Kajoor in Jeje Ko Rekwojarjar
Ke ruo jodikdik in Tahiti raar leļo̧k jidik iien n̄an jeje ko rekwojarjar, mour ko aer raar oktak.
Rooma eaar jab lukkuun kōņaan ekkatak jeje ko rekwojarjar. Vaitiare eaar jab lukkuun kōņaan etal n̄an jemeneri. Im rejjab aikuj in kar. Bōtaab ke raar kālōt, mour ko aer raar oktak.
Etke Ejjab?
Etke juon jodikdik emaron̄ in kālōt n̄an joļo̧k ruo awa ko aolep joten Taije ekkatak jeje ko rekwojarjar ippān jinen? Juon iiō emootļo̧k Rooma Terooatea jān Tahiti emaron̄ in kar bōle ļōmņak ejja āinwōt in.
Kiiō emaron̄ kajjitōk etke juon jodikdik eaar kālōt n̄an jab.
Ium̧win jilu iiō ko ilo jemeneri, Rooma eaar jab kanooj leļo̧k an n̄e rūkaki ro an rej leļo̧k eoon ko n̄an riiti n̄an katak eo tok juon. “Ijjab kōņaan riiti,” ej ba. “Jeje ko rekwojarjar raar jab lukkuun kaitoktok limo n̄an eō.”
Bōtaab eaar ļōmņak etke ritōl ro an Kabun̄ in ilo ward eo an im stake eo iien otemjej kōjerbal jeje ko rekwojarjar ilo ekōnono ko aer im katak ko. Eaar lale ritōl ro an. Eaar kile ewi jon̄an an kar pidodo n̄an stake būreejtōn eo an n̄an kout jān jeje ko rekwojarjar.
Kōn mein ke Faaa Tahiti Stake eo eaar ajije rijikuuļ in jemeneri ro n̄an kumi ko n̄an kōm̧m̧ane juon jiāe kōn jeļā kememej eoon ko ilo aolepn iiō eo an āliktata ilo jemeneri, Rooma eaar kālōt n̄an leļo̧k jidik iien n̄an jeje ko rekwojarjar.
Ej iien eo ekkatak ko an kajjojo wiik ippān jinen eaar ijjino. Kajjojo bon̄ōn Taije raar ekkatak ippān doon n̄an jiāe eo an kūlaj eo raan eo tok juon, katak ia eo eoon ko raorōk im em̧ool kakilōklōk elōn̄ iaer.
Im ej iien eo men ko raar jino oktak n̄an Rooma. Ekkatak jeje ko rekwojarjar an eaar kōkajoorļo̧k kōtaan eo an ippān jinen. Eaar jino an lo men ko reierwōt juon ikōtaan ta eo jeje ko rekwojarjar ej katakin im ta eo ej waļo̧k ilo laļ in rainin. Ilo an kar jar kōn ta eo eaar riiti, eaar kile eaar jān Anij.
Eaar barāinwōt jipan̄ e tōl kumi eo an n̄an wiini jiāe eo an stake kōn jeļā kememej eoon ko.
Rooma ej kile ilo kōjeram̧m̧an ko eaar būki juon katak eaar katak ilo ekkatak eo an. “Ilo Mosaia 2:24 Kiin̄ Benjamin eaar katakin bwe n̄e jej kālōt n̄an kōm̧m̧ane ta eo Irooj ej kajjitōk, em̧ōkaj ad jeram̧m̧an,” Rooma ej ba. Juon iaan kōjeram̧m̧an ko reļļap eaar bōke ej bwe “ālkin ekkatak jeje ko rekwojarjar ilo iiō in, Ijeļā bwe Bok in Mormon ej m̧ool.”
Jab Jiron̄ Eō Ta eo n̄an Kōm̧m̧ane
Ilo jinoin jikuuļ iiō eo, Vitiare Pito eaar jab juon membōr in Kabun̄ in. Kōn menin ekōjkan an juon membōr kāāl eo ejjan̄in kar pād ilo jemeneri m̧okta jipan̄ kumi eo an wiini jiāe eo an Faaa stake eo kōn jeļā kememej eoon ko?
“Iaar jab inepata kōn jab ļap iminenen,” liin ej ba. “Iaar katak elōn̄ iaan eoon ko ilo iien katak ko an mijenede.”
Enan̄in aolepen baam̧le eo an Vaitiare raar kobatok ilo Kabun̄ in ālkin an jidimkūj an jemen kar mej im ritōl an mijen an ward eo eaar bōkļo̧k aolep mijenede ro n̄an m̧weo im̧ōn Vaitiare. Raar kōnono kōn ippān doon an baam̧le im aer pād ippān doon n̄an indeeo. “Eaar lukkuun bōktok juon oktak n̄an baam̧le eo am,” liin ej ba.
Ijowōt ke, eaar jab menin aikuj n̄an ukōt m̧wil eo an 17 iiō dettan eo emake. “Ālkin Aō kar peptiaj, aolep raar jiron̄ eō Ij aikuj etal n̄an jemeneri,” liin ej ba. “Ijjab kōņaan bwe ren jiron̄ eō ta n̄an kōm̧m̧ane, kōn menin eaar bōk jidik iien n̄an aō etal.”
Āliktata eaar kālōt kōn e make n̄an etal im lo bwe eaar lem̧ōņōņ kake. Kar jitōn̄ e bwe en m̧ōttan wōt tiim eo āinwōt Rooma an jiae kakkilōklōk eoon ko.
Ilo jinoin eaar jab kōm̧m̧ane juon ļōmņak n̄an riiti eoon ko liļo̧k. Bōtaab ke eaar kālōt bwe enaaj kar, em̧ōkaj an kar kile elōn̄ kōjeram̧m̧an ko.
“Jeje ko rekwojarjar rekar juon jipan̄ ļapļap,” liin ej ba. “Iaar katak jān jeje ko rekwojarjar elōn̄ men ko,” ekoba aorōk in jar im bwe Jemed Ilan̄ enaaj uwaaki jar ko.
Eaar barāinwōt katak bwe n̄e ej jokālōt n̄an leļo̧k e n̄an juon men, āinwōt etal n̄an jemeneri ak riiti jeje ko rekwojarjar, kejaprok kalim̧m̧ur eo epidodo ļo̧k jān eļan̄n̄e ej kōm̧m̧ane kōnke ej aikuj in ak “emenin aikuj” n̄an kōm̧m̧ane.
Kiiō ke jikuuļ iiō eo ejem̧ļo̧k, Vaitiare ej kam̧oolol eaar kālōt n̄an etal n̄an jemeneri im ekkatak jeje ko rekwojarjar: “Ijeļā n̄e jej riiti jeje ko rekwojarjar, jej jeram̧m̧an.”
Ke Rooma Terooatea (itulaļ) im ro m̧ōttan ilo kūlaj eo an jemeneri raar etal n̄an Moorea (ituanmiin̄) n̄an teeje jeļāļo̧kjeņ eo aer kōn jeje ko rekwojarjar, ta eo ej waļo̧k tok jān e ejjab aorōk—Rooma eaar juon eo ewiin kadede.
Ke Vaitiare Pito jān Tahiti eaar jokālōt n̄an ekkatak jeje ko rekwojarjar, eaar jino kile kōjeram̧m̧an ko.
Pija ko jān Adam C. Olson, ijeļļo̧kin āinwōt kakememej; itulōn̄: pija © iStock; pija in wut © iStock