O Le Alofa Mutimutivale o le Alii
Mai se saunoaga i le konafesi aoao ia Aperila 2005.
O le faatuatua, ma le usiusitai e mafai ai ona tatou maua nei meaalofa taua, ma, e tele taimi, e fesoasoani ai le taimi a le Alii tatou te iloaina ai.
Ou te tomanatu pea lava pea i le fuaiupu lenei mai le Tusi a Mamona: “Ae faauta, o a’u o Nifae, o le a ou faaali atu ia te outou le i ai o le alofa mutimutivale agamalu o le Alii i luga o i latou uma o e ua ia filifilia, ona o lo latou faatuatua, e faamalolosi tele ai i latou e oo lava i le mana e laveaiina ai” (1 Nifae 1:20).
Ou te molimau atu o le alofa mutimutivale o le Alii e moni ma e le soona tutupu pe faafuasei foi. E masani lava e oo mai le alofa mutimutivale o le Alii i taimi e fesoasoani ai ia te i tatou e tau fai iloatino ma taliaina ai.
O A Ia Alofa Mutimutivale o le Alii?
O le alofa mutimutivale o le Alii o ni faamanuiaga patino taitasi, o le malosi, puipuiga, mautinoa, taitaiga, alofa ma le agalelei, faamafanafanaga, lagolagosua, ma meaalofa faaleagaga tatou te maua mai i le Alii o Iesu Keriso, ma maua mai ona o ia, ma e ala mai foi ia te ia. E moni, e pei ona loto i ai le Alii “i le faatatau o ona alofa mutimutivale e tusa ma tulaga o le fanauga a tagata” (MF&F 46:15).
Manatu i le auala na aoaoina ai e le Faaola Ana Aposetolo, Na te le tuua lava i latou o matuaoti. E le gata o le a Ia auina mai “se tasi Fesoasoani” (Ioane 14:16), o le Agaga Paia, ae na fetalai foi le Faaola o le a i ai o Ia ia te i latou (tagai i le Ioane 14:18). Sei ou faamatalaina atu o se tasi o auala e afio mai ai le Faaola ia te i tatou taitoatasi, e auala mai lea i le tele o Lona alofa mutimutivale. Mo se faataitaiga, a o tatou feagai ma luitau ma tofotofoga i o tatou olaga, o le meaalofa o le faatuatua ma se lagona talafeagai o le mautinoa patino lea e sili mamao atu i lo tatou lava malosi, o ni faataitaiga na se lua o le alofa mutimutivale o le Alii. O le salamo ma le faamagaloga o agasala ma le filemu o le mafaufau, o faataitaiga na o le alofa mutimutivale o le Alii. Ma o le naunautai ma le lototele lea e mafai ai ona tatou fetuleni atu i luma ma le laufofoga fiafia e ui a i ni toatuga faaletino ma ni faigata faaleagaga, o faataitaiga na o le alofa mutimutivale o le Alii.
I se konafesi faalesiteki talu ai nei, sa molimauina le alofa mutimutivale o le Alii i le molimau faamomoiloto a se tina talavou e toafa lana fanau, ma o lona toalua lea na fasiotia i Iraq ia Tesema i le 2003. Sa taua e lenei tuafafine lototoa, ina ua uma ona logoina o ia i le oti o lona toalua, sa ia mauaina lana kata o le Kerisimasi ma se savali. I totonugalemu o se olaga ua matua ogaoga le suia faafuase’i, sa vave ona oo mai se faamanatu i lenei tuafafine lelei, e moni lava e mafai ona faavavau aiga. Ona ua ia faatagaina mai, o lea ou te faitauina atu ai lena faamanuiaga o le Kerisimasi:
“Mo le aiga silisili i le lalolagi! Ia outou maua faatasi se taimi sili, ma ia manatua le uiga moni o le Kerisimasi! O le Alii ua mafai ai ona tatou toe mafuta e faavavau. Tusa lava pe tatou te valavala, o le a faatasia pea i tatou o se aiga.
“Ia faamanuia atu le Atua ma puipuia outou uma ia saogalemu, ma ia avea lenei Kerisimasi e fai ma a tatou meaalofa o le alofa mai ia i tatou mo Ia i luga!!!
“Alofa tele atu, o Tamā ma lau tane faapelepele!”
E manino lava, o le ta’ua o le valavala e le tane i lana faamanuiaga o le Kerisimasi, o loo faasino i le valavala ona o lona tofiga i le militeli. Ae i lenei tuafafine, o se leo mai le efuefu, mai se soa faavavau ma se tamā ua malaga, ua aumaia ai se faamautinoaga faaleagaga sa matua moomia ma se molimau. E pei ona ou ta’ua muamua, e le tupu faafuasei le alofa mutimutivale o le Alii, pe ua na o se mea foi e te’i lava ua tupu. O le faatuatua, usiusitai, ma le lotomaulalo e oo mai ai le alofa mutimutivale i o tatou olaga, ma e masani lava, o le taimi a le Alii e mafai ai ona tatou iloa ma faapelepele i nei faamanuiaga taua.
