wōt Ippān āinwōt E ej juon wōt ippān Jemen (lale Jon 17:20–23). Jemaron̄ ijjino kōn kaiiet ļo̧k aolep men jān mour ko ad innām bar ejaaki mour ko ad kōn men ko raorōk tata im̧aantata ippān Rilo̧mo̧o̧r eo ilo an pād ioļapļap. Jej aikuj m̧o̧kta likūt ilo jikier men ko me rej kapidodoik n̄an kememej E iien otemjej—kōmakijkij jar im ekkatak jeje ko rekwojarjar, m̧ool in ekkatak katak ko an rijilōk ro, kōppopo ko wiik otemjeļo̧k n̄an bōk m̧ōttan kwojkwoj eo ilo erreo, kabun̄jar ilo Jabōt, im kanni im kememej ta eo Jetōb eo im en̄jake rej katakin kōj kōn rikaļooran.
Men ko jet remaron̄ itok n̄an ļōmņak eo am̧ eļaptata ejejjet n̄an kwe ilo tōre in ilo mour eo am̧. N̄e ejejjet ad kōm̧m̧an iien im jekjek ko n̄an jerbal kein ilo kaioļapļap mour ko ad ilo Kraist, jemaron̄ jino kobaik tok bar jet eddo ko im men ko ewōr aorōkier, āinwōt jeļāļo̧kjeņ im eddo ko an baam̧le. Ilo wāweeen in men ko raorōk rejjamin obrak jān mour ko ad jān men ko rem̧m̧an wōt ak rejjab aorōk, im men ko edikļo̧k aorōk ko aer renaaj bōk laļ ļo̧k men ko im̧aantata ak lukkuun jako jān mour ko ad.
Ij kile bwe kajokuun wōt juon ankilaad n̄an eo an Jisōs Kraist āinwōt An kar kajokuun wōt juon An kilaan n̄an ankilaan Jemen ej juon men eo ejjab pidodo kōtōprake. Būreejtōn Brigham Young (1801–77) eaar meļeļe kōn apan̄ eo ad ke eaar ba:
“Ālkin kar ba im kadedeļo̧k, ālkin an kar tōl armej rein ilo juon iien aitok, kwoj jab kile ke bwe ewōr juon likjab in lōke ilo ad Anij? Komaron̄ ke kile menin ilo kwe make? Komaron̄ kajjitōk, ‘[Būratōr] Brigham, kwoj ke kile menin ilo kwe make?” Ij, Imaron̄ lo bwe n̄an kiiō ejjan̄in jako Aō lōke, n̄an juon jon̄an, ilo e eo Ij lōke. —Etke? Kōnke ejjeļo̧k Aō kajoor, kōnke kaje ko an wōtlo̧k eo eaar pād ilo n̄a. …
“… Juon me eaar walōn̄tak ilo n̄a, ilo iien ko [,] bwe alikkar an jin̄aik juon ļain in kōjeno̧lo̧k ikōtaan kōņaan eo aō im kōņaan eo an Jema ilo lan̄; juon men eo me ej kōm̧m̧an bwe kōņaan eo aō im kōņaan eo an Jema ilo lan̄ rejjab juon wōt.
“Ijeļā bwe jej aikuj en̄jake im meļeļe, jon̄an wōt eo jemaron̄e, jon̄an wōt eo nememe in wōtļo̧k eo enaaj kōtļo̧k bwe jen, jon̄an wōt eo jemaron̄ in bōk tōmak im jeļāļo̧kjeņ eo n̄an meļeļe kōn kōj make, bawe kōttōpar eo me Anij eo jej jerbal n̄an e ej ad kōttōpar, im bwe ebar ejjeļo̧k ad, jim̧or ilo iien in ak ilo indeeo.”1
Men̄e emaron̄ jab pidodo, jemaron̄ in dim ilo bun̄ m̧aanļo̧k wōt kōn tōmak ilo Irooj. Imaron̄ in kwaļo̧k bwe ilo iien ko ikirelel eo ad im maron̄ eo n̄an kememej iien otemjej im ļoor Rilo̧mo̧o̧r eo enaaj eddōkļo̧k. Jej aikuj kijenmej ilo jerbal m̧aanļo̧k bwe jem̧ļo̧k eo im jar iien otemjej n̄an kile im jipan̄ ekwojarjar eo jej aikuji. Nipai eaar kapilōk, “Ij ba n̄an kom̧ bwe kom̧ij aikuj jar iien otemjej, im jab kijeļo̧k; bwe kom̧ij jab maron̄ kōm̧m̧an jabdewōt n̄an Irooj ijjelokin wōt n̄e kom̧ij jab jar n̄an Jemān ilo etan Kraist, bwe Enaaj kokwojarjjare kōm̧m̧an eo am̧ n̄an eok, bwe kom̧m̧an eo am̧ en maron̄ em̧m̧anļo̧k n̄an jetōb eo am̧” (2 Nipai 32:9).
