ʻEletā O. Vincent Haleck

ʻO e Kau Fitungofulú

Talu pē kei siʻi ʻa ʻEletā ʻOto Viniseni Hāleki mo ʻene totongi vahehongofulu, ʻaukai, mo ako e folofolá—peá ne toki feʻiloaki mo e kau faifekaú pea papitaiso.

Naʻe kau e faʻē ʻa ʻEletā Hālekí ki he Siasí ka ne taʻu lahi mo e ʻikai ke ne kei maʻulotu. Naʻe ʻikai kau ʻene tamaí ki he Siasí. Ka naʻe totongi vahehongofulu pē e fāmilí, ʻaukai fakauike, lau fakaʻaho e Tohi Tapú, pea foaki ki he faingataʻaʻiá mei he meʻa naʻa nau maʻú. ʻOku haʻu ʻa ʻEletā Hāleki mei ha tukufakaholo ʻo e tuí.

Naʻe fāʻeleʻi ʻa ʻEletā Hāleki ʻi Sānuali 1949 ʻi Haʻamoa ʻAmelika. Naʻe ʻave ia ʻe heʻene ongomātuʻá, ko ʻOto mo Tolofī Haleki ke ako ʻi Kalefōnia, ʻAmelika. ʻI hono taʻu 17, naʻá ne fakatokangaʻi naʻe kehe ʻa e fānau ako ia ʻe niʻihi ʻi he kau ʻōfisa ʻo e ʻapiakó mei he niʻihi. ʻOku pehē ʻe ʻEletā Haleki, “Naʻa nau fakaafeʻi au ki he Mutualé, pea ʻoku mou ʻilo pē hono hoko atú.”

Naʻe maʻu e mataʻitohi BA ʻo ʻEletā Hālekí ʻi he tuʻuakí mo e fakamāketí mei he ʻUnivēsiti Pilikihami ʻIongí. ʻOku ʻi ai ʻene ʻū pisinisi ʻi Haʻamoa ʻAmelika pea ʻoku kau ʻi he ngāue tokoni ki he faʻahinga ʻo e tangatá. Naʻe mali ʻa ʻEletā Haleki mo hono uaifi ko Peki ʻAna Kameloní ʻi he ʻaho 29 ʻo Sune 1972, ʻi he Temipale Polovo ʻIutaá. ʻOku toko tolu ʻena fānaú.

Naʻe ʻiku ʻo kau kotoa e fāmili ʻo ʻEletā Hālekí ki he ongoongoleleí. Naʻe maʻu ʻe ʻEletā Haleki ʻa e faingamālie ke ne papitaiso ʻene tangataʻeiki taʻu 80 pea sio ki he foki ʻene faʻeé ʻo mālohi he Siasí hili ia ʻene nofo mali ʻi ha taʻu ʻe 50.

Kimuʻa pea uiuiʻi ʻa ʻEletā Haleki ki he Kōlomu hono Ua ʻo e Kau Fitungofulú, naʻá ne ngāue fakafaifekau taimi kakato ʻi he Misiona Haʻamoa ʻApiá, hoko ko e pīsope, aleaʻanga māʻolunga fakasiteiki, pēteliake, palesiteni fakasiteiki, pea fakamuimuitahá ko e palesiteni ʻo e Misiona Haʻamoa ʻApiá.

ʻOku tui ʻa ʻEletā Haleki kuo ʻomi ia ʻe he ngaahi meʻa kotoa kuó ne aʻusia ʻi heʻene moʻuí ki he tuʻunga ʻokú ne ʻi ai he taimi ní. ʻOku pehē ʻe ʻEletā Hāleki, “ʻOku ou vakai ki heʻeku moʻui he kuo hilí, pea ʻoku lava pē ke u pehē ʻoku ou mamata ki he kaunga ki ai e toʻukupu ʻo e ʻEikí. ʻOku ou fakamālō mo lāngilangiʻi ʻi he falala mai ʻa e ʻEikí. ʻOku ou ʻofa ki he ʻEikí peá u ʻamanaki te u hoko ko ha meʻangāue lelei. ʻOku ou ʻilo ʻe tokoniʻi au ʻe he ʻEikí.”