Fakamanatu ʻe he Kau Takí ʻa e Polokalama Uelofeá, Fanongonongo ʻo ha Ngaahi Temipale
Ne laka hake he kakai ʻe toko taha kilú naʻa nau kau atu ki he ngaahi fakatahaʻanga ʻe nima ʻo e Konifelenisi Lahi Fakataʻu ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi he Senitā Konifelenisí ʻi Sōleki Siti, ʻIutā, ʻi he USA, lolotonga iá ne laka hake he toko lauimiliona naʻa nau mamata pe fanongo ʻi he TV, letioó, satelaité, mo e ngaahi fakamafola ʻi he ʻInitanetí.
Ne kau mai ki he konifelenisí ʻa e kāingalotu kotoa ʻi māmaní ʻi ha lea fakafonua ʻe 93. ʻOku ʻosi ʻave ʻi he ʻInitanetí ʻa e ngaahi lea, ʻata, mo e fakamatala ʻo e fakamafolá ʻi ha ngaahi lea fakafonua lahi ʻi he .lds.org pea ʻe maʻu kinautolu ʻi he DVD mo e CD.
Naʻe fakaava ʻe Palesiteni Tōmasi S. Monisoni ʻa e konifelenisí ʻaki hano fanongonongo ʻa e ngaahi feituʻu ʻe langa ai ha temipale foʻou ʻe tolu—Footi Kōlini, ʻi Kololato, ʻi he USA; Melitiane, ʻi ʻAitahō, ʻi he USA; mo Uinipeeki, ʻi Manitoupa, Kānata—ʻo ne ʻohake leva e lahi ʻo e ngaahi temipale kuo fanongonongo pe lolotonga langá ki he 26. ʻOku lolotonga ngāue ʻaki ha temipale ʻe 134 he taimí ni.
Ne fakamamafaʻi foki ʻe Palesiteni Monisoni ʻa hono mahuʻinga ʻo e ngāue fakafaifekaú, ʻo ne pehē, “Ko e ngāue fakafaifekaú ko e toto moʻui ia ʻo e puleʻanga.” ʻOku lolotonga ngāue ha kau faifekau ʻe toko 52,000 ʻi ha misiona ʻe 340 ʻi māmani kātoa.
Naʻe hikinimaʻi ha Kau Taki Māʻolunga foʻou ʻe toko 10 mo ha Kau Fitungofulu Fakaʻēlia ʻe toko 41 ʻi he fakatahaʻanga ʻo e hoʻatā Tokonakí, kae tukuange ha kau Fitungofulu Fakaʻēlia ʻe toko 34. ʻIkai ko ia pē, naʻe uiuiʻi ʻa ʻEletā Toni R. Kalake ʻo e Kōlomu hono Ua ʻo e Kau Fitungofulú ki he Kōlomu ʻUluaki ʻo e Kau Fitungofulú. Naʻe hā mei he Lipooti Fakasitetisitika ‘o e 2010 kuo aʻu e tokolahi ʻo e Siasí he taimí ni ki he toko 14 milioná.
Naʻe fakatefito ha niʻihi ʻo e ngaahi lea naʻe fai he ʻaho ʻe ua ʻo e konifelenisí ʻi he kaveinga ʻo e uelofea ʻa e Siasí mo e polokalama uelofea laulōtaha ʻa e Siasí—ʻa ia ʻe fakamanatu hono taʻu 75 ʻi he 2011.
ʻI he ʻaho Tokonakí, naʻe fanongonongo ʻe Palesiteni Henelī B. ʻAealingi, ko e Tokoni ʻUluaki ʻi he Kau Palesitenisī ʻUluakí, ʻoku fakaafeʻi ʻa e kāingalotu ʻi he māmaní kotoa ke nau kau ki ha ʻaho ngāue tokoni ke fakamanatu ʻaki ʻa e taʻu ʻe 75 ʻo e polokalama uelofeá. ʻE fakahoko fakauooti pe fakasiteiki ʻa e ʻaho ngāue tokoní ʻi ha taimi lolotonga pē ʻa e taʻú. ʻOku totonu ke fakakaukauʻi pē ʻe he kau taki fakalotofonuá hono fakaikiiki ʻo e ngāue takitaha, pea ʻoku poupouʻi ʻa e kāingalotú ke nau fakaafeʻi mai mo ha niʻihi kehe ke kau ki ai ʻo ka fie maʻu.
Naʻe tāpuni ʻe Palesiteni Monisoni ʻa e konifelenisí ʻaki ʻene fakamoʻoni kia Kalaisi ʻi he Toetuʻú: “Naʻá Ne [ʻe Sīsū Kalaisi] mei lava pē ke tafoki he momeniti fakaʻosí. Ka naʻe ʻikai ke Ne fai ia. Naʻá Ne hāʻele hifo ki lalo ʻi he ngaahi meʻa kotoa kae lava ke Ne fakahaofi e ngaahi meʻa kotoa pē. ʻI Heʻene fai iá, naʻá ne ʻomi ai e moʻuí kiate kitautolu, ʻo mahulu atu ia ʻi he moʻui fakamatelié.”