O La Tatou Itulau
Auauna Atu i le Tasi ma le Isi
Ua ou iloa ua talosagaina i tatou e Peresitene Thomas S. Monson e auauna atu i isi tagata. I se aoauli o se tasi Aso Sa, sa ou manao ai e asiasi atu i lo’u tinamatua, o lē e nofo toatasi, ma sei o ma momoe ma tafafao. Sa faatagaina au e lo’u tina, ma sa matuai tei ma fiafia lo’u tinamatua ina ua vaai mai ia te au. Sa ma talanoa, ma fai sina meaai māmā, ma ma matamata faatasi i le Liahona. Ina ua uma le ma lotu, sa ma o loa e momoe.
I le aluga o le po, sa oso ai se matagi malosi—savili, uila, faititili, timuga, ma timu aisa! Sa faapea ona ma feala ai, ma sa fai mai lo’u tinamatua, na semanu e matuai fefe lava o ia pe ana ou le i ai iina. Sa ou fiafia i le mafai ona ou auauna atu i lenei auala.
Vinício R., 10 tausaga, Pasila
O Le Malumalu o Sate Leki, na saunia e Eve D., 4 tausaga, Iukureini
O Se Tamaitai Faifeautalai i le Faatafafa Lanumumu, na saunia e Emile D., 9 tausaga, Iukureini
O Mia Lynn L., e 5 tausaga, mai Siamani ua aoao nei e avea ma se faifeautalai. A o la aai ma se tasi o ana uo i se tasi aso, sa fai ai e Mia se lotu e faamanuia ai meaai, o lea na faaosofia ai le tina o lana uo e fesili atu ia Mia e uiga i talitonuga faale-Lotu. O le taimi nei, e ono valaaulia e Mia ia lana uo i le Peraimeri.
E Faafofoga Mai le Tama Faalelagi i a Tatou Tatalo
Ou te faatuatua tele ia Iesu Keriso ma i Ana poloaiga, ae o le mea silisili, i le tatalo. I se tasi o Aso Sa sa ma asiasi atu ai ma le tama o lo’u tama i lo’u tina matua. Sa ou filifili e ave la’u tamai maile. Ina ua matou toe foi mai, sa so’a e se tamaitiiti i lana uila la’u tamai maile. Sa matuai fefe ai o ia, ma momoe atu e tuli le tamaitiiti. Sa ma taufetuli atu ma lo’u tamamatua e pue mai o ia, ae ma te le’i mauaina. O lea na ma o ai i le fale e aunoa ma ia. Sa matou faanoanoa uma lava. Sa valaau mai lo’u tinamatua ma fai mai e vaai se nofoaga lilo ou te tatalo ai mo la’u tamai maile.
O le taeao po lava o le aso na sosoo ai, sa matou faalogoina ai se ou a se maile—ua i ai la’u tamai maile i le fale! Ua ou iloa sa faafofogaina e le Tama Faalelagi la’u tatalo.
Stephanie P., 8 tausaga, Honetura