ʻEletā Larry Y. Wilson
ʻO e Kau Fitungofulú
Ko ha tukupā ia kia ʻEletā Leli ʻIongi Uilisoni ke ne ʻai ke potupotutatau ʻe ngaahi fie maʻu ʻa e ngāué, Siasí, mo e ngaahi fatongia fakafāmilí, ka kuó ne ʻosi fakapapauʻi ʻoku ʻiloʻi ʻe kinautolu ʻi hono fāmilí ʻa honau mahuʻinga kiate iá.
ʻOku pehē ʻe ʻEletā Uilisoni, “Ko e meʻa ʻaonga taha kuó u aʻusiá ʻa ʻeku hoko ko e husepāniti mo e tamaí. Naʻe tātātaha pē ke u tō ʻi ha faʻahinga sipoti, koniseti hiva, pe ha toe meʻa pē naʻe kau ki ai ʻeku fānaú. Naʻá ku lau kiate kinautolu e fanga kiʻi talanoa ka nau toki mohé pea mau lotu fakataha mo kinautolu he poʻulí pea toki ʻai honau kafú. ʻOku fuʻu mahuʻinga ke te ʻi ai.”
ʻOku ʻiloʻi lelei pē ʻe ʻEletā Uilisoni ʻa e ngaahi fie maʻu mei ha taha ʻoku ʻi ai hono ngaahi fatongia fakatakimuʻa ʻi he tapa kotoa pē ʻo e moʻuí. Naʻe fāʻeleʻi ia ʻi Tīsema 1949 ʻi Sōleki Siti ʻi ʻIutā, ʻi ʻAmelika, kia Siaosi mo ʻAita Uilisoni peá ne tupu hake ʻi Pokatelo ʻi ʻAitahō, ʻi he USA. Naʻe maʻu hono mataʻitohi BA ʻi he ngaahi talanoa (literature) mei Pilitānia mo ʻAmeliká mei he ʻUnivēsiti Hāvatí, pea mo hono MA kimui ai ʻi hono puleʻi ʻo ha pisinisi, mei he ʻApiako Fakapisinisi ʻo Sitenifōtí.
Naʻe ngāue ʻa ʻEletā Uilisoni ko e faifaleʻi mo e pule ʻi he tafaʻaki ki hono tokangaʻi ʻo e moʻui leleí. Neongo naʻe lahi ʻene femoʻuekina ʻi heʻene ngāue maʻuʻanga moʻuí, ka naʻá ne fakapapauʻi he ʻikai te ne puleʻi ʻene moʻuí.
ʻOkú ne pehē, “ ʻOku fie maʻu ke ke fokotuʻu ha ngaahi ʻā fakangatangata takai ʻi hoʻo ngāué. Ka ʻikai, te ne maʻu ʻe ia e taimi ʻo e ngaahi meʻa kehe kotoa pē. Kuo pau pē ke fetongitongi hono tuku fakatatali ʻo e ngaahi tafaʻaki fakangāué, siasí, mo e taimi ʻa e fāmilí. Lotu ke tataki koe pea te ke ʻiloʻi ai pe ko e fē meʻa ke fakamuʻomuʻa ʻi ha ʻaho paú.”
Naʻe ngāue faivelenga ʻa ʻEletā Uilisoni ʻi heʻene hoko ko ha faifekau ʻi he Misiona Palāsila Lotolotó pea ʻi heʻene hoko ko e pīsope, palesiteni fakasiteiki, mo e Fitungofulu Fakaʻēlia pea toki uiuiʻi ia ki he Kōlomu hono Ua ʻo e Kau Fitungofulú.
ʻOku tokoni ʻa e uaifi ʻo ʻEletā Uilisoní, ʻa Linitā Meki Uilisoni ʻa ia naʻá na mali ʻi he ʻaho 10 ʻo Siulai 1974 ʻi he Temipale Lōkani ʻIutaá, ke maʻu ʻa e tuʻunga potupotutatau mahuʻinga ko iá ʻi he ngāue kotoa pē ʻokú ne faí. Naʻá na ʻohake ha fānau ʻe toko fā.
ʻOku pehē ʻe ʻEletā Uilisoni, “ ʻI he taimi kotoa pē naʻá ku ʻalu ai ki he ngaahi fakataha faka-Siasí, te ne pehē mai, “ ʻAlu ā. ʻAlu ʻo fai e ngāue ʻa e ʻEikí.’ Naʻá ne akoʻi ki heʻema fānaú ʻa e ʻuhinga loloto ange ʻo ʻeku ngāué. Ne ʻikai fuoloa kuo nau pehē mai, ‘ ʻAlu ā tangataʻeiki. ʻAlu ʻo fai e ngāue ʻa e ʻEikí!’”