Matelaina mo le Upu i Ekuatoa
“Amuia i latou uma o e e fia aai ma fia feinu i le amiotonu, aua o le a faatumuina i latou i le Agaga Paia” (3 Nifae 12:6).
Sa faalagolago atu Ana Visbicut i se laupapa i fafo o lona fale ma se ataata i ona foliga. Sa latou saofafai faatasi ma lana fanau i se nofoa laupapa umi, ma sa foliga fiafia foi i latou e faapei o ia. O se aoauli mafanafana, ma le la i le Aso Toonai. Sa nofo Ana i Puerto Francisco de Orellana, o se tamai nuu i le togavao o Ekuatoa i sasae. Na asiasi mai mo sina taimi puupuu le au peresitene o le Paranesi o Orellana, ma na faalavelave faafuasei ai i le talanoaga a Ana ma tamaitai faifeautalai, peitai e le afaina lea ia te ia. Sa fiafia o ia i le asiasiga. E tele mea e faafetai ai ma na tuuina atu ma le saoloto lana faafetai.
E le faapea e leai foi ni faafitauli a Ana ia. E nofo na o ia ma lana fanau laiti e toalima. O le mauaina o se galuega i aso uma e faigata. Ma ina ua papatisoina o ia ia Aokuso 2009, sa na o le toatasi o lana fanau sa papatisoina faatasi ma ia.
Ae i le aluga o le tausaga na sosoo ai, na oo mai ai faamanuiaga ina ua mulimuli atu le isi toatolu o lana fanau i ana faataitaiga ma papatisoina ma faamauina (e toatasi na laitiiti tele i lena taimi).
Ioe, na susulu foliga o Ana i le agaga faafetai. Sa ia mauaina, faapei foi o isi tagata o le Paranesi o Orellana, le fiafia moni lea e oo mai i le ola ai i le talalelei a Iesu Keriso.
O Le Fiafia e Amata i le Manao
E lei i ai se faalapotopotoga aloaia a le Ekalesia i Puerto Francisco de Orellana, ia Tesema 2008. I lena taimi, sa i ai se fuainumera o tagata na nonofo ai iina, o nisi o i latou e lei auai i le lotu mo le tele o tausaga.
Peitai na i ai se mea na tupu. Na pai atu le Agaga i loto ma suia ai olaga, ma musuia ni aiga se toafa ina ia amata ona faapotopoto faatasi e suesue i tusitusiga paia ma aoao e le tasi le isi. Ma o lenei lagona, ua lofia ai le nuu atoa e oo mai i le taimi nei.
“Ua matelaina ma galala tagata iinei mo le talalelei,” na fai mai ai se tagata o le paranesi o Fanny Baren Garcia.
Na uunaia e lenei matelaina ia tagata o le ekalesia i Puerto Francisco de Orellana ina ia faafesootai atu i le Ekalesia ma talosaga mo se faatagaga e fai ai le faamanatuga. “Matou te le i o atu ia i latou,” o le faamatalaga lea a Timothy Sloan, o le sa avea muamua ma peresitene o le Misiona a Ekuatoa Quito. “Sa latou valaau mai ia te au. O le manao e faatino na lagona—ina ia mulimuli i le valaaulia a le Faaola i le Tusi a Mamona atoa e faaaoga le faatuatua ia te Ia ma ia salamo—sa i ai lava iina. O se savali lena mo i tatou uma.”
Sa i ai foi se manaoga faapena i loto o i latou na siitia atu i Puerto Francisco de Orellana. I le amataga o Ianuari 2009, sa mafaufau ai Marco Villavicencio—o le peresitene o le paranesi i le taimi nei—ma lona faletua o, Claudia Ramirez, i se avanoa faigaluega e manaomia ai le masii atu i Puerto Francisco de Orellana mai lo latou aiga i Machala, i le isi itu o Ekuatoa.
Fai mai Peresitene Villavincencio, “O la’u fesili muamua lava, o le, ‘O i ai le Ekalesia iina?’ Sa matou talanoaina ma lo’u toalua ma lo matou aiga, ma sa matou tatalo ina ia iloa pe tatau ona matou siitia ese atu. O le taimi lava na oo mai ai le ofo a le galuega, sa ma iloaina sa i ai le Ekalesia i Puerto Francisco de Orellana. Sa matou siitia mai iinei ia Fepuari 2009, ae faatulaga ai le paranesi ia Setema na sosoo ai.”