I se taimi ua mavae, sa ma talanoa ai ma se taitai perisitua o lē sa musuia e taulotoina igoa uma o le autalavou mai le 13 i le 21 tausaga i lana siteki. O le faaaogaina o ata o alii ma tamaitai talavou, sa ia faia ai ni kata e tilotilo i ai pe a malaga faapisinisi po o nisi foi taimi. Sa vave ona iloa e le taitai perisitua igoa uma o le autalavou.
I se tasi po sa fai ai se miti a le taitai perisitua e uiga i se tasi o alii talavou, lea sa na o le ata na ia iloa ai o ia. I le miti sa ia vaai ai i le alii talavou o ofu sona ofutino paepae ma o loo i ai ma se pine o lona igoa faafaifeautalai. O loo aoao e ia se aiga, a o nofo lana soa i ona tafatafa. Sa uu e le alii talavou le Tusi a Mamona, ma sa foliga mai sa molimau atu o ia i le moni o le tusi. Ona ala ai lea o le taitai perisitua mai lana miti.
I se faatasiga na sosoo ai a le au perisitua, sa savali atu le taitai i le taulealea sa ia vaai i ai i lana miti, ma fai atu i ai la te talanoa mo sina minute. Ina ua la feiloai, sa ta’u atu e le taitai le igoa o le taulealea ma faapea atu: “E le o a’u o se faimiti. Ou te lei miti lava i se tagata e toatasi o lenei siteki, sei vagana ai oe. O le a ou faamatala atu ia te oe la’u miti, a uma ou te manao e te fesoasoani mai ia ou malamalama i lona uiga.”
Sa faamatala atu e le taitai perisitua le miti ma sa fesili atu i le taulealea i lona uiga. Sa tau mole i le tagi le taulealea ma sa na ona ia faapea atu, “O lona uiga e silafia e le Atua lo’u tagata.” Sa sili ona ‘anoa le talanoaga a lenei taulealea ma lona taitai perisitua, ma sa tonu ai o le a la feiloai mai lea taimi i lea taimi i masina na sosoo ai, la te talatalanoa.
Sa maua e lena taulealea le alofa mutimutivale o le Alii e ala i se taitai perisitua musuia. Ou te toe fai atu, e le tupu fua le alofa mutimutivale o le Alii pe faafuasei. O le faatuatua, ma le usiusitai e mafai ai ona tatou maua nei meaalofa taua, ma, o le tele o taimi, o le taimi a le Alii e fesoasoani tatou te iloa ai [le alofa mutimutivale].
E le tatau ona tatou manatu faatauvaa pe le amanaiaina le mana o le alofa mutimutivale o le Alii. O le faigofie, ma le lelei, ma le faamaoni o le alofa mutimutivale o le Alii, o le a matua aoga e faamalolosia ma puipuia ai i tatou i nei taimi faigata ua tatou ola ai ma o le a ola ai foi. A le mafai e upu ona maua ai le mafanafana tatou te manaomia pe faaali atu ai le olioli tatou te lagonaina, a le manuia le taumafai atu e faamatala se mea e le mafaamatalaina, a le mafai ona lava le malamalama e maua e le faavasegaga ma le mafuaaga e uiga i le le tonu o faamasinoga ma le tutusa o le olaga, a le lava le poto masani ma le iloiloga a le lalolagi e maua mai ai le taunuuga o loo naunau i ai, ma afai foi e foliga mai ua matua tuulafoaiina lava i tatou, e moni e faamanuiaina i tatou i le alofa mutimutivale o le Alii, ma e faamalolosi ai i tatou e oo lava i le mana o le faaolaina (tagai i le 1 Nifae 1:20).
O Ai ua Filifilia e le Alii e Mauaina Lona Alofa Mutimutivale?
O le upu filifilia i le 1 Nifae 1:20 e taulai i le malamalama i le manatu o le alofa mutimutivale o le Alii. O loo ta’u mai i le lomifefiloi o le filifilia e iloa ai se tagata ua filifilia, fiafia i ai, pe ua pikiina foi. E mafai foi ona faaaoga e faasino ai i le ua filifilia e le Atua.1
O nisi tagata ua faalogo pe faitau sese foi i lenei savali, e ono le maua i o latou olaga le alofa tunoa o le Alii ona ua talitonu “E mautinoa lava e le i filifilia a’u ma o le a le filifilia lava.” Tatou te ono mafaufau sese foi o na faamanuiaga ma meaalofa ua faapolopoloina mo isi tagata e foliga mai ua sili atu ona amiotonu, pe auauna atu foi i ni valaauga taualoa o le Ekalesia. Ou te molimau atu o loo avanoa le alofa mutimutivale o le Alii mo i tatou uma, ma o loo naunau foi le Faaola o Isaraelu e faaee mai na meaalofa i o tatou luga.
Ina ia filifilia pe avea ma se filifilia e le o se tulaga atoatoa ua tuuina atu i o outou luga. Nai lo lena, o outou lava ma a’u e iloiloina pe filfilia i tatou. Faamolemole ia matau le faaaogaina o le upu filifilia i fuaiupu ia:
“Faauta, e toatele e e valaaulia, ae toaitiiti e e filifilia. Ma aisea e le filifilia ai i latou?
