Talitonu, Usitai, ma Tumau
Talitonu o le tumau malosi ma faamaoni i upumoni o le talalelei, e sili lea ona taua. Ou te molimau atu e moni!
Ou tuafafine talavou pele, ua faalotomaulaloina lava au i le tiutetauave e talanoa atu ia te outou. Ou te tatalo mo se fesoasoani faalelagi, ina ia ou agavaa mo lena avanoa.
E na o le 20 tausaga talu ai, e le’i amataina la outou malaga i le olaga nei. O la sa outou i ai i lo outou aiga faalelagi. Sa outou i ai ma i latou o ē sa alolofa ia te outou, ma sa popole mo lo outou soifua manuia e faavavau. Sa oo ina ua tatau ai le olaga i le lalolagi mo lo outou alualu i luma. E le taumate sa tautalagia ni faamavaega ma tuuina atu faamatalaga o le talitonu mautinoa. Sa outou maua ni tino ma avea ai ma tagata ua faitino, ua momotu ese mai le afioaga o lo outou Tama Faalelagi.
Peitai, o se faatali fiafia, sa faatalia outou iinei i le lalolagi. O na uluai tausaga, o ni tausaga taua ma le faapitoa. Sa leai se mana o Satani e faaosooso ai outou, aua e lei oo i le taimi tou te tali atu ai. Sa ta’umamaina outou i le silafaga a le Atua.
E lei pine ae outou ulufale atu i lena vaitau ua faaigoaina e nisi “o tausaga matautia o le talavou.” E sili ia te au le ta’u “o tausaga maoae o le talavou.” Oka se taimi o avanoa, o se vaitau o le tuputupu ae, o se semesa o le atinaega—ua iloga i le mauaina o le poto ma le sailiga mo le upumoni.
E leai se isi ua faamatalaina tausaga o le talavou faapea e faigofie. E tele lava ina avea o tausaga o le le malupuipuia, o lagona e faapei e te le talafeauga, o le taumafai e sue sou nofoaga i au taaga, o le taumafai e faafetaui i ai. O se taimi lea a oo ina tele lou tutoatasi—ma atonu ua e manao tele i le saolotoga ae le o mananao ou matua e tuuina atu nei loa. O uluai tausaga foi na o le a faaosoosoina ai oe e Satani ma o le a ia faia le mea sili na te mafaia, e faatosina ese ai oe mai le ala o le a toe taitai atu ai oe i lou aiga faalelagi lea na e sau ai, ma toe foi atu ai i ē pele ia te oe ma lou Tama Faalelagi.
O le lalolagi o loo siomia ai oe, e le o faaauupegaina e tuuina atu le fesoasoani e te manaomia ia e saogalemu ai i lenei malaga e tele ina matautia. Ua toatele naua i latou i lo tatou lalolagi i le taimi nei, e foliga mai ua se’e ese atu mai le taula o le saogalemu ma tafetafea atu ai mai le uafu o le filemu.
O le taliaina o le amioletonu, ola le mama, ponokalafi, fualaau faasaina, le malosi o taaga a tupulaga—o nei mea uma ma isi mea—ua afua ai ona felafoaiina le toatele i le sami o le agasala ma nutipalaina ai i luga o aau maamaai o avanoa ua le maua, o faamanuiaga ua le taulau, ma miti ua nutipalaina.
Pe o i ai se ala saogalemu? Pe o i ai se ala e solaese ai mai le faatafunaga taufaamata’u? O le tali o se ioe! tele! Ou te apoapoai atu ia te outou ia vaavaai atu i le moli o le ava a le Alii. Sa ou ta’u atu foi muamua lena mea; o le a ou toe fai atu foi: e leai se puao e mafiafia tele, leai se po ua pogisa tele, leai se matagā e malosi tele naua, leai se tautai ua matua se, e le mafai ai e le moli o le ava a le Alii ona laveai mai. E emoemo mai lava i taimi o afa o le olaga. E valavalaau mai lava, “O le ala lenei i le saogalemu. O le ala lenei i le aiga.” Na te auina mai faailoilo o le sulu e faigofie ona vaaia, ma e le misi lava. Afai e mulimulita’ia, o le a toe taialaina oe e na faailoilo i lou aiga faalelagi.
Ou te fia talanoa atu ia te outou i le po nei e uiga i faailoilo taua e tolu mai le moli o le ava a le Alii, lea o le a fesoasoani ia te outou e toe foi atu ai i lena Tama o loo faatalitali mai ma le naunautai i lou toe foi manumalo atu. O na faailoilo e tolu o le talitonu, usitai, ma le tumau.
