Ua Faasilasila Mai Tagata na Manumalo i le Faaaliga Faatufugaga Faavaomalo, Tatala le Faaaliga

I le Aso Faraile, 16 Mati, 2012, i le tatalaga o le faaaliga o le Tauvaga Faatufugaga Faavaomalo Lona Iva, sa potopoto ai tusiata mai le lalolagi atoa e talia ia faailoga mo a latou faatufugaga sa faaautu i le AAG.

O Merit Awards (Faailoga Sili) sa tuuina atu mo tusiata e 20 o a latou ata sa manatu i ai ua “tulaga ese,” ae o isi tusiata e 15 sa mauaina ia Purchase Awards, o lona uiga ua manaomia e le Mataaga o le Talafaasolopito o le Ekalesia, lea sa lagolagoina le tauvaga, ia ata mo lana faaputuga.

Sa auai ai ia Elder Marlin K. Jensen o le Fitugafulu, le Tusi Talafaasolopito ma le Tusi Talafaamaumau foi lea a le Ekalesia, ma faia se saunoaga puupuu a o lei tuu atua ia faailoga.

Sa tatalaina le faaaliga i le aso 16 o Mati, 2012, ma faaauau ai seia oo i le aso 14 o Oketopa, 2012, i le Falemataaga o le Talafaasolopito o le Ekalesia i le Aai o Sate Leki, Iuta, ISA.

O le tauvaga i lenei tausaga le, Faailoa Atu Ana Galuega Ofoofogia (MF&F 65:4), na tosina atu ai ni tagata tauva e 1,149 mai le lalolagi atoa i le tele o ala o faasalalauga, e aofia ai le vaneina o faatagata, ie lalaga ma isi ituaiga o ie, faatufugaga i pepa, ma ata vali. O le a faaali i le falemataaga le 198 o ata.

E tusa ai ma le saunoaga a Rita R. Wright, le Pule o Ata ma Faatufugaga i le falemataaga, e faamasinoina ia le tauvaga e tusa ai ma le taua o le faatufugaga ma le ogatusa ma le autu. E atagia mai i galuega se eseesega o ala o faasalalauga ma tu masani faaleaganuu o loo tuuina mai ai le molimau o galuega ofoofogia a le Alii, sa ia saunoa ai, ma e tele ina faaaoga ia faailoga e fai ma faatusa ma aoaoga.

Mo se faataitaiga, o le atatusi a se tagatanuu Iukureini o Valentyna Musiienko, le Malumalu o Kyiv Iukureini, lea na manumalo i le Purchase Award, sa toe fatua’i ai i pepa lanu nisi o faailoga o loo maua i totonu o le malumalu.

O Brandon Daniel Hearty—o sē na manumalo i le Merit Award mai Alberta, Kanata—sa faaaogaina se ata suauu o le tina o lona tina matua (Matriarch) e fai ma faatusa o le talafaasolopito o le aiga ma fesootaiga o augatupulaga.

Sa saunoa ia Alexandra Gomez Chaves, o Bogotá, Kolomupia e faapea, o le tauvaga o se ala lea e tuu atu ai le molimau. Sa ia fatua’iina lana ata lea sa malo i le Merit Award, Vai o le Ola, faatasi ai ma le fesoasoani a lona tina, lea na maliu ae ua latalata i le tatalaga o le faaaliga.

“O tagata e vaaia lenei faatufugaga … o le a vaaia le molimau o Iesu Keriso ma Lana talalelei o se puna o le vai o le ola,” sa ia saunoa ai. “I lenei ata, o le a latou vaai ai i le alofa atoa e mafai ona aoao atu e se tina i lana fanau ona o loo ave e lenei tina le fagu ma aoao lana tama teine ia aoao atu le talalelei.”

E leai se totogi e ulu ai i le faaaliga, ma ua uunaia ia tagata e aumai o latou aiga. E mafai ona latou palota mo galuega latou te fiafia i ai, ma e ono ia Visitors’ Choice Awards o le a tuuina atu ia Setema, e tusa ai ma palota a tagata.

E le o toe mamao, ae mafai loa ona maimoaina e tagata ia faatalanoaga ma tusiata eseese e 11 sa auai i le tauvaga i le uepisaite o le Church History i le faaPeretania. O le a faaali ai foi i vitio i le falemataaga.

O loo fuafua foi e le Falemataaga o le Talafaasolopito o le Ekalesia se faaaliga i luga o le initoneti i le history.lds.org/artcompetition.

Mo nisi faamatalaga e uiga i le faaaliga, asiasi i le history.lds.org pe vili le 801-240-4615.

O Le A Ou Folafola Atu a Latou Upu, saunia e Elspeth Caitlin Young, Iunaite Setete

Faatufugaga mai faaaloaloga a le Falemataaga o le Talafaasolopito o le Ekalesia

Matriarch, saunia e Brandon Daniel Hearty, Kanata

Faatufugaga mai faaaloaloga a le Mataaga o le Talafaasolopito o le Ekalesia