Epikopo Gérald Caussé

Fesoasoani Muamua i le Au Epikopo Pulefaamalumalu

Mai lona tamaitiiti, o Epikopo Gérald Jean Caussé, lea faatoa valaauina e avea ma Fesoasoani Muamua i le Au Epikopo Pulefaamalumalu, sa ia maua pea le fiafia i le auauna ai i le Ekalesia. O se mea lelei lena, sa ia fai mai ai, ona i lana tamai paranesi i Bordeaux, i Farani, sa manaomia tagata uma ina ia faatumauina le faagaoioiga o le iunite. E faaopoopo atu i le auauna ai i korama a le Perisitua Arona i lona talavou atoa, sa avea foi o ia ma se tapiano a le Peraimeri i le 12 o ona tausaga, o se fesoasoani i le au peresitene o le Aoga Sa i le 14 o tausaga, ma peresitene o le Aoga Sa i le 16 o ona tausaga.

“O le auauna ai i le Ekalesia ua fesoasoani lea ia te au i le mauaina o lau molimau,” sa ia saunoa ai. O lona tama, o le sa tele taimi na avea ai ma se peresitene o le paranesi ma epikopo, sa patino lava le aoga i le mauaina o se aafiaga lelei ia Epikopo Caussé.

“A o avea au ma se talavou, sa ia faaaofia au i le faia o asiasiga faaleaiga po o le asiasi foi i aiga e le tagolima,” sa saunoa ai Epikopo Caussé. “O le mata’ituina o ia e masalo lava o le aafiaga faaleaoaoga sili lea i le sauniaina mo tulaga faaletaitai perisitua.”

Mulimuli ane, sa avea ia Epikopo Caussé ma failautusi a le uarota, peresitene o le korama a toeaina, taitai vaega o faitaulaga sili, fesoasoani o le epikopo, fesoasoani o le peresitene o le siteki, peresitene o le siteki, Fitugafulu Eria, ma le tofiga sili ona lata mai o se uso o le Korama Muamua a Fitugafulu.

Sa fanau mai ia Epikopo Caussé i Bordeaux, Farani, ia Me 1963, ia Jean ma Marie-Blanche Caussé. Sa tautua o ia i le Fuavaalele a Farani mo se tausaga a o avea ma se alii talavou, lea sa tofia ai o ia i se lala o le NATO.

Sa maua lona faailoga o matuaofaiva i pisinisi mai le ESSEC i le 1987. Sa amata lana galuega i mea tau faufautua mo fuafuaga, lea na ia faaalu ai le ono tausaga o galue ai i ofisa o se kamupani faufautua i Pale ma Lonetona. Sa mulimuli ane faigaluega o ia mo se vaega tele o fefaatauaiga i Europa, ma a o lumanai ai lona valaauga i le Korama Muamua a Fitugafulu i le 2008, sa galue o ia o se pule sili ma se sui o le fono faatonu mo se kamupani sili ona tele i Farani e faatau atua ia meaai.

Sa faaipoipo o ia ma Valérie Lucienne Babin ia Aokuso 1986 i le Malumalu o Bern Suitiselani. E toalima le la fanau.