Elder Craig A. Cardon

O Le Fitugafulu

O Elder Craig Allen Cardon, o lē faatoa valaauina i le Korama Muamua a Fitugafulu mai le Korama Lua, e faailoaina lava le aafiaga o le Agaga i mea lelei uma i lona olaga.

“Sa fesoasoani lou tina ma lou tama a o ou tamaitiiti e amata ona iloa le siufofoga o le Agaga, ia iloa mea sa ou lagonaina,” sa ia manatua ai. “O lena fesootaiga mai le Alii o loo avanoa mo tagata uma o e saili ma le naunautai ma e taua i lenei galuega tele.”

Ina ua maea se misiona i Italia, sa faaipoipo atu ia Elder Cardon ia Deborah Louise Dana ia Novema 1970 i le Malumalu o Mesa Arizona. E 13 tausaga mulimuli ane ae avea Elder Cardon ma peresitene o le Misiona a Italia Roma. O le taimi lena, sa fananau ai le toafitu o le fanau e toavalu lea sa mai le iva masina i le 11 tausaga le matutua.

“O lena mea e tasi ua faamatalaina ai le tele o mea e uiga ia Sister Cardon,” sa fai mai ai Elder Cardon. “O lona faatuatua, alofa, onosai, ma le agalelei sa avea ma se faamanuiaga ofoofogia ia te au, i lo matou aiga, ma i latou uma e iloaina o ia.”

Mai le 2006 i le 2011, sa auauna atu ai ia Elder Cardon i le Au Peresitene o le Eria a Aferika i Sisifo, o se aafiaga sa ia faamatalaina o se “faamanuiaga ofoofogia le galulue ai ma tagata o e sa matou alolofa tele i ai.”

I lona olaga atoa, sa tuuto atu ai le tele o le taimi o Elder Cardon i galuega alofa faatasi ma aiga i le malo ma faavaomalo ma faalapotopotoga a autalavou.

Sa fanau mai ia Elder Cardon ia Wilford Pratt ma Vilate Allen Cardon i Mesa, Arizona, ISA, ia Tesema 1948. Ina ua maua se faailoga o le tagata malaga i mea tau tausi tusi mai le Iunivesite o le Setete o Arizona, sa fai ai sana lava pisinisi faatasi ai ma lona fiafia i le tele o mea tau pisinisi. Mulimuli ane sa maua sana MBA mai le Aoga a Kennedy o le Iunivesite o Harvard.

A o lei valaauina o ia o se Pulega Aoao, sa avea o ia o se peresitene o le korama a toeaina, faifeautalai a le siteki, peresitene o le misiona, epikopo, peresitene o le siteki, faiaoga o Aoaoga Faavae o le Talalalelei, ma se faiaoga o le inisitituti.

“O loo faapotopotoina e le Alii Ana fanau i le lalolagi atoa,” sa fai mai ai Elder Cardon. “Pe o a lava ni tulaga faaletagata lava ia, o le alofa tunoa o Iesu Keriso ua lava lea mo tagata uma e o mai ia te Ia.”