O Le Olioli i le Auauna Atu
O le manao e o mai ia Keriso e tau lelei atu lava i se manao e auauna atu. O le talalelei a Iesu Keriso e suia uma ai i latou o e foai atu ma i latou o e taliaina. E tupu lenei faagasologa ala lua pe a faalotomaualaloina ia loto, tatalaina ia mafaufau, ma tuuina atu auaunaga. E telē se vaega o loo faatinoina e auaunaga i le tuputupu ae o le Ekalesia i Puerto Francisco de Orellana ma ua faamalosia ai i latou o e sa auauna atu.
“O le a so’u lagona e uiga i lo’u valaauga?” na fesili ai Clara Luz Farfán, o le na tofia ia Setema 2010 e auauna atu i le au peresitene o le Aualofa. “Fiafia, aua ou te iloa o le a mafai ona ou fesoasoani atu i isi uso e o mai i le lotu ma faamalolosia ia uso fou o e ua papatisoina.”
O lena lava lagona ua sosolo atu i loto o tagata o le paranesi. O Lourdes Chenche, o le peresitene o le Aualofa na fai mai, o le faamalolosia o uso e manaomia ai se taumafaiga, peitai o le taumafaiga o se mea lea o loo ia tuuina atu ma le fiafia: “I le avea ai ma se au peresitene ma ni sui auai o le Aualofa, matou te asia ia uso. Matou te faalatalata atu ia i latou pe a i ai ni o latou faafitauli. Matou te tuuina atu ia i latou ni meaai pe a manaomia. Matou te ta’u atu ia i latou e le o tuua na o i latou, o loo ia i tatou le fesoasoani a Iesu Keriso ma le paranesi. Ma e matou te aoaoina i latou e tatau ona fai le latou vaega—tatalo, suesue i tusitusiga paia, ma saunia i latou lava. Matou te tatalo faatasi ma i latou, matou te faamafanafana ia i latou, ma e matou te alolofa tele ia i latou.”
Peitai e le na o uso e faia le galuega. “Matou te talanoa faatasi ma le peresitene o le paranesi e vaai po o le a se mea e mafai ona fai,” o le faaopoopo mai lea a Lourdes. “Matou te faasoa atu o latou manaoga ia te ia ma le aufono a le paranesi ina ia mafai ona matou filifili i mea e tatau ona fai.”
O le tautinoga faamaoni a uso e faia le latou vaega o se lagona lea ua masani ai i le paranesi atoa. I se tasi o auaunaga faatino na fesoasoani ai i se aiga o le paranesi, “sa matou auai uma,” o le tala lea a Lourdes. “O tamaiti, le autalavou, o tagata matutua, le Aualofa, o faifeautalai. Na tele lava se aoga o le aafiaga. Ou te iloa pe a tatou ‘auauna atu i o [tatou] uso a tagata, ua na o lo [tatou] auauna atu lava lea i lo [tatou] Atua’ [Mosaea 2:17]. Pe a ou auauna atu, e pei lava o loo ou faia mo Iesu Keriso. O le mea tonu lava lena e faatatau i ai le malo.”
O Le Olioli i le Faaaumea
O loo i ai se mea e le fesiligia le malosi e uiga i le lotogatasi, o lena lagona o le auai i se faalapotopotoga o le Au Paia. E oo mai faamanuiaga pe a avea i tatou ma “nuu faatasi ma le au paia, o le aiga foi o le Atua” (Efeso 2:19) ma e tatou te ola e pei o ni tagata o se aiga o e “loto e tauave avega a le tasi, ina ia mama; ioe, ma outou loto e faanoanoa faatasi ma e e faanoanoa; ioe, ma faamafanafana atu ia te i latou o e e manaomia le faamafanafanaga” (Mosaea 18:8–9).
Na faamalamalama mai e Fania, “Ou te talitonu o lo tatou malosi e maua mai i le mea moni e faapea, o i tatou o tagata O Le Ekalesia a Iesu Keriso o le Au Paia o Aso e Gata Ai tatou te lagonaina le pei o se aiga. Ma ou te lagona o le feauaunaai o le tasi i le isi ua sili atu le lelei ua tulai mai ai. Matou te tuuina atu soo se mea o loo manaomia, ma o lenei mea ua fatuina ai se lagona o le lotogatasi. Tatou te talia ma le fiafia soo se tagata fou e sau i le lotu. Tatou te faafeiloaia i latou. Ou te talitonu o se opo e faamatalaina le silia ma le afe o upu.”
