Elder Larry Echo Hawk
O Le Fitugafulu
Talu mai le aso i le 1972 lea na faalogo ai ia Elder Larry Echo Hawk ia Elder Spencer W. Kimball (1895–1985) o saunoa e uiga i le valoiaina o Tagatanuu o Amerika o ni taitai aoaoina, sa ia tuuto atu lona olaga i le “siitiaina o tagata.”
O se tagata o le Malo Pawnee (tagata Amerika mao’i), sa fanau mai Elder Echo Hawk i Cody, Wyoming, ISA, ia Aokuso 1948 ia Ernest ma Jane Echo Hawk. Sa ia tuputupu ae i Farmington, Mekisiko Fou, ISA, lea na aoaoina ai o ia ma lona aiga ma papatisoina ai e faifeautalai AAG i le 1962.
I le 17 o ona tausaga, ina ua uma ona lavea lona mata i se pesipolo, sa ia folafola atu ai i le Alii afai o le a le maumaua lana vaai, o le a ia faitaua le Tusi a Mamona. Sa ia toe maua le aoga o lona fofoga ma faitau ia itulau e 10 i aso uma mo le toeitiiti atoa le tolu masina.
“O le aafiaga faaleagaga sili lea ona mamana na ia maua, ina ua molimau mai le Agaga Paia ia te au e moni le Tusi a Mamona,” sa fai mai ai ia Elder Echo Hawk. “O lena aafiaga sa faamanaina ai au i lou olaga atoa e fesoasoani ai ia ou lelei atili.”
Sa auai o ia i le Iunivesite o Polika Iaga–Provo i se sikolasipi lakapi ma maua ai ona faailoga i aoaoga tau taaloga ma suesuega tau manu. I le 1970 sa faamaloloina ai o ia ma le mamalu mai le United States Marine Corps ina ua mavae le lua tausaga o auaunaga. Sa faauu o ia mai le Iunivesite o Iuta faatasi ma se faailoga o le faafomai i le 1973.
Sa auauna atu Elder Echo Hawk o se loia, o se sui lesitala o le setete, o se loia sili o le setete, se polofesa o tulafono i le BYU, ma le Failautusi Lagolago o le Department of the Interior for Indian Affairs—o se tofiga o le a ia faamavae i ai ina ia talia ai le valaauga i le Korama Muamua o Fitugafulu.
Sa taitaia e Elder Kimball le faaipoipoga a Elder Echo Hawk ma lona faletua, o Terry Pries, i le Malumalu o Sate Leki ia Tesema 1968. Sa ia faatasi ma ia i ona tafatafa a o ia auauna atu o se faiaoga, epikopo, fautua maualuga, ma peresitene o le siteki. O i laua o matua i fanau e toaono.