Doctrine and Covenants 76:22–24

Eoon kein rej kwaļo̧k juon kam̧ool raan kein kōn Jisōs Kraist: E emour!

22 Ālkin elōn̄ naan in kam̧ool ko me raar kwaļo̧k kōn Rilo̧mo̧o̧r eo, eaar letok naan in kam̧ool in, āliktata in aolep: Bwe Rilo̧mo̧o̧r eo ej mour!,

23 Bwe Rikanaan eo eaar lo E ituanbwijmaron̄ in Anij im eaar ron̄ juon ainikien ej kwaļo̧k ļo̧o̧k eo bwe E ej Nejin Jemen Emake Wōt—

24 Jān E, im ilo E, im kōn E, laļ ko rej im raar kōm̧anm̧an, im ro rej jokwe ie rej lukkuun ļaddik im leddik ro nejin Anij.

Elōn̄ Naan in kam̧ool ko

Elōn̄ naan in kam̧ool ko raar litok kōn kar jerkakpeje Kraist m̧okta jān revelesōn in. Errein rej jet waanjon̄ak ko:

Mary Magdalene (lale Jon 20:11–18)
Rijilōk ro ilo raan ko an Jisōs (lale Matu 28:9–20; Mark 16:14–20; Luk 24:36–53; Jon 20:19–29; 21)
Rikaļoor ro ruo ilo iaļ eo ļo̧k n̄an Emmaus (lale Luk 24:13–35)
Stephen (lale Jerbal 7:55–56)
Paul (lale Jerbal 9:1–6)
RiNipai ro (lale 3 Nipai 11–28)
Moronai (lale Ether 12:39)
Joseph Smith (lale Joseph Smith—History 1:16–20)

E ej Mour!

“Iaar riiti—im Ij tōmak—naan in kam̧ool ko an ro me raar en̄jake būrom̧ōj kōn Debwāāl eo an Kraist im lan̄lōn̄ eo kōn Jerkakpeje eo An. Iaar riiti—im Ij tōmak—naan in kam̧ool ko an ro ilo Laļ eo Ekāāl me raar loļo̧k jān ejjja jerkakpeje Irooj eo wōt.

“Ij tōmak naan in kam̧ool eo an juon eo me, ilo epepe in, eaar kōnono ippān Jemed im Nejin ilo wōjke ko kiiō ņa etan ekwojarjar im eo eaar leļo̧k mour eo an, liāpe naan in kam̧ool eo an kōn bōtōktōkin.”

Būreejtōn Thomas S. Monson, “Em̧ōj An Jerkak!” Liahona, Māe 2010, 89.

Laļ ko Rej im Raar Kōm̧anm̧an

“Ium̧win tōl eo an Jemen, Kraist eaar Irooj eo an laļ in, eo eaar kōm̧anm̧an laļ ko ejjeļo̧k wōraer—eo laļ in ad ej juon wōt (see Epesōs 3:9; Hebru 1:2).

“Jete būļānet ko rej pād ilo universe in ewōr armej ro rej pād ie? Jejjab jeļā, bōtaab jejjab makeļo̧k ilo universe in! Anij ejjab Anij an juon wōt būļānet!”

Elļtōr Neal A. Maxwell (1926–2004) an Doulul eo an Jōn̄oulruo Rijilōk ro, ilo “Special Witnesses of Christ,” Liahona, Epr. 2001, 5.

Jej Lukkuun Ļaddik im Leddik ro Nejin Anij

“Kom̧ij jab armej bajjōk, jodikdik ro m̧ōtta rejitōnbōro aolepen laļ in. Kom̧ij aiboojoj im indeeo. …

“Ej aō jar im kōjeram̧m̧an bwe n̄e kom̧ij lale annan̄imi, kom̧ naaj maron̄ lo eļapļo̧k jān jabwānōk im pere-an juon make im kile wōn m̧ool in kom̧: ļaddik im leddik ro nejin Anij Kajoor Pōtata raiboojoj.”

Būreejtōn Dieter F. Uchtdorf, Rikakipilōklōk eo Kein Karuo ilo Būreejtōnji eo Kein Kajuon, “Annan̄ eo ilo Dān” (Church Educational System nokin in jota eo n̄an rūm̧m̧an ded ro, Nob. 1, 2009); ewōr ilo CESfiresides.lds.org.

Meļeļe eo jān Em̧ōj An Jerkak, jān Del Parson