Ua faamautinoa mai e aafiaga a Ana lena mea. I le avea ai ma se tina nofofua e toalima le fanau, sa feagai ai pea o ia ma luitau tau i le tamaoaiga o le taumafai lea e tausi lona aiga i le taimi ua tau le maua ai se galuega, ma o lena taumafaiga e mafai ona faavaivaia ai faalelagona ma faaleagaga. O le faaaumea a tagata o le paranesi sa avea lea ma se sao taua i lona aiga i taimi faigata. “Sa o mai tagata o le au paia ma fai a matou faitauga tusitusiga paia,” o le tala lea a Ana. “Sa latou vaavaaia au. Pe a matou tauivi ma faigata, sa latou i ai iina. E matua taua lava lena mea i tagata fou o le au paia.”
O lenei lagona o le faaaumea o se vaega lea o le mafuaaga ua vave ai le tuputupu ae o le paranesi. Mai le 28 tagata i lona Aso Sa muamua, na faatupulaia le paranesi i le 83 o tagata auai i le na o le tasi le tausaga mulimuli ane, e aofia ai ni tagata asiasi e toatele e le auai i la tatou tapuaiga.
Sa faaaluina e taitai o le paranesi le Aso Toonai ao lei oo i le latou konafesi faaleparanesi, e asiasi ai i tagata o le ekalesia ma i latou o loo sailiili i le Ekalesia. Sa latou faasoa atu ia i latou ni mau, ma faamalosiau atu ia i latou ina ia avea ma ni tagata sili atu.
O se tasi o tuagane na papatiso talu ai nei na liliu mai ona o le suesueina o tusitusiga paia—o lona faitauina na o ia ma le faitau faatasi ma tagata o le paranesi ma faifeautalai. “O le Tusi a Mamona o le ki lea,” na ia fai mai ai. “O le ki lea mo au.” Ua ia maua le fiafia i le Ekalesia. E matua malosi le toso a le Ekalesia, na amata lava ona ia totogiina le sefuluai a o le i papatiso o ia.
Peitai o faauoga e oo i talaatu o le faasoa atu o le talalelei i isi. E mafai ona suia ai se auala e ola ai.
“Ae ou te lei auai i le Ekalesia,” o le tala lea a Bernabé Pardo, o le isi lea tagata na liliu mai talu ai nei, “na pau au uo sa i ai na o i latou ia na mafai ona matou o e fai inugapia. Peitai i le taimi nei ua avea ai au ma se tagata o le ekalesia, ua tele au uo—uo moni. Latou te valaaulia au matou te faitauina faatasi le Tusi a Mamona. Latou te valaaulia au e auai atu i afiafi faaleaiga. Latou te feauaunaai le tasi i le isi. Sa matou o faatasi e faatino galuega fesoasoani. Ua matua ese lava lo’u olaga i le taimi nei. Ua ou maua le anoanoai o faamanuiaga. E totogi au sefuluai, ma ua faamanuiaina au e le Alii.”
O se ituaiga olaga e le faapea ua faatapulaaina mo na o tagata matutua. “Matou te aoaoina i taimi uma ia tamaitai talavou e uiga i le malosi o le faaaumea, i le faatalofa atu ma faaauai isi,” o le tala lea a Claudia Ramirez. “A taunuu mai tagata i le lotu mo le uluai taimi, o le mea latou te lagona ai le faagaeetia o le auala lea e faafeiloai ai i latou. O lea la matou te aoaoina ai tamaitai talavou i le taua tele o agaga taitasi i le Alii. Ua avea lenei mea ma fesoasoaniga tele. Ma e matou te faatutuina faatasi ma tamaitai talavou ni sini mo le polokalama o le Alualu i Luma o le Tagata Lava Ia. O lenei mea e uunaia ai i latou ina ia mafai ona faasoa atu a latou faauoga i isi.”