Iaar kam̧oole juon waanjon̄ak em̧m̧an kōn kain jar in ke Eļtōr Dallin H. Oaks an Doulul eo an Jōn̄oulruo Rijilōk ro im N̄an kar ijjitōn̄ n̄an kōm̧m̧ane juon iien intōrpiu ilo pija kōn juon ripālele ilo bar juon laļ. M̧okta wōt jān etal n̄an jikin kanne eo, Iaar bar etale juon alen meļeļe eo kōm kar aiini kōn ripālele ro im kar en̄jake Iaar pojak n̄an intōrpui eo. Jet minit ko m̧okta jān iien eo aō, Iaar lo Eļtōr Oaks ej jijet make ļo̧k ilo an bōran kar jillo̧k. Ilo jidik iien eaar ejjed im kar ba, “Ej kab m̧ōj aō kōm̧m̧ane jar eo aō ilo kōppopo n̄an intōrpiu in. Jenaaj aikuji menin letok eo an maron̄ in kile.” Eaar jab kowaan kōppopo eo ekanooj in aorōk, juon jar n̄an kōjeram̧m̧an jerbal ko am n̄an em̧m̧an eo am im aiboojoj eo an Irooj.
2. Kōppopo n̄an uwaak n̄an Kraist n̄an aolep ļōmņak, naan, im m̧akūtkūt.
Jeje ko rekwojarjar rej kalikkare bwe enaaj wōr juon raan in ekajet eļap n̄e Irooj enaaj jutak n̄an ekajet laļ ko (lale 3 Nipai 27:16) im n̄e aolep bukwe renaaj bukwelōlō im aolep lo rej kwaļo̧k bwe E ej Kraist (lale Rom 14:11; Mosaia 27:31; D&C 76:110). Piktok in make im jon̄ak eo an ekajet jab in kar kōmeļeļeik jān Alma ilo Bok in Mormon:
“Bwe naan ko ad naaj kiakeļo̧k kōj, aaet, aolep jerbal ko ad renaaj liakeļo̧k kōj; im jamin lo kōj bwe jej jab libijinjin; im ļ0mņak ko ad naaj liakeļok kōj barāinwōt; im ilo jekjek in enana jej jamin maron̄ reilōn̄ļo̧k n̄an mejān ad Anij; im jenaaj m̧ōņōņōļo̧k eļan̄n̄e je maron̄ kar jiron̄ dekā ko im toļ ko n̄an wōtļo̧k iood n̄an noj kōj jān im̧aan mejān.
“A men in ej jab maron̄ kōm̧m̧an; jej aikuj itok im̧aan im jutak im̧aan ilo wūj eo An, im ilo An kajoor; im ilo An maron̄, uteej, im irooj, im kam̧ool n̄an ad jook indeeo bwe aolep ekajet ko an re jim̧we; bwe E ejim̧we ilo aolep an jerbal, im bwe e ej tiriam̧o n̄an ro nejin armej, im bwe E ewōr An aolep kajoor n̄an ļomo̧ren jabdewōt armej eo ej tōmak ilo Etan im jebar im le leen ko rekkar n̄an ukweļo̧k” (Alma 12:14–15).
Ke Rilo̧mo̧r eo eaar kōmeļeļeik ko̧jpeļ eo An, ekajet in eaar ioļapļap in. Ekar ba:
“Lo Iaar lewōj n̄an kom̧ gospel eo Aō, im en̄in ej gospel eo Iaar lewōj n̄an kom̧—bwe Iaar itok n̄an laļin n̄an kōm̧m̧an ankilaan Jema, kōnke Jema eaar jilkintok Eō.