Muamua, ou te ta’ua o se faailoilo autu ma e taua: talitonu. Talitonu o oe o se afafine o le Tama Faalelagi, e alofa o Ia ia te oe, ma ua e i ai iinei mo se faamoemoega mamalu—ia maua lou faaolataga e faavavau. Talitonu o le tumau malosi ma faamaoni i upumoni o le talalelei, e sili lea ona taua. Ou te molimau atu e moni!
A’u uo talavou, talitonu i upu e te faia i vaiaso taitasi a o e taulotoina le autu a Tamaitai Talavou. Mafaufau i le uiga o na upu. O loo i ai le mea moni iina. Taumafai i taimi uma e ola ai i tulaga faatauaina ua tuuina atu. Talitonu, e pei ona ta’u mai e la outou autu, afai e te talia ma galue ai i na tulaga faatauaina, o le a e saunia e faamalosia lou aiga ma lou auaiga, e osia ma tausia feagaiga paia, e maua sauniga o le malumalu, ma o’o ai ina e olioli i faamanuiaga o le faaeaga. O ni upumoni matagofie nei o le talalelei, ma o le mulimuli ai, o le a sili atu ai lou fiafia i lou olaga iinei ma le olaga a sau, nai lo lou olaga pe a e lafoa’ia.
O le toatele o outou sa aoaoina i upumoni o le talalelei mai le taimi faatoa e laalaa ai. Sa aoaoina outou e ni matua alolofa ma faiaoga lelei. O upumoni sa latou tuuina atu ia te outou, sa fesoasoani e maua ai sa outou molimau; sa e talitonu i mea sa aoao atu. E ui o lena molimau e mafai ona fafagaina pea faaleagaga ma tuputupu ae ai a o e suesue, a o e tatalo mo se taitaiga, ma a o e auai i au sauniga Lotu i vaiaso taitasi, a o oe lava e faaolaolaina lena molimau. O le a taumafai Satani i lona malosi atoa e faataumaoia ai. I lou olaga atoa, o le a manaomia ai ona e faafaileleina. E faapei o le talali o se afi mumu, o lau molimau foi—afai e le fafagaina pea lava pea—o le a mou atu ina malala ona maalili ai lea. E le tatau ona e faatagaina lenei mea e tupu.
E le gata i le auai i au sauniga Lotu i Aso Sa ma au gaoioiga i po o le vaiaso, a e maua le avanoa e te alu ai i le seminare, pe fai i le taeao po o vasega i le taimi o a’oga, ia faaaoga lena avanoa. O le toatele o outou o loo auai nei i le seminare. Pei lava o soo se mea i le olaga, o le tele o mea e te maua mai i aafiaga o le seminare, e faalagolago i ou uiga faaalia ma lou naunau ia aoaoina oe. Talosia o ou uiga faaalia, o le lotomaulalo ma se naunautai e aoao. E maeu lo’u lotofaafetai mo le avanoa sa ou maua a o ou talavou ou te aoga ai i le seminare i le vaveao, aua e taua tele sana matafaioi i lo’u atinaega ma le atinaega o la’u molimau. E mafai e le seminare ona suia olaga.
I ni nai tausaga ua mavae, sa ou i ai i se fono a faatonu ma se alii lelei, sa matua faamanuiaina i le olaga. Sa faagaeetia lava a’u i lona amiotonu ma lona faamaoni i le Ekalesia. Sa ou aoaoina faapea, na ia maua se molimau ma auai ai i le Ekalesia ona o le seminare. Ina ua faaipoipo o ia, o lona toalua o se tagata na auai i le Ekalesia i lona olaga atoa. A o ia sa le’i auai i se lotu. I le gasologa o tausaga ma e ui foi i taumafaiga a lona toalua, sa leai sona fiafia e alu i le lotu ma lona toalua ma le fanau. Ona amata lea ona ia aveina ona afafine e toalua i le seminare i le vaveao. E nofonofo ai lava i lana taavale a o fai a la vasega, ona ia aveina lea o i la’ua i le aoga. I se tasi aso timu, sa fai atu se tasi o ona afafine, “Sau i totonu, Papa. E mafai ona e nofonofo i le faletele.” Sa ia taliaina le valaaulia. Sa matala le faitotoa i le potuaoga, ona amata lea ona ia faalogologo. Sa ootia lona loto. O aso uma na totoe o lena tausaga faaleaoga, sa auai faatasi o ia ma ona afafine i le seminare, lea na i’u ai ina avea o ia ma tagata o le ekalesia ma toaga ai i le Lotu i aso uma o lona ola. Faataga le seminare e fesoasoani e atiina ae ma faamalosia lau molimau.
