Mai le Misiona
O Se Faatanoa Gaogao
E mafai faapefea ona tatou faia se papatisoga pe a leai se vai o le faatanoa?
O le 7:45 i le taeao, i se taeao timuga o Aokuso iinei i Freetown, Sierra Leone, Aferika i Sisifo. Sa matou (o faifeautalai faamisiona i le Itu o Freetown) fuafuaina se sauniga papatisoga ma sa matou naunau foi e faia, e tusa lava pe timu pe la. O le taimi lena sa ou maua ai se telefoni mai ia Uso Allieu, o se tagata o le matou paranesi, ae sa ou le malamalama lelei i le mea sa fai mai ai, ona sa vave tele lana tautala i le faa-Krio, o le gagana i le lotoifale. Sa ou fai atu i ai e manava tele i totonu ma sei tautala faagesegese. Sa ia faia, ma fai mai loa, “Elder Naeata, e leai se vai mo le faatanoa o le papatisoga. Faamalie atu. Ua leai se vai.”
Sa ou faafetai atu ia te ia mo le valaau mai ona ta’u atu lea o le tala faanoanoa i isi alii faifeautalai. Sa vave ona matou mafaufau pe o le a se auala e mafai ai pea ona matou faatinoina lenei sauniga paia. O le taimi lena sa faamanatu mai ai e Elder Agamah le afu ma le vaituloto e i luga o le mauga e lata i se nofoaga e ta’u o le Mellow. Sa malilie alii faifeautalai uma e tatau ona matou taumafai ma fai le papatisoga iina, o lea na matou maua ai le faatagaga e faia ai.
A o faatasitasi tagata uma i se taimi mulimuli ane i lena taeao i le auvae mauga, sa faafuasei ona iloa e le vaega le galuega faigata na faamalumalu mai luma. Ae peitai, sa leai se foliga o le musua o tagata e fetaomi atu i luma. Sa savavali ia alii ma tamaitai e oo lava i tamaiti ma talatalanoa fiafia a o savavali i luga i le alasopo susu ma le maseesee. Ina ua amata ona matou faaifoifo, sa matou ui atu i se auala ‘alo e sopoia ai le vaitafe.
A o matou savavali, sa amata ona fai atu le naunautai o nisi o le vaega ina ua amata ona tetele timuga, ae sa matou fetaomi atu pea i luma ma le faamoemoe. Ae sa foliga mai na le muta le auala gaoa. Mulimuli ane, sa matou taunuu atu i le nofoaga atofaina. Sa fiafia o matou loto, ae sa atili ai le maligi o timuga. A o matou sauniuni mo le sauniga o le papatisoga, sa matou lalafi mai le timuga i lalo o se mago tele lava.
Sa matou amata i le usuina o le viiga “O Le Agaga o le Atua” (Viiga, nu. 2). Ina ua uma le faigalotu amata, sa matou o atu loa i le nofoaga mo le papatisoga. Sa tafe mai le vai mai le afu i totonu o le vaituloto lea o le a matou faia ai le sauniga paia.
Sa alu atu se tamā i totonu o le vaituloto ma o le taimi lena, sa faafuasei ai ona uma le timu. Sa oso mai ave o le la i ao ma sulugia ai le vaituloto. Sa mafai ona matou lagonaina le i ai o le Agaga. Ina ua uma ona papatiso e le tama lona atalii, sa papatisoina loa e se tane lona toalua, ona papatiso ai lea e alii faifeautalai ia o latou tagata liliu mai. Sa faaauau ona susulu mai le la, na faapena foi i ataata o o matou foliga.
Sa matou faaiuina le sauniga i le usuina o le viiga “Mulimuli Mai, ia te A’u” (Viiga, nu. 62). Ioe, e moni, sa matou mulimuli ia te Ia. Sa matou mulimuli i lo tatou Faaola i luga ma lalo o le mauga, sopoia ni auvai tatafe, a’e i luga o auala tifato ma le susu, ma i le timu. Ma o i latou o e na papatisoina, sa mulimuli moni i le faataitaiga a le Faaola a o latou ulu ifo i le vai o le papatisoga.
Ata na tusia e Allan Garns