O Se Tatalo mo le Saogalemu
“Ou te talanoa i le Tama Faalelagi. E faafofoga ma tali mai pe a ou tatalo i le faatuatua” (“I Pray in Faith,” Children’s Songbook, 14).
Ou te fiafia i mea o le natura! Ou te fiafia e faalogo i le pepese o manufelelei, le gasē o laulaau i le savili, ma le fafati mai o galu o le sami.
O nisi taimi e o ai lo’u aiga i le matafaga faatasi ma isi aiga. E taalo volipolo tamā, ae nofonofo tina i lalo o faamalu ma taaalo ai ma tamaiti laiti.
I se tasi aoauli sa matuai ou fiafia lava ina ua matou taunuu atu i le sami! Sa malu le sami, ma sa i ai ni nai vaivai laiti sa to’ato’a solo i le matafaga. Sa ou momoe atu i le sami. Sa ou fia aau e pei o se i’a ma ao mai atigifigota.
“Aua e te alu mamao, Sueli!” o le valaau mai lea a lo’u tina a o ia faapotopotoina atu tamaiti laiti i lalo o le paolo o le faamalu.
“Ua lelei, Tina.” sa ou fai atu ai ao sua e o’u tamatamaivae le oneone susu.
Sa ou sueina ni atigifigota ma iloilo ni meaola laiti i auvai o le matafaga. A o ou maulu atu i se tasi o auvai, sa ou toe tilotilo mai i tua i lo’u aiga. Sa mamao lava le mea na ou iloa mai ai faamalu. Na ou iloaina ua mamao tele la’u alu. Sa ou taumafai e toe aau mai i le matafaga, peitai ua sua le tai. Sa faasolo ina loloto tele ia le vaega sa ou i ai, a o ou taumafai e aluese mai ai.
Sa amata ona ou le lava, ma sa ou iloaina ua ou i ai i se tulaga lamatia. Na pau lava le mea sa ou mafaufau i ai o le maua mai o se fesoasoani mai le Tama Faalelagi. Sa ou tatalo i lo’u mafaufau. O le taimi lava na uma ai la’u tatalo, na tago mai ai se lima ma toso atu a’u i le saogalemu. O se tasi o uo a lo’u tama. Ou te faafetai ona sa tali mai le Tama Faalelagi i la’u tatalo ma faaloaloa mai Lona aao e ala i le auina mai o se tagata e fesoasoani ia te au.
O le isi taimi na matou o atu ai i le sami, sa ou faifai mea latalata atu i lo’u aiga, e pei lava ona mafai ona ou faalatalata atu i le Tama Faalelagi e ala i le tatalo.
Ata na tusia e Roger Motzkus