Na faamatala e Peresitene Villavicencio e faapea “matou te taumafai e faatino le apoapoaiga a Peresitene Gordon B. Hinckley e faapea, o soo se tagata fou e liliu mai e manaomia le faafaileleina i le afioga lelei a le Atua, ia i ai se uo, ma ia i ai se tiutetauave.”1
O loo galue Ana o se fesoasoani lua i le au peresitene o le Peraimeri. O lana tama tama o Jorge o loo galue o se fesoasoani muamua i le korama a le au aoao.
“Matou te tuuina atu ia i latou se tiutetauave,” o le saunoaga lea a Peresitene Villavicencio, “o se avanoa lea e aoao ai i tofiga faaleautaitai, ma ia i ai se tagata e fesoasoani ia i latou i le faagasologa.”
O Le Olioli i le Suia
Mo Claudia, o le auauna atu i le talalelei na mafua mai i se tuputupu ae teisi o le to’a i lona loto. “Sa papatisoina au ina ua valu ou tausaga,” o le tala lea a Claudia. “Matou te auai e le aunoa i le lotu. Ae ina ua ou matua, sa ou vaai i le tele o faaipoipoga faaletonu. Sa ou mafaufau soo i ai, ma sa ou popole o le a le mafai ona ou faaipoipo aua o le a le manuia. Sa ou fefe ne’i tuuto atu lo’u ola i se tasi, o le matua faigata tele. Peitai ina ua ou foi mai i la’u misiona, sa lei toe tutusa ou mafaufauga. O le aoaoina atu o aoaoga faavae e suia ai oe.”
Na faauo Claudia ma Marco Villavicencio ao le i alu lana misiona. E lei leva ona foi mai, ae latou o ma nisi o a laua uo i le malumalu. Sa i ai se mea faapitoa na tupu ai. “Sa ou lagonaina e pei ua tali mai e le Alii a’u tatalo e faapea, o se alii lea e mafai ona ou faaipoipo atu i ai,” na faamatala mai ai Claudia. “Ua ou maua le faamanuiaga silisili o le mauaina o se toalua lelei.”
Olioli i le Ola Ai i le Talalelei
“O lo tatou fiafia e le faalagolago lea i mea faaletino,” o le tala lea a Oscar Reyes, e 15 tausaga, “ae e faalagolago i le auala o ola ai o tatou olaga. O le mafuaaga lena ou te tausia ai le aso Sapati ia paia, aua o se mea e fiafia ai le Atua. Ma o le mafuaaga foi lena o le a alu ai sau misiona ma o le mafuaaga foi lea ou te fiafia ai e auauna atu i isi.”
O le ola ai i le talalelei, ua maua ai e tagata o le Paranesi o Orellana le olioli moni. “Ua ou matuai fiafia lava,” o le faasoa mai lea a Lourdes. “E ui lava o loo ou matua mamao ese mai lo’u aiga, ae o loo i ai foi sou aiga iinei, o se aiga faaleagaga. E i ai sau molimau malosi e uiga i lenei galuega. Ou te iloa o loo soifua Iesu Keriso ma, afai tatou te usiusitai, o le a Ia faamanuiaina i tatou.”
O se olioliga o loo faapea ona lofia ai o latou olaga, e tusa lava po o a luitau e tauai atu e le olaga ia i latou. O le olioli lea e oo mai i le ola ai i le amiotonu.
Agavale: O Ana Visbicut ma lana fanau ua fiafia i le talalelei. Luga: O tagata o le Paranesi a Orellana o loo potopoto mo se konafesi a le paranesi i le 2010.
Lalo, agavale: Peresitene o le Paranesi o Marco Villavicencio ma lona faletua o, Claudia, ma le la tama tama. Lalo, taumatau: O Clara Luz Farfán ma nisi tagata o le paranesi o loo auai atu i se faeasaite.
O Peresitene Villavicencio ma nisi tagata o le au paia o loo asiasi atu ia Lourdes Chenche, o le peresitene o le Aulofa a le paranesi ma le faiaoga seminare.
Mai le agavale: O Peresitene Villavicencio ma Bernabé Pardo, o se tagata faatoa liliu mai; sauniga a le Aualofa; O Fanny Baren Garcia ma lona toalua o, Ricardo, ma le la fanau; Vasega o le Mataupu Faavae o le Talalelei.
Ata na pueina e Joshua J. Perkey