O Le Faatuatua i le AtuaE Le Tuua AiLava Na o A’u
“O loo molimau mai lea lava Agaga i o tatou agaga, o fanau i tatou a le Atua” (Roma 8:16).
“E le o tuua na o outou pe a outou faatuatua ia Iesu Keriso ma le Tama Faalelagi.” Sa ou faalogo muamua i nei fasifuaitau i le tele o taimi, ae ou te le i malamalama muamua i lo latou loloto e pei o le aso.
O soo se tagata e iu lava ina feagai ma le mea moni mautinoa e faapea, o le a oo mai se aso e ono tuua ai na o ia. Mo au la, ona o le tatalaga o se faaipoipoga, o ese atu o tamaiti, ma le vave litaea, na vave ai ona oo mai lenei aso nai lo le tulaga na ou faamoemoeina. O le faafitauli sili ona faigata na tatau ona ou foiaina, o le ola ai i lenei olaga filemu ma le gaogao ua vave ona oo mai ina ua mavae tausaga o ni taimi taua na faaaluina faatasi ai ma aiga ma uo, toalua ma le fanau, faapea ma uo faigaluega.
E ui sa ou fiafia i asiasiga a o’u faiaoga o aiga ma faiaoga asiasi faapea ma isi uo, ae o le tele o le taimi sa ou matua lagona lava le tuuatoatasi, ma e ou te le’i fiafia i ai. O le faifai pea o le lagona tuulafoaia, na iu ai lava ina le mafai ona taofiofia le tafe mai o loimata. Sa leai se mea ou te liliu atu i ai mo le faamafanafanaga sei vagana ai o ou tulivae i le tatalo.
Ina ua uma ona ou tagi atu i le Tama Faalelagi i se taimi umi lava, na amata ona i ai se suiga i totonu ia te au, ma sa ou lagona le Agaga o le Tama Faalelagi. Mo se taimi, na uma malie ai lo’u tagi ina ua ou malamalama atoatoa i Lona alofa na tuia ai lo’u loto. Sa ou iloaina sa Ia silafiaina lelei o’u faanoanoaga, ma sa le afaina ai lo’u saga tagi atu pea, e faapei o le tagi a se tamaitiiti na pau ma ua vaai atu i lona tina. A o taatia lo’u ulu i le mea sa ou vaai faalemafaufau i ai o aao o le Tama Faalelagi, sa ou iloaina sa naunau o Ia e faamafanafana ia te a’u po o le a lava le umi sa ou manaomiaina ai. Na i ai taimi, sa oo mai ai ni o’u mafaufauga pupuu e faapea, ua fai si o’u matua tele mo lenei ituaiga amioga. Ae peitai, sa ou iloaina sa le afaina i le Tama Faalelagi pe o le a lo’u matua po o le laitiiti foi. Ae sa ou iloaina sa malamalama ma o le a i ai pea o Ia iina mo a’u.
I le aso, e ui e sili atu lava ia te au lo’u faaipoipo, ae ua amata ona ou fiafia i le filemu. Ou te faalogologo i galu o le sami ma vaavaai i le goto ifo o le la. Ou te matua tu lava ma sosogi i le nanamu o rosa. Ou te faalogo ma galue e tusa ai ma le taitaiga a le Agaga. Ou te le fefe i le tuuatoatasi aua e le o tuua na o au pe a ou talitonu i le Tama Faalelagi ma Iesu Keriso. Ou te vaaia le Agaga o le Tama Faalelagi ma Iesu Keriso toetoe o mea uma ou te faia.
“E ala i le faatuatua ia Iesu Keriso ma le Tama Faalelagi, e le o tuua ai na o oe.” I le taimi nei, ua i ai se uiga moni ma le o’oo’o o na upu i le taele o lo’u loto, ma ua ou iloa e aunoa ma se masalosalo e le o tuua lava na o au. O a’u o Lona afafine, ma e alofa o Ia ia te au.
Ata na saunia e Robert Casey