“Im Jema eaar jilkintok Eō bwe In maron̄ toto ioon debāāl; im ālkin kar kotak Eō ioon debāāl, bwe In maron̄ kan̄ōltok armej otemjej n̄an Eō, bwe āinwōt kar kotak Eō jān armej em̧ool āindein Jema enaaj kotak armej; n̄an jutak im̧aō, n̄an ekajet kōn jerbal ko aer, eļan̄n̄e rem̧m̧an ak eļan̄n̄e re nana—
“Im kōn un in kar kotak Eō; kōn menin, ekkar n̄an kajoor eo an Jema Inaaj kan̄ōltok armej otemjej n̄anEō, bwe ren maron̄ ekajet ekkar n̄an jerbal ko aer” (3 Nipai 27:13–15).
Āinwōt “kar kotake ioon debwāāl eo” ej, aaet, juon kōkaļļe in keidiļo̧k n̄an Pinmuur eo an Jisōs Kraist me Eaar kabun̄buruōn akweļap ko me jim̧we emaron̄ in pād iood wōj kajjojo. Ilo bwe juon wāween, kōn en̄taan eo An im mej eo ilo Gethsemane im ioon Golgotha, Eaar kōļļāik wōņāān aolepen men eo jim̧we emaron̄ in kar aikuji jān kōj kōn jerawiwi ko ad. Kōn menin Eaar jutak ilo jikin jim̧we im ej jutak kōn jim̧we. Ilo ejja jekjek in wōt Anij ej iakwe, Anij ej barāinwōt jim̧we eo. M̧uri ko ad im eddo ko ad rej kiiō m̧uri n̄an Jisōs Kraist. Kōn menin, E, eaar jim̧we n̄an ekajet kōj.
Ekajet jab in, Eaar ba, ej pedped ioon jerbal ko ad. Eļaptata “ennaan eo em̧m̧an” kōn ko̧jpeļ eo An ej bwe Eaar letok menin letok eo an jeorļo̧k bōd pedped ioon ukweļo̧k eo ad. Kōn menin, eļan̄n̄e jerbal ko ad ekoba jerbal ko an ukweļo̧k, E ej jeorļo̧k jerawiwi ko ad im bōd ko ad. Eļan̄n̄e jej kowaan menin letok eo an jeorļo̧k bōd, m̧akoko n̄an ukweļo̧k, innām kaje ko an jim̧we me kiiō Ej jutak ilo etan rej kapeni. Eaar ba bwe Eaar en̄taan kōn men kein n̄an aolep bwe ren jab maron̄ en̄taan eļan̄n̄e renaaj ukweļo̧k, bōtaab eļan̄n̄e rejjamin naaj ukweļo̧k, rej aikuj en̄taan em̧ool āinwōt Iaar (lale D&C 19:16–17).
Kememej E iien otemjej, kōn menin, ej meļeļe in bwe jen kememej aolep iien bwe ejjeļo̧k men ej ņojak jān E. Ejjeļo̧k m̧ōttan mour ko ad, jekdoon kōm̧m̧an, naan, ak ļōmņak, me emaron̄ ņooji jān jeļāļo̧kjeņ eo an Jemen im Nejin. Ejjeļo̧k ko̧o̧t ilo jun teej, ejjeļo̧k iien ko̧o̧t ilo im̧ōn wia, ejjeļo̧k ettōņak in ļōn̄ ak kōņaan, im ejjeļo̧k riab ej likjab, jab kalimjōke, eņņojaak, ak meļo̧kļo̧ke. Jabdewōt men jej “eļļā ļo̧k jān e” ilo mour ak maron̄ ņooje jān armej ro jet, jenaaj wōt jelm̧ae n̄e raan eo kōtmene kake ej itok me jej ilo̧k n̄an im̧aan Jisōs Kraist, Anij eo an jim̧we eo erreo im wāppen.
M̧ool in eaar jipan̄ iuun eō ilo iien ko rokooktak jim̧or n̄an ukweļo̧k ak n̄an jab kōm̧m̧an jerawiwi. Ilo juon iien ilo kar aō kar wia kake m̧weo im̧ō, eaar wōr juon bōd ilo peba ko, im Iaar kile bwe Iaar jim̧we n̄an bōk eļapļo̧k jāān jān eo eaar wiaik m̧weo. Eo eaar jipan̄ eō wia kake m̧weo eaar kajjitōk eļan̄n̄e iaar kōņaan bōk wōt jāān eo āinwōt ke eaar wōr aō maron̄ n̄an kōm̧m̧ane. Iaar ļōmņak kōn jujelm̧ae Irooj, eo ej jutak kōn jim̧we, im kajion̄ in kōmeļeļeik bwe eaar wōr aō jim̧we n̄an bōk em̧m̧an eo jān eo eaar wiaik m̧weo im bōd eo an. Ijjab maron̄ in kar pijaik eō make kōn aō kanooj kōņaan, eļaptata jān ke Iaar bōle kajjitōk kōn jouj eo n̄an n̄a make ilo ejja iien eo wōt. Iaar uwaake eo ej jipan̄ wia kake bwe kōm naaj kar pād wōt ilo kooņ eo āinwōt ilo am kar aolep jeļā kake. Aorōk eo an eļap an ļap n̄an eō jān jabdewōt jon̄an jāān eo jeļā kake me ejjeļo̧k men en Ij aikuj in ukweļo̧k jān e ilo koņ jab in.
