E Talia Oe i Lo’u Fale

Carina Daniela Paz, Salta, Atenitina

Sa valaauina au ia Novema 1997 e faamisiona i le Misiona a Chile Concepción ma o le a vave ona faatino ai lo’u manao e alu atu i le malumalu ma maua ai le malamalama ma le poto atili. Peitai na amata ona faasoesa mai ni masalosaloga. I lou tulaga vaivai ma le le atoatoa sa ou i ai, pe sa ou agavaa moni ea e ulufale atu? Pe o le a faafeiloai moni ea a’u e le Alii i aao faaloaloa ae na tele taimi sa ou faatiga ai ia te Ia?

Sa ou faasoaina atu ou masalosaloga i lo’u peresitene o le siteki, ma sa ia fesoasoani ia te au ina ia ou malamalama, afai sa ou ola e tusa ai ma poloaiga ma sa ou matua taumafai moni lava e faia mea uma na aoaoina ai au, ua ou agavaa e ulufale atu i le maota o le Atua. Faatasi ai ma ni lagona lelei, sa ou alu loa i le nofoaga autu e aoao ai faifeautalai i Santiago, Chile. Ae peitai, na toe o ni nai itula oo i le taimi ou te alu ai i le malumalu, ae toe oo mai ou masalosaloga.

O le matagofie ma le filemu o totonu o le malumalu sa matua maoae lava, ma o le umi lava na ou i ai iina, o le tele foi lena o le taimi sa ou mafaufau ai pe na tatau ona ou i ai iina. Mulimuli ane, i totonu o le potu selesitila, sa foliga fiafia ma susulu tagata uma ae na ese ai lava au. Ae peitai, a o ou tago atu i le au o le faitotoa o le a ou alu i fafo, ae oo mai ia te au se lagona uiga ese, ma sa ou lagonaina e tatau ona ou nofo. Sa ou lagonaina foi na pei sa i ai se tasi i ou tua, o tuu mai se lima i lou tauau agavale ma faafaliu au. Sa ou faliu lemu.

Sa ou vaaia i luga o le puipui se ata lapoa o Iesu Keriso i Lona Toe Afio Mai Faalua ma o loo faaloaloa mai Ona aao. Sa le mafai ona ou minoi. Ona ou faalogoina lea ma le manino o upu ia i totonu o lou mafaufau: “E talia oe i lo’u fale.”

Na oo mai i lou tino atoa se lagona mafanafana, ma na amata ona maligi ou loimata. Na pau lava le mea na mafai ona ou mafaufau i ai sa na o le “Faafetai Lava.”

Mo ni nai minute, sa le mafai ona taofi lou tagi. Sa faatumulia lou loto i le agaga faafetai i lo’u Faaola. Sa ou lagonaina pea le vaivai ma le le atoatoa, peitai sa ou iloa e alofa o Ia ia te au ma o le a faamalosiau mai ia te au.

Ua tele tausaga ua mavae atu talu mai lena aafiaga, peitai o taimi uma lava ou te alu ai i le malumalu, e toe oo mai lava le fiafia o lena aso, faapena foi i na upu faamafanafana: “E talia oe i lo’u fale.”