“Aua ua pupu tele o latou loto i mea o lenei lalolagi, ma saili i viiga a tagata” (MF&F 121:34–35).
Ou te talitonu o loo tuusa’o mai lava le faatatauga o nei fuaiupu. E leai se lisi a le Atua o ni tagata e fiafia i ai, lea faapea tatou te faamoemoe e i ai se aso e faaopoopo atu i ai o tatou igoa. Na te le fuapauina “le au filifilia” i na o nai tagata. Ae, o o tatou loto ma lo tatou faamoemoe ma lo tatou usiusitai e iloa lelei ai pe o faitaulia i tatou o ni tagata filifilia o le Atua.
Sa aoaoina Enoka e le Alii i le vaega tonu lenei o le aoaoga faavae. Faamolemole ia matau le faaaogaina o le upu filifilia i fuaiupu nei:
“Faauta ia i latou nei o ou uso; o i latou o galuega a o’u lava lima, ma sa Ou tuu atu ia te i latou lo latou malamalama, i le aso na Ou foafoa ai i latou; ma sa Ou tuu atu i le tagata i le Faatoaga o Etena, lona faitalia;
“Ma sa Ou fai atu i ou uso, ma tuu atu foi le poloaiga, e tatau ona latou alolofa o le tasi i le isi, ma e tatau ona latou filifili a’u, lo latou Tama” (Mose 7:32–33; faaopoopo le faamamafa).
E pei ona tatou aoao mai i nei mau, o faamoemoega autu lava o le meaalofa o le faitalia, o le alofa o le tasi i le isi ma ia filifili le Atua. O le mea lea, ua avea ai i tatou ma tagata filifilia o le Atua ma valaauina ai Lona alofa mutimutivale a o tatou faaaogaina lo tatou faitalia e filifili ai le Atua.
O se tasi o fuaitau ua lauiloa ma e masani foi ona ta’ua, o loo maua lea i le Mose 1:39. O lenei fuaiupu o loo ma’oti ma manino mai ai le faamatalaina o le galuega a le Tama Faavavau: “Aua faauta, o la’u galuega ma lo’u mamalu lenei—ia aumaia le tino ola pea ma le ola faavavau o le tagata” (faaopoopo le faamamafa).
O loo maua foi se soāmau i le Mataupu Faavae ma Feagaiga, e tutusa lelei le manino ma le ma’oti o loo faamatala mai ai le tatou galuega autu o ni atalii ma afafine o le Tama Faavavau. E malie ona o lenei mau e foliga mai e le lauiloa ma e le ta’ua soo foi. “Faauta o lau galuega lenei, e tausi i a’u poloaiga, ioe, ma lou manatua atoa, mafaufau ma lou malosi atoa” (MF&F 11:20; faaopoopo le faamamafa).
O lea, o le galuega a le Tama o le faataunuuina lea o le faaofuina o Lana fanau i le tino ola pea ma le ola e faavavau. O la tatou galuega, o le tausi o Ana poloaiga ma o tatou loto atoa, mafaufau atoa, ma le malosi atoa—ona avea ai lea o i tatou ma tagata filifilia, ma tatou maua ai ma taliaina le alofa mutimutivale o le Alii i o tatou olaga i aso taitasi, e ala i le Agaga Paia.
Ua faamanuiaina i tatou i le mauaina o fautuaga musuia mai taitai o le Ekalesia a le Faaola—ua fetaui lelei fautuaga ma o tatou vaitau ma o tatou tulaga ma luitau. Ua aoaoina i tatou, ua faagaeetia, ma ua faamalamalamaina, ua fautuaina ia salamo, ma ia faamalolosia. E pei foi o outou, ua ou naunau e faaaoga mea ua faamanatu mai, o fautuaga, ma musumusuga patino ua faamanuiaina ai i tatou. E moni lava, “o loo agalelei Ieova i mea uma, o lona alofa mutimutivale foi ua i ana mea uma na fai” (Salamo 145:9).
Ou te faafetai lava mo le Toefuataiga o le talalelei a Iesu Keriso e ala mai i le Perofeta o Iosefa Samita, ma le malamalama ua tatou maua nei e uiga i le alofa mutimutivale o le Alii. O o tatou manaoga, faamaoni, ma le usiusitai e valaaulia ai i tatou ma fesoasoani tatou te iloatino ai Lona alofa mutimutivale i o tatou olaga. I le avea ai o a’u ma se tasi o Ana auauna, ou te tautino atu ai la’u molimau, o Iesu Keriso, o lo tatou Togiola ma le Faaola. Ou te iloa o loo soifua o Ia, ma o loo avanoa Lona alofa mutimutivale mo i tatou uma. E mafai e i tatou taitoatasi ona i ai mata e vaai manino ai, ma taliga e lagona tonu ai le alofa mutimutivale o le Alii, a o faamalolosia ma fesoasoani ia i tatou i nei aso e gata ai. Ia tutumu e le aunoa o tatou loto i le faafetai mo le tele o Lona alofa mutimutivale.
Ata na tusia e by Keith Larson