Ilo aō kar jodikdik juon iien Iaar jab kōm̧anm̧ōn ilo juon jekjek eo me eaar kōm̧m̧an bwe juon jorrāān edik eaar waļo̧k n̄an juon iaan ļaddik ro jatū. Iaar jab kwaļo̧k jajeļo̧kjeņ eo aō ilo iien eo, im ejjeļo̧k juon enaaj kar jeļā kōn ijo kuņaō ilo men eo. Iiō ko tok ālik Iaar jar bwe Anij en kwaļo̧k n̄an eō jabdewōt men ilo mour eo aō me aikuj in kar kajim̧we bwe In maron̄ lo eļapļo̧k aō karbōb Im̧aan, im jorrāān in eaar itok n̄an ļōmņak eo aō. Iaar meļo̧kļo̧k e, bōtaab Jetōb eaar unojdikdik bwe menin eaar juon bōd eo ejjan̄in ņa mejļan Iaar aikuj in kwaļo̧ke. Iaar kūr ļaddik eo jatū, joļo̧k bōd ippān, im kar kajjitōk kōn jeorļo̧k bōd eo an, eo eaar m̧ōkaj im jouj in kwaļo̧k. Kajjokook eo aō im ajļo̧k eo aō remaron̄ in kar dikļo̧k n̄e Iaar joļo̧k bōd ilo iien eo jorrāān eo eaar waļo̧k.
Eaar katoktok limo im aorōk n̄an eō bwe Irooj eaar jab meļo̧kļo̧ke men eo me eaar kōm̧m̧ane jem̧aanļo̧k men̄e em̧ōj kar kar meļo̧kļo̧k e. Jerawiwi ko rejjab joļo̧k er make ak jako ļo̧k. Jerawiwi ko rejjab “libobo” n̄an indeeo. Rej aikuj in lolorjaki, im men eo aiboojoj ej bwe kōnke kōn en̄taan in jouj eo an Rilo̧mo̧o̧r eo, remaron̄ in kōm̧m̧ani ilo jekjek eo em̧ōņōņōļo̧k im ediļo̧k an kōmettak jān kabun̄buruwōn akweļap ko an jim̧we kōj make.
Jej aikuj barāinwōt en̄jake kōketak n̄e jej ļōmņak kōn ekajet eo me ejjeļo̧k juon men ej likjab kōnke menin ej barāinwōt meļeļe in bwe ejjeļo̧k jerbal in pokake, jouj, im ejjeļo̧k jerbal em̧m̧an mekarta edik ej meļo̧kļo̧k e, im ejjeļo̧k kōjeram̧m̧an dāpiji.
3. Jab mijak im reilo̧k n̄an Rilo̧mo̧r kōn jipan̄.
Ilo raan ko jinoin tata an Jepļaaktok eo, Jisōs eaar kapilōk im kaenōm̧m̧an Jospeh Smith im Oliver Codwery, ro raar jerbale ukook eo an Bok in Mormon im ro renaaj kar ejjab to kar leļo̧k priesthood eo iooer. Joseph eaar 23 iiō dettan ilo tōre eo, im Oliver eaar 22. Kakkure im apan̄ ko jet raar ikutkut eļan̄n̄e jaab emakijkij. Ilo jekjek kein, ilo Eprōļ 1829 Irooj eaar kōnono naan kein n̄an er:
Eaar ba bwe eļan̄n̄e renaaj kōm̧m̧ane em̧m̧an im jab mijak, laļ in im hell remaron̄ koba ippān doon ņae er, im eļan̄n̄e renaaj kar ekkal ioon ejm̧aan eo An, rejjamin anjo.
