Linda K. Burton
Peresitene Aoao o le Aualofa
A o avea ma se talavou, sa i ai se mea na faafuasei ona iloa e Linda Kjar Burton i le taimi o se sauniga a le Ekalesia i Kalaiesetete, i Niu Sila. “Sa ou iloa e moni le talalelei,” sa ia manatua ai. “Sa ou nofouta foi ua leva lava ona ou iloaina.” O lena molimau o le a tumau lea ia te ia a o ia auauna ai o le peresitene aoao o le Aualofa.
Sa fanau i le Aai o Sate Leki, ISA, ia Marjorie C. ma Morris A. Kjar, sa 13 tausaga o Sister Burton ina ua tuua e lona aiga ia Iuta ina ia mafai ai ona pulefaamalumalu lona tama i le Misiona a Niu Sila i Saute. Sa auai ia Sister Burton—o le lona lua o le fanau e toaono—i le Kolisi a le Ekalesia i Niu Sila ma fegalegaleai ai ma talavou a le Au Paia o Aso e Gata Ai, mai le Pasefika atoa. Sa toe foi atu o ia i le Aai o Sate Leki e le gata o lona fiafia mo aganuu eseese ma tu masani ae faapitoa lava mo le Alii ma lona aiga.
A o auai ia Sister Burton i le Iunivesite o Iuta sa ia feiloai ai ma faaipoipo atu ia Craig P. Burton ia Aokuso 1973 i le Malumalu o Sate Leki. Sa filifili le ulugalii ina ia le faatuai le amataina o se aiga; o le uluai tamaitiiti o le la fanau e toaono sa fanau i le toeitiiti ai atoa le tausaga mulimuli ane.
I le galulue faatasi ai ma lana tane, na mafai ai ona nofo o ia i le fale faatasi ma le fanau a o faigaluega [lana tane] i mea tau faatau fanua ma fale. O luitau o mea tautupe i le popofou [o le aiga] sa aoaoina ai le ulugalii ina ia vaai i le lumanai i se talitonuga “ona sa ma iloaina sa ma faia se mea faigata i le fesoasoani a le Alii,” sa ia faamalamalama mai ai.
Sa ō le aiga i ni tafaoga faigofie ma olioli i le mafuta faatasi. Sa auauna atu ia Sister Burton i Tamaitai Talavou, Peraimeri, ma le Aoga Sa faapea ai ma fono faatonu aoao a le Peraimeri ma le Aualofa. Sa la auauna faatasi ma lana tane a o pulefaamalumalu ai i le Misiona a Korea Seoul Sisifo mai le 2007 i le 2010. I le misiona, sa iloa ai e Sister Burton—e pei foi lava ona ia iloaina i tausaga na muamua atu i Niu Sila—o le alofa e sili atu lava i gagana ma aganuu.
Sa ia faamoemoe i lona tofiga fou o le a toe faaaoga ai se mea na ia aoaoina mai sana uo i Korea e faapea: “O le a latou lagonaina lou alofa.”