ʻEletā Randall K. Bennett
ʻO e Kau Fitungofulú
Ko e tumutumu ʻo e ngāue maʻuʻanga moʻui ʻa Lanitelo Kei Pēneti ko ha toketā ngaohi nifo naʻá na “maʻu ai ha ongo makehe” mo hono uaifi ko Selí ke na teuteu ngāue fakafaifekau. Naʻe pau ke na fakatau atu leva hono ʻapí he taimi pē ko iá.
ʻOku pehē ʻe ʻEletā Pēneti naʻe ʻikai mahino mai he taimi pē ko iá ʻa e ʻuhinga hono ueʻi ko ʻeni kinauá—naʻe taʻu ʻe tolu pea toki lava ke fakatau atu hona ʻapí, pea ko e “kātaki lahi naʻe fai” hení pea naʻe fie maʻu ke na “fakahā ki he ʻEikí kuó ma tukupā moʻoni ke fakahoko ʻeni. Naʻe kei hokohoko atu pē ʻema falala ki he ʻEikí peá ma feinga ke ofi kiate Ia ʻaki ʻema ʻalu maʻu pē ki he temipalé, ako fakaʻaho e folofolá, lotu, ʻaukai, mo tokoni ki he niʻihi kehé.”
Taimi nounou pē mei hono fakatau atu hona ʻapí, naʻe uiuiʻi ʻa ʻEletā Pēneti ke ngāue ʻi he Senitā Akoʻanga Fakafaifekau ʻi Polovó pea hili iá naʻá ne hoko ko e palesiteni ʻo e Misiona Lūsia Samalá.
Naʻe pehē ʻe ʻEletā Pēneti, “Naʻe fakaʻofoʻofa—mo loto fakatōkilalo moʻoni—ke ʻiloʻi naʻe manatuʻi kimaua ʻe he ʻEikí peá Ne hanga ʻo teuteuʻi kimaua. ʻOkú ma ʻiloʻi ʻoku ʻafioʻi ʻe he ʻEikí ʻa e ngaahi fakakaukau ʻi homa ʻatamaí mo e ngaahi ongo ʻi homa lotó. Kuó ma ako ke falala ʻokú Ne ʻafioʻi lelei ange ʻa e meʻa kotoa ʻiate kimaua, ʻoku lahi ange ʻa e meʻa ʻokú Ne ʻafioʻí, pea ʻokú Ne ʻofa ʻiate kimaua.”
Makehe mei hono uiuiʻi ʻo ʻEletā Pēneti ki he Kōlomu hono Ua ʻo e Kau Fitungofulú mo ʻene hoko ko ha palesiteni fakamisioná, naʻá ne hoko ko ha palesiteni mo ha tokoni palesiteni ʻi ha vaʻa ʻo e Senitā Akoʻanga Fakafaifekau ʻi Polovó, mēmipa ʻo e fakataha alēlea māʻolunga fakasiteikí, tokoni ʻi ha kau pīsopeliki, palesiteni ʻo e Kau Talavoú ʻi he uōtí, ngaahi uiuiʻi kehe pē, mo ha faifekau ʻi he Misiona Pālesi Falaniseé mo e Misiona Tulusi Falaniseé.
Naʻe maʻu e mataʻitohi toketā ʻo ʻEletā Pēneti ʻi he tafa nifó mei he ʻUnivēsiti ʻo ʻAlapetá (ʻi Kānata) mo ha mataʻitohi MA ʻi he ngaohi nifó mei he ʻUnivēsiti Loma Linitaá ʻi Kalefōnia Saute, ʻi ʻAmeliká.
Naʻe fāʻeleʻi ʻa ʻEletā Pēneti ʻi Sune 1955 ʻi Makaleta, ʻAlapeta ʻi Kānata. Ko ʻene mātuʻá ko Tōnolo Kei Pēneti mo Ane Tālini Longo. Naʻá ne mali mo Seli Taieni Uasimani ʻi he ʻaho 23 ʻo ʻEpeleli 1977, ʻi he Temipale Kātisitoni ʻAlapetá. ʻOku ʻi ai ʻena fānau ʻe toko fā.