Elder Stanley G. Ellis
O Le Fitugafulu
Sa silafia e Elder Stanley Gareld Ellis e leai se tasi e mafai ona faamaonia le i ai o le Atua i tulaga faasaienitisi, ae o le Iunivesite o Harvard sa ia iloa ai e mafai ona ia faamaoniaina le i ai o le Atua e ala i le tofotofoina o Ana folafolaga. I le ogatotonu o lona tausaga muamua, sa leai ai sana tupe ae sa maua sana galuega e fesoasoani e totogi ai mea na te faaaogaina. E ui sa ia masalosalo e mafai ona ia totogiina le sefuluai ma mafai pea ona totogiina mea uma na te faaaogaina, ae sa ia filifili pea e “tofotofo” le Alii (tagai i le Malaki 3:10).
“Sa ou totogi muamua lau sefuluai, ma sa tupu se vavega,” sa saunoa ai Elder Ellis, o lē faatoa valaauina mai le Korama Lua a Fitugafulu i le Korama Muamua. “Sa aulia atu ai le isi totogi. Ma sa tupu lena mea i vaiaso tailua uma mo le semesa atoa. E ala i le tofotofoina o le Alii, ou te faamautu atu ai lau molimau e moni lava o Ia ma Na te tausia Ana folafolaga.”
Sa fanau mai ia Elder Ellis ia Stephen ma Hazel Ellis ia Ianuari 1947 i Burley, Idaho, ISA, ma soifua ae ai i se faatoaga ma se lafu manu. Ina ua maea se tausaga i Harvard sa ia auauna atu i le Misiona a Pasila mai le 1966 i le 1968. Ina ua toe foi mai o ia, sa ia faaipoipo atu ia Kathryn Kloepfer ia Iuni 1969 i le Malumalu o Los Angeles Kalefonia. O i laua o matua o fanau e toaiva.
Na sosoo ai ma lona faauuga mai Harvard, lea sa ia maua ai se faailoga o le tagata malaga i mea tau faigamalo, sa ia maua ai se faailoga faaloia mai le Iunivesite o Polika Iaga. Sa galue ia Elder Ellis i mea tau fuafuaga o lafoga ma avea ai ma pule sili o se kamupani faufautua o mea tautupe.
A o lei valaauina o ia i le Korama Muamua o Fitugafulu, sa auauna atu ia Elder Ellis i au peresitene o Eria o Amerika Matu Sautesisifo, Eria o Pasila Matu, Eria o Pasila, ma le Komiti o le Suiga o Tuaoi ma le Taitaiga. Mai le 1999 i le 2002 sa avea ai o ia ma peresitene o le Misiona a Pasila São Paulo Matu. Sa avea foi o ia ma se peresitene o le siteki, fesoasoani i se au peresitene o le siteki, fautua maualuga, fesoasoani i se au epikopo, peresitene o le korama a toeaina, ma peresitene o Alii Talavou a le uarota ma le siteki.