Fonotaga Faaleaoaoga mo Ausilali i le Initoneti i le FaaPeretania ma le FaaSipaniolo
Ina ia fesoasoani i taitai ia aoao i o latou tiute ma ia faalauiloa atu ia anomea o punaoa ia e mafai ona faaaogaina mo aoaoga faaleautaitai perisitua ma ausilali, sa faia ai e au peresitene aoao o ausilali e fa o le Ekalesia ni aoaoga mo taitai o ausilali o siteki ma uarota i le tausiusiuga o Mati. (O aoaoga mo taitai o Alii Talavou o le a faia i le aso 10 o Me). O faasalalauga tuusao o Webcast ma faasalalauga e talosagaina, sa tuuina atu pe o le a tuuina atu mo ausilali e lima i le faaPeretania ma le faaSipaniolo. O se aotelega o vaega e fa o aoaoga sa faia ia Mati ua tuuina atu ii mo i latou e le mafai ona mauaina [i le initoneti].
Peraimeri
O le faamoemoega o le Peraimeri o le fesoasoani lea i le fanau i le ala o le liuaina, sa saunoa ai Rosemary M. Wixom, le peresitene aoao o le Peraimeri, i le taimi o le aoaoga faaleausilali mo taitai o le Peraimeri i le aso 28 ma le 29 o Mati.
“Matou te mananao i [tamaiti o le Peraimeri] ina ia lagonaina, ia alolofa atu, ia faatino,” sa ia fai mai ai. “Matou te mananao ia latou maua se molimau. … O le molimau o lona uiga o se tautinoga. Matou te mananao ia laa atu i se isi laasaga faaopoopo. O le liuaina o lona uiga ia faatinoina. Matou te mananao i nei tamaiti ina ia maua ma lagonaina ia fatu o le liuaina i o latou olaga.”
Sa tau atu e Sister Wixom ma ona fesoasoani o Jean A. Stevens ma Cheryl A. Esplin i taitai o uarota ma siteki e mafai ona latou fesoasoani i matua i le totoina o na fatu o le liuaina. Sa saunoa Sister Wixom o le faagasologa o le liuaina e amata i se tausaga talavou lava. “E amata moni lava i le aiga, lea e alolofa ai matua i le Alii ma o la loto atoa, faatasi ma o la agaga atoa, faapea ai ma o la malosi atoa. Ona la aoao atu ai lea i le la fanau.”
Sa ia saunoa o le a malamalama le fanau i le uiga o le liuaina “pe afai lena tatou te faaalu le taimi e aoao ai i latou.” Ma, sa ia faaopoopo ai, afai e le aoaoina e matua ma taitai o le Peraimeri i latou, “o le a aoaoina e le lalolagi.”
Sa tuu atu foi e sui o le fono faatonu aoao o le Peraimeri ni aoaoga i le faaaogaina o musika e aoao atu ai ia mataupu faavae o le talalelei faapea ai ma punaoa mo taitai o le Peraimeri o loo maua i le LDS.org.
Aualofa
“E te taitaia se galuega sili!” sa tau atu ai e Julie B. Beck, le sa faamaloloina o le peresitene aoao o le Aualofa i le sauniga konafesi i le aoauli o le Aso Toonai, i taitai o le Aualofa i le taimi o se aoaoga faaleausilali i le aso 27 ma le 28 o Mati. “O le galuega lenei a le Alii. … Ua ia te i tatou se tiutetauave e matua taua tele.”
Sa lauga atu ia Sister Beck i le tele o autu, e aofia ai faamoemoega o le Aualofa, le matafaioi taua a tamaitai o loo faatinoina i o latou aiga, aoao atu (aemaise lava i tuafafine fou o le Ekalesia), galulue ai i komiti, ma mataupu faavae faaletaitaiga.
Pipii i vaega faavae, sa saunoa ai ia Sister Beck. “O se galuega faigofie, ona tuu mai lea e le Alii ni manatu i mea o loo taulai atu i ai. Afai tatou te fuafuaina mea e manaomia ona tatou faia, o le a Ia fesoasoani mai ia i tatou ia o mai mai faaaliga i le faatinoga. O le a tatou mauaina faaaliga i le gasologa o le ala.”
I a latou aoaoga uma, sa taulai atu ai le au peresitene ma le fono faatonu aoao o le Aualofa i le saili atu mo tali o loo i totonu o le Tusitaulima 2: Taitaiina o le Ekalesia faapea ai ma totonu o le O Afafine i Lou Malo: O Le Talafaasolopito ma le Galuega a le Aualofa.
