Konafesi Aoao Faaletausaga Lona 182 ua Aofia ai Suiga o Taitai i le Au Fitugafulu, Au Epikopo, ma le Aualofa
“E le mafai ona tatou i ai uma i lalo o le taualuga e tasi,” sa saunoa ai Peresitene Thomas S. Monson, le Peresitene o le Ekalesia, i le sauniga amata o le Konafesi Aoao Faaletausaga Lona 182 i le aso 31 o Mati, 2012, “ae o lea ua tatou maua le gafatia e auai ai i taualumaga o lenei konafesi e ala i le ofoofogia o televise, leitio, keipo, fesootaiga faasatelite, ma le Initoneti—e oo lava i masini feaveai. Ua tatou o mai faatasi, e tautatala i le tele o gagana, nonofo i le tele o atunuu, ae ua tasi uma i le faatuatua e tasi ma le aoaoga faavae e tasi ma le faamoemoega e tasi.”
Sa moni lena faamatalaga i le silia ai ma le 100,000 tagata sa auai i sauniga o le konafesi aoao i le Nofoaga Autu mo Konafesi i le Aai o Sate Leki, Iuta, ISA, i le aso 31 o Mati ma le aso 1 o Aperila ma le faitau miliona sa maimoa pe faalogologo foi e ala i TV, leitio, satelite, ma faasalalauga i le Initoneti. I va o faasalalauga tuusao ma faasalalauga mulimuli ane, sa auai ai pe o le a auai ai tagata o le ekalesia ma isi i le lalolagi atoa i gagana e 94.
E oo foi lava a o lei amataina le konafesi aoao, e toatele tagata o le Ekalesia sa faaaogaina nei tekinolosi faaonapo nei e valaaulia ai isi e auai i le konafesi. O vaega fou, tagavai, ma faamatalaga manino sa faalauiloaina ia Mati, ua maua i le tele o gagana, o le a tuu i luga o le conference.lds.org i vaiaso a o lumanai ai konafesi aoao taitasi.
Sa faia ni nai suiga i le Taitaiga o le Ekalesia i le taimi o le sauniga o le aoauli o le Aso Toonai; faatasi ai ma i latou na faamaloloina o sui o le Au Epikopo Pulefaamalumalu ma le au peresitene aoao o le Aualofa. Sa faamaloloina ia Elder Steven E. Snow mai le Au Peresitene o Fitugafulu; sa faamaloloina foi ia Fitugafulu Eria e 37. Mo le lisi atoa o le lagolagoina ma le faamaloloina o tofiga, tagai i le itulau e 27.
O i latou na valaauina e avea ma Au Epikopo Pulefaamalumalu o Gary E. Stevenson, Epikopo Pulefaamalumalu; Gérald Caussé, Fesoasoani Muamua; ma Dean M. Davies, Fesoasoani Lua. O e na valaauina e avea ma au peresitene aoao fou o le Aualofa o Linda K. Burton, peresitene; Carole M. Stephens, fesoasoani muamua; ma Linda S. Reeves, fesoasoani lua.
O Elder Richard J. Maynes o le Korama Muamua a Fitugafulu sa valaauina e avea ma se tasi o le Au Peresitene o Fitugafulu.
O i latou ua valaauina e avea ma uso o le Korama Muamua a Fitugafulu o Elder Larry Echo Hawk, Elder Robert C. Gay, ma Elder Scott D. Whiting. O e na valaauina mai le Korama Lua a Fitugafulu i le Korama Muamua o Elder Craig A. Cardon ma Elder Stanley G. Ellis.
Sa auauna faatasi atu ia Epikopo H. David Burton ma ona fesoasoani i le Au Epikopo Pulefaamalumalu mo le silia ma le 16 tausaga. E ui sa i ai ni Epikopo Pulefaamamalu na umi atu se taimi na auauna ai, ae e leai se Au Epikopo Pulefaamalumalu na auauna faatasi atu e umi atu nai lo i latou.
Faitau i talaaga o i latou faatoa valaauina i le amataga o le itulau e 135.
I le konafesi, sa faia ai ni suiga i le taitaiga o le Ekalesia i le taimi o le sauniga o le aoauli o le Aso Toonai; faatasi ai ma i latou sa valaauina, o uso o le Au Epikopo Pulefaamalumalu ma le au peresitene aoao o le Aualofa. Sa valaauina ia Elder Richard J. Maynes i le Au Peresitene o Fitugafulu; sa valaauina ai foi ia Fitugafulu Eria e 40.