ʻEletā Kazuhiko Yamashita
ʻO e Kau Fitungofulú
Talu mei he hoko ʻa ʻEletā Kasuhiko ko ha pīsope kei talavou ʻi Fukuoka, ʻi Siapani he ngaahi taʻu lahi kuo hilí, mo ʻene ako mei he ngaahi faʻifaʻitakiʻanga mo e ʻulungāanga lelei ʻo hono kau taki ne matuʻotuʻa angé.
Ne ʻikai fuoloa mei he mali ʻa ʻEletā Iamasita mo hono uaifi ko Tasuko Tasiló, kuó na hiki leva mei Tōkiō ki Fukuoka, ʻa ia ne uiuiʻi ai ʻa ʻEletā Iamasita ko ha pīsope ʻi hono taʻu 20 tupu lahí.
ʻOku pehē ʻe ʻEletā Iamasita, “Naʻe faingataʻa ʻeni kiate au mo hoku fāmilí. Naʻe toko tolu ʻema kiʻi fānaú he taimi ko iá peá ma foʻou atu ki he feituʻú—ka ko ha ako lelei ia kiate au, pea naʻe toe mālohi ange ai ʻeku fakamoʻoní mo ʻeku tuí.”
ʻOku pehē ʻe ʻEletā Iamasita, “Ko e moʻoni, ko ha taimi faingataʻa ia kiate au, he naʻe kei iiki ʻeku fānaú pea ʻikai ke lahi ʻeku taukei fakataki kimuʻa ʻi he Siasí. Naʻe hoko ʻeku kau taki matuʻotuʻa angé ko ha faʻifaʻitakiʻanga lelei pea nau akoʻi ha ngaahi lēsoni lahi kiate au ʻi heʻenau tōʻongá mo honau ʻulungāangá.”
ʻOku pehē ʻe Sisitā Iamasita kuó ne mamata ʻi hono tali ʻe hono husepānití ha ngaahi uiuiʻi lahi peá ne hoko ko ha tamai lelei mo ha taki fakalaumālie lelei ʻi he ngaahi faingataʻa ko ia naʻe ʻomi ʻe he ngaahi fatongia ko iá. Naʻe aʻu ki ha taimi naʻá ne mamata ai ki heʻene liliu ʻo angaʻofa ange, hoko ko ha tamai mo ha husepāniti ʻofa ange. ʻOku fiefia ʻa e fāmilí he taimi ʻoku nau fakataha aí, kau ai ʻenau fononga meʻalele ʻo ʻeveʻeva ki ha ngaahi feituʻu mamaʻo ʻi he taʻu kotoa pē.
Naʻe fāʻeleʻi ʻa ʻEletā Iamasita ʻi Sepitema 1953, pea ko e foha ia ʻo Kiosi mo Satei Iamasita. Naʻá ne tupu hake ʻi Tōkiō ʻi Siapani, peá ne ʻilo ai ki he Siasí ʻi he Fea ʻa Māmaní, ko e Expo 70.
Naʻe maʻu ʻe ʻEletā Iamasita hano mataʻitohi BA ʻi he akó mei he ʻUnivēsiti Saitamá, mo ha MA ʻi he saienisi ʻo e sipotí mei he ʻUnivēsiti Sukupá. Naʻá ne ako foki ki he ʻilo fakafilōsefa ki he fakamālohisinó ʻi he ʻUnivēsiti Pilikihami ʻIongí. Naʻe hoko ʻa ʻEletā Iamasita ko ha faiako mo ha palōfesa ʻi he ngaahi ʻunivēsiti lahi peá ne ngāue ʻi ha ngaahi kautaha fakasaienisi, fakakolo, mo e ngaahi kautaha sipoti.
Naʻe mali ʻa ʻEletā Iamasita mo hono uaifí ʻi he ʻaho 29 ʻo Māʻasi 1980, peá na sila ʻi Tīsema 1980 hili e kakato hono langa ʻo e Temipale Tōkiō Siapaní. ʻOku ʻi ai ʻena fānau ʻe toko ono.
Kimuʻa pea uiuiʻi ʻa ʻEletā Iamasita ki he Kōlomu ʻUluaki ʻo e Kau Fitungofulú, naʻá ne hoko ko ha pīsope, aleaʻanga māʻolunga, palesiteni fakafaifekau fakasiteiki, palesiteni fakasiteiki, mo e Fitungofulu Fakaʻēlia.