O le a i ai taimi o le a e feagai ai ma luitau atonu e lamatia ai lau molimau, pe atonu foi e te faatuatuanai i ai pe a e tulimata’ia isi mea e te fiafia i ai. Ou te aioi atu ia e malosi. O lou tiutetauave, ma o lau lava, le tausisia ia mumusaesae. E manaomia ai se taumafaiga, ae o taumafaiga e te le tau salamo ai. Ua ou manatua ai upu o se pese na tusia e Julie de Azevedo Hanks. E faatatau i lana molimau, na ia tusia ai:
O matagi o suiga
Siomia i ao o le tigaina
Ou te puipuia i lo’u ola
Ou te manaomia le mafanafana—ou te manaomia foi le malamalama
E ui ina agitele mai le afa
Ou te tu i timuga mamafa,
Ma ou tumau pea
O se leoleo o le afi e mumu pea lava.1
Ia e talitonu, ona faatumauina lea o le mumusaesae o le afi o lau molimau, tusa lava po o le a le mea e tulai mai.
O le isi, tamaitai talavou, ia e usitai. Usitai i ou matua. Usitai i tulafono a le Atua. Ua tuuina mai ia i tatou e se Tama Faalelagi alofa. A usita’ia, o le a sili ona faamanuiaina o tatou olaga, ma tuuitiitia le faigata. O le a faigofie ona tauave o tatou luitau ma faafitauli. O le a tatou maua faamanuiaga folafolaina a le Alii. Na Ia fetalai, “E manaomia e le Alii le loto ma le mafaufau malie; ma o e e loto malilie ma usiusitai o le a ‘aia le lelei o le laueleele o Siona i aso nei e gata ai.”2
E tasi lava lou ola. Ia tausisia le saoloto mai mea matautia. O le a faaosoosoina oe, i nisi taimi e tagata sa e maua o ni uo.
I ni nai tausaga ua mavae, sa ou talanoa ai i se fautua o le Maea Meite, o le sa ia faamatala mai sona aafiaga ma se tamaitai talavou i lana vasega. Sa tele ina faaosoosoina lenei tamaitai talavou e tuua le ala i le upumoni ae mulimuli i le ala ‘alo o le agasala. O le tauanau pea lava pea e nisi o ana uo i le a’oga, sa iu ai ina ioe o ia e ui i lena ala ‘alo. Sa faatulaga le fuafuaga: sa tonu e fai i ona matua o la e alu i se gaoioiga a Tamaitai Talavou. Peitai, sa ia fuafuaina, ia lava le taimi e i ai iina mo ana uo teine ma a latou paaga e pikiina o ia. Ona latou o ai lea i se pati e inu ai pia ma fai ai amioga e matua solia ai lava le mea ua iloa e lenei tamaitai talavou e sa’o.
Sa tatalo le faiaoga mo musumusuga e fesoasoani ai i ana teine uma, aemaise lava o lenei tamaitai talavou, o lē sa foliga mai e le o mautinoa lana tautinoga i le talalelei. Sa maua e le faiaoga se musumusuga i lena po e tuu le mea sa ia fuafuaina muamua e fai, ae talanoa atu i teine e uiga i le faatumauina o le ola mama. A o amata ona ia faasoa atu ona manatu ma lagona, sa tilotilo soo ifo le tamaitai talavou lea e le o mautinoa i lana uati, ina ia mautinoa e le misi le taimi na tuupoina faapea ana uo. Peitai, a o gasolo pea le talanoaga, sa ootia lona loto, sa fagua lona lotofuatiaifo, ma sa faafouina lona naunautai. Ina ua oo mai, sa ia le amanaiaina le faaee mai o le pu o le taavale ia alu atu ai. Sa nofo ai o ia i le afiafi atoa faatasi ma lona faiaoga ma isi teineiti o le vasega. Sa ia ‘alofia le faaosoosoga ina ia ui ese mai le ala faamaonia a le Atua. Sa le fiafia Satani. Sa nofo ai pea le tamaitai talavou ina ua o uma isi, e faafetai atu i lona faiaoga mo le lesona ma sa ta’u atu ai ia te ia ua fesoasoani le lesona ua ia aloese ai mai le mea semanu o se taunuuga matautia. Sa talia le tatalo a se faiaoga.
Na ou iloa mulimuli ane, talu ai sa ia faia se faaiuga e le ō ma ana uo i lena po—o nisi o tama ma teine lauiloa o le aoga—sa latou le toe amanaiaina o ia ma sa tele ni masina e le o toe i ai ni ana uo i le aoga. Sa le mafai ona latou taliaina lona musu e faia mea sa latou faia. O se vaitau sa matua faigata ma tuua ai na o ia, ae sa tumau lona mausali ma sa iu ina maua ni ana uo e tutusa o latou tulaga faatauaina. O le taimi nei, ina ua mavae ni tausaga, sa faaipoipo o ia i le malumalu ma e toafa lana fanau aulelei. Se olaga ina a ese ua i ai nei o ia. O a tatou faaiuga e fuafua ai lo tatou taunuuga.
