Elder Robert C. Gay
O Le Fitugafulu
I ona tofiga faale-Ekalesia, e tele lava ina lauga ia Elder Robert Christopher Gay e faatatau i le savali a Iesu Keriso o “se talalelei o le faaolataga.”
“O le mea lena sa ma vaaia ma oo i ai i lo ma olaga atoa,” sa fai mai ai ia Elder Gay, a o faatatau ia te ia lava ma lona faletua, o Lynette Nielsen Gay. “Tatou te tapuai atu i le Atua o le faaolataga: faaleagaga, faaletino, faalemafaufau, ma faalelagona. E ala mai i le Togiola a Keriso, o le a mafai ai ona aveesea a tatou avega uma. E ala mai ia te Ia, tatou te maua ai le malosi, filemu, ma le alofa tunoa lea e manaomia e onosaia ai tofotofoga o le olaga ma toe foi atu ai i lo tatou Tama Faalelagi.”
Sa maua e Elder Gay lona faamalieina naua mai le auaunaga o galuega alofa sa faamanuiaina ai o ia ma Sister Gay e ofo atu, i vaega mamao ma latalata atu i le aiga. Mo se faataitaiga, a o lei auauna atu o ia ma ina ua maea foi ona auauna atu o se peresitene o le Misiona a Accra Ghana mai le 2004 i le 2007, sa galulue ai o ia ma Sister Gay i nuu o tagata Aferika ma soo se mea lava e fausia ai aoga ma falemai ma fesoasoani e atiae ia polokalama o le iloa faitautusi ma nonoga tupe laiti mo tagata matitiva. Ua fesoasoani ia faalapotopotoga sa latou faavaeina ma isi paaga e siitia le faitau miliona o tagata matitiva i le lalolagi atoa.
Sa fanau mai i le 1951 i Los Angeles, Kalefonia, ISA, ia Bill ma Mary Gay, sa faafeiloai atu i lona faletua i le lumanai e se uo lelei mai le aoga maualuga lea na la mulimuli ane fesoasoani ia te ia e auai i le Ekalesia. Sa la faaipoipo i le Malumalu o Los Angeles Kalefonia ia Aperila 1974 ma e toafitu le la fanau.
Sa maua le faailoga o le tagata malaga a Elder Gay mai le Iunivesite o Iuta ma se faailoga faafomai mai le Iunivesite o Harvard, lea sa ia aoao atu ai foi mataupu tautupe.
I le aafia ai i pisinisi patino o fefaatauaiga o oloa mo le silia ma le 25 tausaga, sa galue ai Elder Gay faavaomalo e saofagā atu ma faatupulaia ia pisinisi.
I le taimi na valaau ai o ia i le Korama Muamua a Fitugafulu, sa auauna atu o ia o se Fitugafulu Eria i le Eria o Amerika Matu Sautesasae. E faaopoopo atu i le avea ai ma se faifeautalai faamisiona i Sepania mai le 1971 i le 1973, sa avea foi ia Elder Gay ma se fesoasoani o se epikopo, fautua maualuga, taitai vaega o faitaulaga sili, faiaoga o Aoaoga Faavae o le Talalelei, taitai misiona a le uarota, ma peresitene o Alii Talavou.