ʻEletā José L. Alonso
ʻO e Kau Fitungofulú
Naʻe ʻi ai pē fakamoʻoni ia ʻa Hōsea Lui ʻAlonisou Tuleio ki he mālohi ʻo e lotú kimuʻa pea toki kau ki he Siasí. ʻOkú ne pehē, “ ʻI hoku taʻu 11, naʻá ku meimei mate. Naʻe ʻikai toe ʻamanaki e kau toketaá te u moʻui—naʻá ku fanongo hake pē ki heʻenau talanoá. Ko ia naʻá ku toutou lotu ai ki he ʻEikí, pea naʻá Ne fakamoʻui au.
“ ʻI heʻeku fanongo kimui ʻi he talanoa ʻo Siosefa Sāmitá peá u ʻiloʻi e founga ne fakataufolofola ai ha tamasiʻi naʻe taʻu 14 pē ki he ʻOtuá, naʻá ku ʻiloʻi naʻe moʻoni ia. Naʻá ku ʻiloʻi ʻoku lava ke tali mai ʻe he ʻOtuá ʻetau ngaahi lotú, pea ʻokú Ne ʻafioʻi kitautolu.”
Naʻe tataki ʻa ʻEletā ʻAlonisou ʻe he ongoʻi nonga tatau ʻi heʻene ako ʻa e Tohi ʻa Molomoná. ʻOkú ne pehē, “Koeʻuhí ko e lotú mo e tohi ko ʻení, ʻoku ou ʻiloʻi fakapapau ai ko e Kalaisí ʻa Sīsū.”
Naʻe fāʻeleʻi ʻa ʻEletā ʻAlonisou ʻi Mekisikou Siti, ʻi Mekisikou, ʻi Nōvema ʻo e 1958 kia Lui mo Lusi ʻAlonisou. Naʻá ne hiki ki he kolo ko Kuatalá ʻi Mekisikou, ʻi hono taʻu hongofulu tupú ʻo kau ai ki he Siasí. Naʻá ne fetaulaki he Mutualé mo ha talavou tui mālohi naʻe fakafeohi ange kiate ia pea maʻu ai hono ʻapi hono uá. Naʻá ne fetaulaki mo Lepeka Salasā ʻi he Mutualé pē, ʻa e fefine naʻe hoko kimui ko hono uaifí.
ʻI he taʻu 19 ʻa ʻEletā ʻAlonisoú, naʻá ne ngāue fakafaifekau taimi kakato ʻi he Misiona Mekisikou Hemosiló. ʻI he ʻosi e ngāue fakafaifekau ʻa ʻEletā ʻAlonisoú, naʻá ne mali mo Lepeka ʻi he Temipale Mesa ʻAlesoná ʻi he ʻaho 24 ʻo Fēpueli 1981. ʻOku ʻi ai ʻena fānau ʻe toko ua.
ʻOku ʻikai ngata pē ʻi he hoko ʻa ʻEletā ʻAlonisou ko e talēkita ʻinisititiuti maʻá e Potungāue Ako ʻa e Siasí, ka ʻoku ʻi ai foki hono mataʻitohi fakatoketā ʻi he tafaʻaki ʻa e fānaú pea ʻokú ne ngāue ko e toketā fakafaitoʻo mo e toketā faitafa maʻá e fānaú. ʻOku hā mei heʻene ngāue maʻuʻanga moʻuí ʻa e holi fuoloa naʻá ne maʻu ke tokoni mo faitāpuekina e niʻihi kehé—ʻo hangē pē ko hono faitāpuekina ia ʻe he ʻEikí ʻi heʻene puke heʻene kei siʻí. ʻOkú ne pehē, “ ʻOku ʻomi ʻe he tokoni ki he niʻihi kehé ʻa e uouangatahá mo e ongo fakatokouá, pea ʻokú ne fakaafeʻi mai ʻa e mālohi ʻo e ʻEikí ki heʻetau moʻuí.”
Kimuʻa pea uiuiʻi ʻa ʻEletā ʻAlonisou ki he Kōlomu ʻUluaki ʻo e Kau Fitungofulú, naʻá ne hoko ko ha pīsope, palesiteni ngāue fakafaifekau ʻa e siteikí, palesiteni fakasiteiki, tokoni palesiteni fakamisiona, palesiteni ʻo e Misiona Mekisikou Tīuaná, mo ha Fitungofulu Fakaʻēlia.