ʻEletā LeGrand R. Curtis Jr.

ʻO e Kau Fitungofulú

ʻOku ʻiloʻi ʻe ʻEletā Likuleni Leini Kētisi ko e Siʻí, “ ʻoku fie maʻu ʻe he ʻEikí ʻa e loto mo e ʻatamai fie faí” (T&F 64:34).

ʻOku pehē ʻe hono uaifi ko Sēini Koueni Kētisí, ʻa ia naʻá na mali ʻi he Temipale Sōlekí ʻi he ʻaho 4 ʻo Sānuali 1974, “ ʻOkú ne manako he ngāue ʻi he Siasí, pea ʻokú ne fakahoko ʻaki ia ʻene ngāue mālohi mo e ʻulungāanga loto fiemālie. Ko ʻene fakaʻamu mo e fakaʻānaua lahi tahá ia ke tokoni.”

Naʻe fāʻeleʻi ʻa ʻEletā Kētisi ʻi ʻAokosi 1952 ʻi ʻOkiteni, ʻIutā, ʻi he USA, kia Likuleni E. mo Petulisa Keleiti Kētisi. Naʻe hoko ʻene tamaí kimui mai ko e mēmipa ʻo e Kōlomu hono Ua ʻo e Kau Fitungofulú (1990–95).

Kimuʻa pea uiuiʻi ʻa ʻEletā Kētisi ko e Siʻí ki he Kōlomu ʻUluaki ʻo e Kau Fitungofulú, naʻá ne ngāue ʻi he Misiona ʻĪtali Noaté pea hoko ko ha pīsope, aleaʻanga māʻolunga, palesiteni fakasiteiki, palesiteni ʻo e Misiona ʻĪtali Patová, mo e Fitungofulu Fakaʻēlia. Naʻá ne hoko ko e mēmipa ʻo e Kōlomu hono Nima ʻo e Kau Fitungofulú ʻi he ʻĒlia ʻIutā Sōleki Sití ʻi he taimi naʻe uiuiʻi ai ia ki he Kōlomu ʻUluakí.

Naʻe ʻosi ʻa ʻEletā Kētisi mei he ʻUnivēsiti Pilikihami ʻIongí mo hono mataʻitohi ʻi he ʻekonōmiká pea maʻu hono mataʻitohi toketā laó mei he ʻUnivēsiti ʻo Misikení. ʻI he taimi naʻe uiuiʻi ai iá, naʻá ne ngāue fakaloea pea kau atu ki ha kautaha lao. Makehe mei he akó mo e ngāué, naʻe ʻohake ʻe ʻEletā Kētisi mo hono uaifí ha fānau ʻe toko nima.

Hili e ngāue ʻa ʻEletā Kētisi ko ha Fitungongofulu Fakaʻēlia mei he 2004 ki he 2011, ʻokú ne pehē naʻe hounga kiate ia ʻa e faingamālie ke ngāue fakataha mo e Kau Taki Māʻolungá. “Kuó u monūʻia ke ngāue mo ha kau takimuʻa taʻe-hano-tatau ʻi he Siasí. Ko ha faingamālie maʻongoʻonga ia ʻeku mamata mo ako meiate kinautolú.”

ʻOku pehē ʻe Sisitā Kētisi naʻe maʻu maʻu pē ʻe ʻEletā Kētisi ha ongo nima mo ha loto fie ngāue. “ Naʻe peheni maʻu pē ʻene tōʻongá, ‘Te u fai ia.’”

ʻOku fakaʻosi ʻaki ʻe he Tokāteline mo e Ngaahi Fuakava 64:34 ʻa e ngaahi leá ni: “ ʻE kai ʻa e ngaahi meʻa lelei ʻo e fonua ko Saioné ʻe he kau loto fie faí mo e kau talangofuá ʻi he ngaahi ʻaho fakaʻosi ko ʻení.” ʻOku pehē ʻe Misa mo Sisitā Kētisi kuo faitāpuekina lahi kinaua mo ʻena fānaú pea mo e makapuná ʻi heʻenau tauhi ki he ʻEikí.