Tamaitai talavou pele, ia faia faaiuga uma e te mafaufau e pasia ai le suega lenei: “O le a le mea na te faia ia te au? O le a le mea na te faia mo au?” Ona faamamafa lea o lau tautinoga o le amio ae le o le “O le a se mafaufauga o isi?” ae o le “O le a so’u mafaufau ia te au lava?” Ia uunaia oe e lena leo filemu ma le itiiti. Manatua sa i ai se tasi ua i ai le pule, na tuuina ona lima i luga o lou ulu i le taimi o lou faamauga ma fai atu, “Talia le Agaga Paia.” Ia tatala o outou loto, e oo lava i o outou agaga, i le leo o lena siufofoga faapitoa o loo molimau mai i le upumoni. E pei ona sa folafola mai e le perofeta o Isaia, “E faalogo foi o outou taliga i le upu … o faapea mai, O le ala lava lenei, ia outou savavali ai.”3
O le uiga masani o o tatou taimi o le talia gofie. E faaalia e mekasini ma ata televise ia tagata lauiloa o atatifaga, o toa manumanu o malae afeleti—o i latou e moomoo i ai le toatele o tupulaga talavou e faataitai i ai—e le amanaiaina ai tulafono a le Atua ma lē taofiofia ai faiga e tumu i le agasala, e foliga mai e leai se aafiaga leaga. Aua e te talitonu i ai! E i ai le taimi o le faamasinoga—o se taimi e faapaleni ai tusi. E tofu lava le Cinderella ma lana vaeluapo—a lē o le olaga nei, o le isi. O le a oo mai le Aso Faamasino mo tagata uma. Pe ua e saunia ea? Pe ua faamalieina ea oe i au lava faatinoga?
Afai ua i ai se tasi ua tautevateva i lana malaga, ou te folafola atu ia te oe o loo i ai se ala e toe foi ai. O le faagasologa ua ta’ua o le salamo. Sa maliu lo tatou Faaola ia maua ai e oe ma a’u lena meaalofa faamanuiaina. E ui ina faigata le ala, ae e moni le folafolaga. Na fetalai mai le Alii: “e ui ina pei o ofu mumu a outou agasala, e sisina ia e pei o le kiona.”4 “Ma ou te le toe manatuaina [na agasala].”5
O’u tuafafine talavou pele, ua ia te outou le meaalofa taua o le faitalia. Ou te aioi atu ia te outou e filifili ia usitai.
Ma le mea mulimuli, ia e tumau. O le a le uiga o le tumau? Ou te fiafia lava i le faauigaga: ia tatalia ma le lototele. Atonu e tatau ai le lototele mo oe e te talitonu ai; o le a i ai taimi e tatau ai pe a e usitai. E mautinoa lava e manaomia a o e tumau seia oo i lena aso o le a e tuua ai le olaga nei.
Ua tele tausaga o o’u talanoa i le toatele o tagata taitoatasi sa ta’u maia ia te au, “E tele naua a’u faafitauli, ma o ni atugaluga moni lava. Ua lofituina au i luitau o le olaga. O le a se mea e mafai ona ou faia?” Sa ou ofoina atu ia te i latou, ma ou te ofoina atu nei ia te outou, ni fautuaga patino: saili i le taitaiga faalelagi i aso taitasi. O le ola ai i le olaga a o popole i le lumanai, e faigata; ae o le ola ma taulima auauai e faigofie. E mafai e i tatou taitoatasi ona faamaoni i le aso e tasi—ona faaopoopo lea o le isi tasi, ma le isi tasi pe a uma—seia oo lava ina tatou ola i se olaga atoa e taialaina e le Agaga, o se olaga e latalata i le Alii, o se olaga o galuega lelei ma le amiotonu. Sa folafola mai e le Faaola, “Ia outou vaavaai mai ia te au, ma tumau e oo i le iuga, ma o le a outou ola ai; aua o ia o le e tumau e oo i le iuga o le a ou tuuina atu i ai le ola faavavau.”6
Aua o le faamoemoega lea na outou o mai ai i le olaga nei, a’u uo pele. E leai se isi mea e sili ona taua nai lo le sini o loo e taumafai ia ausia—o le ola e faavavau lea i le malo o lou Tama.
O outou o ni afafine faapelepele, faapelepele lava o lo tatou Tama Faalelagi na auina mai i le lalolagi i lenei taimi mo se faamoemoega. Sa taofia outou seia oo mai i le itula lava lenei. Ua faapolopolo mea ofoofogia ma le mamalu mo outou pe afai o le a outou talitonu, usitai, ma tumau. Ia avea nei mea ma o outou faamanuiaga, ou te tatalo ai i le suafa o Iesu Keriso, lo tatou Faaola, amene.