Epikopo Gary E. Stevenson
Epikopo Pulefaamalumalu
Sa saunoa mai ia Epikopo Gary Evan Stevenson sa ia faaaluina le tele o lona olaga e matauina ai galuega taua e faatino e epikopo i le salafa o le lalolagi. Sa ia fai mai, o lona tama sa avea “ma epikopo a o ou talavou, ma o lana auaunaga sa matua aafia ai lava au.”
I le tele o tulaga, e valaaulia ai e le tama o Epikopo Stevenson o ia la te o i asiasiga i se tasi o le silia ma le 60 tina ua maliliu a latou tane i la latou uarota. Mai lona tama, sa aoao ai e Epikopo Stevenson le auaunaga faaKeriso ma le tausia o i latou o e le tagolima. O na lesona, sa ia fai mai ai, o le a aoga lelei ia te ia i lona valaauga o le Epikopo Pulefaamalumalu o le Ekalesia.
“O epikopo o le Ekalesia o toa moni ia ia te au,” sa ia saunoa ai. “O aso taitasi uma latou te maua ai lava se aafiaga i tagata o le Ekalesia, aemaise lava i fanau ma alii talavou ma tamaitai talavou.”
Sa fanau mai ia Aokuso 1955 ia Evan N. ma Vera Jean Stevenson, sa soifua ae ia Epikopo Stevenson i se aiga sa tupuga mai ni tuaa paionia na i ai i le Vanu o Iuta.
A o avea ma se alii talavou, sa ia taliaina se valaauga e auauna atu i se misiona i Iapani. O lena tofiga sa toto ai i lona loto se alofa vāalalua mo Asia mo le faasoaina atu o le talalelei lea sa tumau i le oalga atoa.
Ina ua foi mai lana misiona, sa lesitala o ia i le Iunivesite o le Setete a Iuta. O iina sa ia feiloai ai (ma faafuasei ai ona ia faamamai ia) Lesa Jean Higley. Sa faaipoipo i laua ia Aperila 1979 i le Malumalu o Idaho Falls Idaho. E toafa le fanau a le Au Stevenson.
Sa maua e Epikopo Stevenson se faailoga i mea tau pulega o pisinisi ma mulimuli ane avea ma se tasi o e na faavaeina ma auauna atu o le peresitene o se kamupani gaosi masini faamalositino.
Sa ia auauna atu i le tele o valaauga o le Ekalesia, e aofia ai le fesoasoani i se au peresitene o le siteki, epikopo, ma le peresitene o le Misiona a Iapani Nagoya (2004–07). Sa valaauina o ia i le Korama Muamua a Fitugafulu i le 2008 ma auauna ai o se fesoasoani ma peresitene i le Eria a Asia Matu.