Eaar ba bwe Eaar jab liakeļo̧k er. Eaar jiron̄ er n̄an ilo̧k ilo iaļ ko aer im jab bar jerawiwi im n̄an jerbal kōn alikkar jerbal eo me Eaar kakien e er.
Eaar jiron̄ er n̄an reilo̧k n̄an E ilo aolep ļōmņak, n̄an jab pere im n̄an jab mijak.
Amen” (D&C 20:73).
Reilo̧k n̄an Rilo̧mo̧r eo ilo aolep ļōmņak ej, ilo m̧ool, bar juon iaļ in ba “kememej e iien otemjej.” Ilo ad kōm̧m̧ane, jej aikuj jab pere ak mijak. Rilo̧mo̧o̧r eo eaar kakememej Joseph im Oliver āinwōt An kakememej kōj bwe kōn Pinmuur eo An em̧ōj An kar letok aolep kajoor ilo lan̄ im ilo laļ (lale Matu 28:18) im epād ippān jim̧or maron̄ im kōņaan eo n̄an kejparok kōj im kwaļo̧k n̄an aikuj ko ad. Jej aikuj in wōt tiljek, im jemaron̄ pedped Ioon ilo ejjeļo̧k pere.
M̧adenļo̧k in kaenōm̧m̧an eo m̧oktaļo̧k n̄an Joseph im Oliver, Rikanaan eo eaar kijenmej ilo juon en̄jake eo ekabūrom̧ōjm̧ōj, ekōmettak me eaar katakin e n̄an reilo̧k n̄an Rilo̧mo̧o̧r eo im jab mijak ļōmņak ko, jum̧ae ko, im kōm̧m̧an ko an armej.
Ilo Juun 1828 Joseph eaar kōtļo̧k bwe Martin Harris en bōk peij ko 116 im̧aantata an Bok in Mormon jān Harmony, Pennsylvania, n̄an kwaļo̧k n̄an membōr in baam̧le eo an ilo Palmyra, New York. Ālkin an Martin kar likjab in bar kōrooli ļo̧k āinwōt kar kalim̧m̧ur, Joseph eaar inepata eaar ilo̧k n̄an ijo jikin ro jinen im jemen ilo Machester Township, New York kōn juon wa eaar kōjerbal. Rikanaan eo eaar ijjilōk ļo̧k n̄an Martin. Ke Martin eaar tōkākļo̧k, eaar kwaļo̧k bwe ejako peba ko ippān ak ejaje raar pād ia.
Joseph eaar lam̧ōj: “Oh! Aō Anij, aō Anij. … Aolep im jako, jako. Ta Inaaj kōm̧m̧an? Em̧ōj Aō jerawiwi. Ej N̄a eo me iaar kapo illu eo an Anij kōn kajjitōk ippān n̄an ta eo me ejjeļo̧k Aō kar maron̄ n̄an kajjitōk: … Ij lokjak n̄an jabdewōt kauwe me enjeļ eo an Ijo Eutiej Tata emaron̄ letok n̄an eō?”
Raan tok juon Rikanaan eo eaar bar rool ļo̧k n̄an Harmony. Ke eaar pā ijo, eaar ba, “Iaar jino kōttāik eō make ilo jar ekajoor im̧aan Irooj … bwe eļan̄n̄e emaron̄ In maron̄ bōk jouj ilo pein im joļo̧k bōd jān aolep men ko me Iaar kōm̧m̧ani me eaar jum̧ae ankilaan.”2
Ālkin kajeik Joseph kōn mijak armej eļapļo̧k jān Anij, Irooj eaar jiron̄ e:
Eaar ba bwe Joseph kar kālōte n̄an kōm̧m̧ane jerbal eo an Irooj, bōtaab kōnke kōn jab pokake eo, eļan̄n̄e eaar jab ekkōl enaaj kar wōtlo̧k.
Bōtaab Eaar ba n̄an kakememj bwe Anij ejouj. Kōn menin, Joseph eaar aikuj in ukweļo̧k jān ta eo eaar kōm̧m̧ane me eaar jum̧ae kien eo Anij eaar leļo̧k n̄an e; im kar kālōt e wōt, im kar bar kūri n̄an jerbal eo (lale D&C 3:9–10).
