Autalavou
Siomia i Aao o Lona Alofa
Atonu na faaletonu le ma mafutaga ma lo’u tama faalelalolagi, ae na faatasi mai lo’u Tama Faalelagi ia te au.
Na tetea ou matua, i le ono o ou tausaga. E ui sa faaauau pea ona ma nonofo ma lo’u tina, ae na i ai pea lo’u tama i lo’u olaga ina ua uma le teteaga. Sa ou nofo i lona fale i faaiuga o vaiaso ma mo se aso e tasi i le ogatotonu o le vaiaso.
E ui i ana taumafaiga e avea ma se tama lelei, ae ina ua fitu ou tausaga, sa ia aveesea lo’u faatuatuaina o ia i se tulaga matua matautia lava. O lenei tulaga o le le talitonuina na faailogaina ai le amataga o le faateleina o le mamao o le ma va. Pe a valaau mai i le fale, ou te aloese mai le taliina o le telefoni. Ina ua ou matua teisi a’e, sa ou poloaiina ina ia mafai ona ou filifilia le taimi ou te alu ai i le fale o lo’u tama, nai lo le faamalosia mai o lo’u alu e le faaiuga o le faamasinoga.
A o ou i ai i le aoga maualuga, sa amata ona faaitiitia a ma feiloaiga. Sa na o le faalua pe faatolu foi i le masina ona ou vaai ia te ia. Ina ua ou alu i le kolisi, na faateleina le uumi o taimi e telefoni mai ai, seia oo ina ta’i tasi i le semesa ona ma talanoa. Sa avea atili le ma mafutaga ma lo’u tama ma se tulaga o se mea masani nai lo o se sootaga moni a se matua ma sona atalii.
I lo’u tausaga lona lua i le kolisi, sa ou fuafua loa e talanoa ia te ia e uiga i le mea na tupu a o ou laitiiti na ou lagona na faataumaoia ai le ma mafutaga i le tele o tausaga ua mavae. Sa ou faamoemoe mo se faaleleiga, faamagaloga, ma se avanoa e toe amata ai. Sa ou i-meli atu ia te ia ou manatu ma faatalitali mo se tali mai.
Sa ou mauaina i se taimi mulimuli ane lana tali mai le i-meli. Ae ou te lei faitauina le tali a lo’u tama, sa ou tatalo ma aioi atu i le Tama Faalelagi ina ia faatasi mai Lona Agaga ao ou faitauina le i-meli. O se taimi taua lea i lo’u olaga—ma o le a ou iloa ai se tala o le a fai mai e lo’u tama ma po o fea foi le itu o le a agai i ai le ma mafutaga. Sa ou fefe ma lagona le matuai tuuatoatasi lava.
Ioe sa na o a’u lava, sa ou nofonofo i totonu o lo’u potu ma la’u komepiuta. Sa ou manaomia se lagolagosua. Sa faaauau pea ona ou tatalo i le Tama Faalelagi ma lagonaina Lona Agaga. I se taimi mulimuli ane sa ou maua ai le lototele e faitauina.
Sa tali mai lo’u tama i se i-meli matua puupuu lava ma na ia faafitia ai se manatua o le mea na ou fai atu ai ma fai mai o se taimi matua le lelei lea mo ia e talanoa ai i mea ua tuanai.
O le auala na ia teena ai se mea sa matua taua lava ia te au ma na foliga mai e le manao i soo se ituaiga faaleleiga, na ou matua tiga ai lava. Sa ou lagona le tuulafoaia e lo’u tama, ma sa lofituina i le faanoanoa ona o se ma mafutaga fesouaiina sa i ai mo le tele o tausaga.
Ao ou saofai i lou nofoa ma ou tagi masusu ai, sa ou lagona le Agaga. Ou te lei lagonaina muamua lava le matua malosi o le faatasi mai o le Tama Faalelagi. Sa ou lagona moni lava “ua siosiomia a’u e faavavau i aao o lona alofa” (2 Nifae 1:15). Sa ou lagona le faamautinoaga ma le alofagia a o ou nofonofo ai ma tagi.
Atonu na faletonu le ma mafutaga ma lou tama faalelalolagi, ae na faatasi mai lou Tama Faalelagi ia te au. E malosi lona faatasi mai i lo’u olaga. Ou te iloa e alofa o Ia ia te au, popole mo au, ma e finagalo pea e le aunoa ina ia ma mafuta. Ou te iloa o Ia o lo’u Tama. Ma e le alu ese lava o Ia.
Ata na tusia e Paul Mann