Aua Ne’i E Tafea Ese Atu
Ua talanoa mai se talavou Toga e uiga i mafuaaga lelei mo pa puipui.
O le matagofie ma le malolosi o pupu o Mapu ‘a Vaea i Toga e maoae lava. A o fati mai galu i lenei mafola e tolu maila (4.8 km) o le talafatai o le motu o Togatapu, e ulu atu i le faitau selau o ava i le papa mauga mu lea e feula maualuga ae ai le vai i se maualuga e 60 futu (18 m) i le ea.
O Saane F., e 16 tausaga, e fiafia tele i le manaia o le nofoaga—i le ala e sisiva faatasi ai le la ma le pasī o galu uma lava.
Ae peitai, o le malosi o le natura e mafai foi ona matautia toe matagofie. O tagata asiasi e sosoo latalata atu i ai, pe ona o le fia iloa lava pe ona o le ova o le fiafia, na maua e le malosi o galu sa le’i mafaufauina, ma le mafai ai ona sao mai le aave [o galu], ma tatoso atu ai i le sami.
O le itu matautia o Mapu ‘a Vaea ua ofoina mai ai se lapataiga faaleagaga e uiga i le malosi o faaosoosoga—ae maise lava e faatatau i le mama mai feusuaiga. O le mana e foafoa ai le ola e matagofie tele pe a faautagia ia tuaoi talafeagai, ae afai tatou te faatagaina faaosoosoga e faatosina ese atu i tatou mai eleele saogalemu, e iu ai ina tatou tafefea ese atu.
Malamalama i le Pogai e Afaina ai le Ola Mama
I le aso na faaipoipo ai lona uso i le Malumalu o Nuku’alofa Toga, sa mafai ona iloa atu e Saane lona fiafia. “Sa faapea ona ou manao ai foi ia ou agavaa e faaipoipo iina i se aso,” o le tala lea a Saane.
Ae peitai, o le a taumafai Satani e taofia mai le tupu o lena mea i soo se tasi o i tatou. Ua uma ona ia faatalitonuina le toatele e faapea, o feusuaiga militino i fafo mai o le faaipoipoga e taliaina ma e leai se mea e afaina ai. Peitai, o le faaaoga sese o le mana ua tuuina mai e le Atua e foafoa ai le ola o se agasala matuia lea e mafai ona mafua ai ona faataumaoia faaleagaga, faalelagona, ma le faaletino.1
“O loo taumafai malosi Satani e taofi i tatou mai le toe foi atu i lo tatou Tama Faalelagi,” o le tala lea a Saane. “Afai ou te le faaeteete ma tausi le tulafono o le ola mama, ou te ono le maua le avanoa e faaipoipo ai i le malumalu.”
Faamamaluina o Pa Puipui a le Atua
Ina ia fesoasoani i tagata asiasi ia fiafia ma le saogalemu i le matagofie o Mapu’a Vaea, ua tuuina ai e le malo o Toga ni pa puipui i ni eria faapitoa.
E talitonu Saane ua tuuina mai foi e le Tama Faalelagi ni pa puipui—po o tulaga faatonuina—e taofia ai i tatou mai le pauu atu i faaosoosoga. O taitai o le Ekalesia, o tusitusiga paia, ma le Mo Le Malosi o le Autalavou ua latou faatutuina uma ni tuaoi manino, ia, afai e usitaia, o le a fesoasoani tatou te saogalemu ai. Ae o le mea taua lava, o le mulimuli i uunaiga a le Agaga Paia o le a tatou tumau ai i eleele saogalemu.
“O nisi tagata latou te le amanaiaina ia pa puipui a le Alii,” o lana tala lea. “Latou te le malamalama i taunuuga, pe latou te manatu e mafai ona latou aloese mai ai. O le puna mai le pupu e ono pei o le lele, peitai e i ai lava i taimi uma iina le eleele.
Faatutuina o o Tatou Lava Pa Puipui
I mataupu e uiga i le mama mai feusuaiga, o le vaai pe o le a le mamao e mafai ona tatou lilifa atu ai i le pa puipui o se auala mautinoa lea e pau ai. O le latalata lava tatou te faatagaina ai i tatou lava e oo atu i feusuaiga militino le talafeagai, o le faigata foi lea ona tetee ana faatosinaga.
Talu ai e le mafai e le Ekalesia ona tau ta’u atu po o a gaoioiga e fai i tulaga uma lava, o lea ua fai ai e Saane ana lava pa puipui e ala i le filifili mamao i auala e faaaoga ai tulaga faatonuina o le talalelei i tulaga e ono fetaiai ma ia.
Ua ia faia se pepa lautele o loo i ai se savali e lisi ai ni folafolaga se iva ia te ia lava ma i lona Tama Faalelagi, lea e avea o ni ana pa puipui, e aofia ai ituaiga tagata o le a tafao faamasani i ai, lavalava o le a ia faia, ma gagana o le a ia faaaogaina. O isi pa puipui patino e aofia ai le filifili e aloese mai le matamataina, faitauina, po o le faalogologo i soo se mea e ono faaosofia ai lagona feusuai.2
“O le faatutu maualuga o o’u tulaga faatonuina, o le a fesoasoani ou te saogalemu ai,” o le tala lea a Saane.
Toe Foi Mai i le Eleele Saogalemu
E pei o i latou o e maua i le fati o galu i le Mapu’a Vaea, o i latou o e gauai atu i le faaosoosoga ua i ai i se nofoaga matautia. O le malosi o le taofiofi a le agasala o feusuaiga, e mafai ona faigata ona solaese ai—ae e mafai i le fesoasoani mai o le Faaola ma Ana auauna.
I le iuga, e tusa pe o se tagata e le’i aluese lava mai le eleele saogalemu pe na toe uia le auala faigata e toe foi atu ai i le eleele saogalemu, o le nofo ai iina o le sini lea. O le faamamaluina o pa puipui a le Alii ma le malamalama i le ala e faaaoga ai i o tatou tulaga patino, o le a saunia ai i tatou e olioli i le mana matagofie ua foai mai e le Atua ia i tatou—i le taimi e tatau ai ma i le ala e tatau ai.
“O le mea e sili ona taua, o loo ou tulimatai atu e faaipoipo i le malumalu,” na fai mai ai Saane. “Ua ou iloa, afai ou te tausia poloaiga, e aofia ai le tulafono o le ola mama, o le a ou agavaa e maua faamanuiaga o loo ou moemiti i ai.”
O Saane (taumatau) ma Amelia (ogatotonu) o loo fiafia ma lo laua uso o Manatu i le aso o lana faaipoipoga i le malumalu.
Ata na pueina e Adam C. Olson