Linda S. Reeves

Fesoasoani Lua i le Au Peresitene Aoao o le Aualofa

Sa aoaoina e Linda Sheffield Reeves i lona talavou mai lona tina malosi sa liliu mai ina ia liliu atu i le Atua i taimi o faigata ma ia tauivi mo mea silisili e pei ona aoaoina e lona tama.

“Sa ou vave maua se molimau malosi i lou olaga ona o luitau ia na fesoasoani ia te au faaleagaga ina ia vave ai ona faatagatamatua,” sa ia saunoa ai.

Sa fanau mai ia Sister Reeves i Los Angeles, Kalefonia, ISA, ia Aokuso 1951 ia Elbert Jolley ma Barbara Welsch Sheffield. Na te manatuaina le vaavaai atu i luga i le lagi e tumu i fetu a o 13 ona tausaga i se tolauapiga a Tamaitai Talavou ma tuuina atu se tatalo faigofie mai le loto: “Tama e, o e i ai iina?”

“Sa siomiaina au e Lona Agaga, le iloa o Lona afioaga ma le moni, ma Lona alofa mo au,” sa ia fai mai ai.

Sa feiloai ia Sister Reeves ma Melvyn Kemp Reeves i lana uarota i Pasadena. Sa la tafafao faamasani a o auai ai i le Iunivesite o Polika Iaga ina ua uma le misiona a Melvyn. Sa la faaipoipo ia Iuni 1973 i le Malumalu i Los Angeles Kalefonia ma avea ai ma matua i fanau e 13.

I le lotolotoi ai o tofotofoga, sa pipiimau ai ia Sister Reeves i lana molimau o le Togiola, aemaise lava i le maliu ai o lana tama teine e 17 tausaga le matua, o Emily Michelle, i se faalavelave tau taavale i le 2005.

“O faigata o se faiaoga sili,” sa ia fai mai ai. “E fausia e faigata i tatou ma saunia i tatou mo auaunaga i le lumanai i le malo, i o tatou aiga, ma i o tatou nuu, ma avea ai i tatou ma se meafaigaluega i aao o le Alii.”

A o lei valaauina o ia i le au peresitene aoao o le Aualofa, sa auauna atu ia Sister Reeves faatasi ma lona toalua a o ia pulefaamalumalu ai i le Misiona a Kalefonia Riverside mai le 2008 i le 2011. Sa avea o ia ma se peresitene o le Aualofa a le siteki, peresitene o Tamaitai Talavou a le uarota, taitai pese a le Peraimeri, ma se faiaoga i le Aoga Sa.

Sa faauu mai ia Sister Reeves mai le BYU i le 1974 ma se faailoga o le tagata malaga i aoga faapitoa. E tele mea e naunau i ai o ia, e aofia ai le faatufugaga, musika, pueata, talafasolopito o aiga, ma galuega faafaifeautalai. E le fefe o ia e faaali atu ona manatu, aemaise lava pe a oo mai i le faasoaina atu o le talalelei a Iesu Keriso i tagata uma e feiloai i ai o ia.