“Ilo juon iien, Irooj eaar bōk Urim im Thummim eo im pileij ko jān Joseph. Bōtaab men kein raar eaar ejjab to raar bar kōjepļakiļo̧k n̄an e. ‘Enjeļ eo eaar lan̄lōn̄ ke eaar bar kōrooltok n̄an eō Urim im Thummim eo,’ Rikanaan eo eaar uwaak, ‘im kar ba bwe Anij eaar m̧ōņōņō kōn tiljek eo aō im ettā eo aō, im kar iakwe eō kōn aō ukweļo̧k im niknik ilo jar, ilo eo eaar kanooj em̧m̧an aō kōm̧m̧ane jerbal eo aō āinwōt n̄an … maron̄ bar jino jerbal in ukook eo. ’ Ilo an kar Joseph wōnm̧aanļo̧k ilo jerbal eo eļap im̧aan, kiiō eaar penļo̧k kōn en̄jake ko rem̧m̧an kōn bōk jeorļok bōd eo an Irooj im juon kijejeto eo ekāāl n̄an kōm̧anm̧an An kilaan.”3
Kijejeto eo an Rikanaan eo n̄an pedped ioon Anij im jab mijak ta eo armej ro remaron̄ kōm̧m̧ane eaar kijin̄en̄e ālkin kar en̄jake in. Ālkin menin mour eo An eaar juon waanjon̄ak eromaakļo̧k kōn ta meļeļe in n̄an kememej Kraist kōn pedped ioon kajoor im jouj eo An. Joseph eaar kwaļo̧k jeļā in ilo tōre in kalbuuj eo an an eaar kanooj in pen ilo Liberty, Mossouri, ilo naan kein:
Eaar ba bwe juon tim̧a kileplep eļap an jeram̧m̧an kōn juon jōbwe ekanooj dik ilo juon ļan̄, ilo an dāpiji wōt ilo iaļ eo ej jerak ie ļok n̄an jebaluur.
Eaar ba bwe jej aikuj laudin̄din̄ ilo kōm̧m̧ani aolep men ko me rej pād ilo kajoor eo ad, innām jemaron̄ in jutak pen, kōn jeļā eo eļap, n̄an lo lo̧mo̧o̧r an Anij, im bwe pein n̄an loe (lale D&C 123:16–17).
Ilo kōkaduki, n̄an “kememej e iien otemjej” ej meļeļe bwe jen jab mour kōn mour ko ad ilo mijak. Jejeļā bwe apan̄ ko, inepata ko, im būrom̧ōj ko renaaj itok n̄an kōj kajjojo ilo elōn̄ wāween ko, bōtaab jej barāinwōt jeļā bwe ilo jem̧ļo̧k in, kōnke kōn Rijojomar eo ekwojarjar, aolep men remaron̄ in kōm̧m̧an n̄an aer jerbal ippān doon n̄an em̧m̧an ko ad (lale D&C 90:24; 98:3). En̄in ej tōmak eo ejej uwaan kar kwaļo̧k jān Būreejtōn Gordon B. Hinckley (1910–2008) ke ekōn kar ba, “Aolep men renaaj em̧m̧an tōprak ko aer.”4 N̄e jej kememej Rilo̧mo̧o̧r eo aolep iien, jemaron̄ “laudin̄din̄ in kōm̧m̧ani aolep men ko me rej pād ilo kajoor eo ad,” lōke bwe bwe kajoor eo An im iakwe eo an n̄an kōj naaj loe kōj.
Kōm̧m̧an bwe jen kememej E iien otemjej—“bwe[jen] maron̄ bōk iien otemjej jetōb eo an [ippād]” (Moronai 4:3). Ij kwaļo̧k aō kam̧ool kōn kajoor in Pinmuur eo an Jisōs Kraist. Ij kwaļo̧k kam̧ool kōn m̧ool eo an Irooj eo emour, eaar jerkakpeje. Ij kwaļo̧k kam̧ool kōn iakwe eo an im ejjeļo̧k jem̧ļo̧kin an Jemed im Nejin n̄an kōj kajjojo, im Ij jar bwe jenaaj mour ilo dim kememej iakwe in ilo aolep wāween ko an.
Aenōm̧m̧an Ij Likūt ņa Ippemi, jān Walter Rane, kōn jipan̄eo an Church History Museum; Pilawe eo Ruje, jān Walter Rane
KRAIST ILO GETHSEMANE, JEN HEINRICH HOFMANN, COURTESY OF C. HARRISON CONROY CO.
Itok eo Kein Karuo, jān Harry Anderson © IRI
Ej Kapit Mejān Armej Eo E Pilo, jān Walter Rane, kōn jipan̄ eo an Church History Museum