Aoga Sa
O le Leadership Training Library, o se vaega fou i le LDS.org, o se taulai lautele lea i le fonotaga faaleaoaoga mo le ausilali o le Aoga Sa sa faia i le aso 28 o Mati.
O vaega o vitio eseese mai le potutusi sa faaali e lagolago ai talanoaga o mea sa otootoina e Russell T. Osguthorpe, le peresitene aoao o le Aoga Sa, e avea ma autu laualuga e fa i le fonotaga:
-
O le matafaioi a se taitai o le Aoga Sa a le uarota ma le siteki.
-
Pe faapefea ona fesoasoani i isi ia malamalama i le matafaioi a le au peresitene o le Aoga Sa i le faaleleia o le aoao atu i faalapotopotoga uma i le uarota ma le siteki.
-
Pe faapefea ona fefautuaai faatasi ma le mataalia sili atu o se au peresitene.
-
Pe faapefea ona aoao faamasani ia faiaoga ma tuuina atu le lagolagosua mataalia faifai pea.
“O le Leadership Training Library, o le a outou maua ai, o le a avea ma se tasi o meafaigaluega sili ona taua e te mauaina e fesoasoani ai e aoao ia sui o isi ausilali ma le Aoga Sa i o latou tiutetauave,” sa saunoa ai David M. McConkie, le fesoasoani muamua i le au persitene aoao o le Aoga Sa. “Sa sauniaina le potutusi e ausilali uma o le Ekalesia, e uso o le Au Fitugafulu, [ma] uso o le Korama a Aposetolo e Toasefululua. O le galuega faatino lenei sa faatautaia mo le tele o tausaga, ma ua oo atu i le tele o konetineta.”
E mafai ona maua le potutusi i le LDS.org ile kiliki muamua o le Menu i le itulau autu ona kiliki lea o le sootaga o le Leadership Training Library i le koluma o le Service.
Tamaitai Talavou
“E lei suia lava ia tulaga faatonuina, ae ua suia le lalolagi,” sa saunoa ai Elaine S. Dalton, le peresitene aoao o Tamaitai Talavou, i le taimi o le fonotaga faaleaoaoga a le ausilali a Tamaitai Talavou i le aso 27 ma le 28 o Mati. Sa ia uunaia ia taitai ina ia “suia le lalolagi” e ala i le avea ma faataitaiga lelei o le ola ai i se olaga mama.
“O o outou valaauga e le o ni mea faasamasamanoa,” sa ia saunoa ai. “O le ala tou te foliga ai, laei ai, ma ataata ai o le a aafia ai nei tamaitai talavou … i le tau lava ina faatasi ma i latou ma aoao i latou i le olioli i le avea ai ma se tamaitai ma le ola ai i le talalelei. … E ao ona tatou tauagafau. E ao ona tatou mataala. E manaomia ona tatou aoao atu e ala i faataitaiga ma le alofa tele.”
O fesoasoani i le au peresitene aoao o Tamaitai Talavou, o Mary N. Cook ma Ann M. Dibb, sa saunoa i le taua o le “tuu atu i Lora e taitai.” Sa faaaoga e fesoasoani le tolauapiga—lea e faamanatuina lona 100 tausaga i le tausaga nei—e fai ma faataitaiga o se avanoa e tuu atu ai i Lora e taitai, ae fai mai o loo i ai avanoa masani mo taitai e faasoasoa atu ai tiutetauave, ia mafai ona faaaofia ai ma tamaitai talavou.
Sa taulai atu foi faiaoga i le tele o punaoa—uepisaite, tusiga, vitio, tusi lesona, ma le lomiga ua toe faafou o le Mo Le Malosi o le Autalavou—lea ua avanoa mo taitai e tagai i ai mo manatu ma fesoasoaniga.
O le Leadership Training Library o le mea lea e tasi na taulai atu i ai le fonotaga faaleaoaoga a le ausilali o le Aoga Sa i le aso 28 o Mati. Sa faia uma foi e faalapotopotoga a le Aoga Sa, Peraimeri, Aualofa ma Tamaitai Talavou ia aoaoga e i latou lava ma faasalalauina i le Initoneti a o lumanai le konafesi aoao ia Aperila. O le a faia le aoaoga a le faalapotopotoga a Alii Talavou i le aso 10 o Me.