Faamatalaga Fou mo Tagata Tomai Faapitoa mo Tagata e Le Atoatoa le Malosi ua Faaopoopoina i le LDS.org
Sa tausia e Julie Brink o Initiana, ISA, se tama teine e Logonoa ma sa auauna atu mo le tele o tausaga o se faaliliu mo le Gagana Fai Faailoga FaaAmerika i lana siteki. Sa tele foi tausaga o galue ia Elaine Allison o Arizona, ISA, o se faiaoga o aoga a le malo, lea sa ia fesootai tuusao ai pe fesootai foi e ala atu i isi tagata ma tamaiti e le atoatoa le malosi. Sa i ai foi se atalii o sona tuagane na i ai se tulaga le atoatoa o le mafaufau ma ni uo mafana sa mafatia mai le tele o le faamai sclerosis ma le ALS, po o le faamai o le Lou Gehrig.
E le i mafaufau lava ia Sister Brink po o Sister Allison ia i laua o ni “tagata tomai faapitoa” i le malo o tagata e le atoatoa le malosi ae o i laua uma o loo auauna atu o ni tagata tomai faapitoa mo tagata e le atoatoa le malosi a le siteki, o se valaauga lea sa faaopoopo ai le faamatalaga fou i le vaega o le Serving in the Church o le LDS.org i gagana e 10. (O le valaauga atonu o loo i ai i se tulaga faalesiteki pe faaleuarota po o, nofoaga o loo moomia uma ai, i le siteki ma le uarota.)
E ui o le valaauga o le tagata tomai faapitoa mo tagata e le atoatoa le malosi a le uarota po o le siteki o loo ta’ua puupuu i le Tusitaulima 2: Taitaiina o le Ekalesia, ae o nisi taitai o loo tau manatunatu po o a mea o aofia ai i lena valaauga.
“O loo i ai ia tulaga atonu e le o iloa ai e taitai o le uarota se manaoga pe iloa foi po o a mea e fai e tali atu ai i se manaoga patino pe a latou iloaina,” sa saunoa ai ia Christopher Phillip, pule o le Disability Services for the Church. “O loo tele tulaga e ono aoga ai se tagata tomai faapitoa mo tagata e le atoatoa le malosi, ae e le o iloaina e tagata uma o loo i ai lenei valaauga.
“E le o faamatalaina auiliili i lenei vaega i le initoneti o le Service in the Church mea uma e tatau ona faia e se tagata i lenei valaauga,” sa ia faaauau ai, “ae o loo maua ai ni manatu ma punaoa ina ia mafai ai e se tagata o loo auauna i lenei tofiga ona fesoasoani i taitai, faiaoga, ma aiga o loo i ai faafitauli e faatatau i tagata e le atoatoa le malosi.”
O faamatalaga ua tuu i luga o le LDS.org i gagana e 10 ua taulai atu i le auala e mafai ai ona fesoasoani atu ia tagata tomai faapitoa i taitai o le uarota ma le siteki:
-
Ia faailoa ma ia faamasani ma tagata taitoatasi e le atoatoa le malosi ma o latou aiga i totonu o le uarota po o le siteki.
-
Faaaofia ia tagata e le atoatoa le malosi i fonotaga ma gaoioiga.
-
Tali atu i fesili ma popolega e faatatau i tagata e le atoatoa le malosi mai matua, taitai, ma isi tagata taitoatasi.
-
Faailoa ia avanoa anoa mo tagata e le atoatoa le malosi e auauna atu ai.
-
Faailoa ia manaoga patino o aiga (e aofia ai manaoga o le tausiaina) ma, pe a talafeagai ai, ia faailoa ni punaoa faalenuu, faaleuarota, ma faalesiteki o loo maua e fesoasoani ai i na manaoga.
E taua le iloa e le na o le tagata tomai faapitoa mo tagata e le atoatoa le malosi o loo faia nei mea. Ae, o lana matafaioi o le fesoasoani lea i isi taitai ia malamalama lelei ma auauna atu ia i latou e le atoatoa le malosi. Ma le isi, o le tagata tomai faapitoa foi e “fesoasoani i tagata taitoatasi ma matua o loo aafia i tagata le atoatoa le malosi e faasoa atu ni faamatalaga i tagata ma taitai o le uarota i se ala aoga.”
Ua fesoasoani le faamatalaga fou i le LDS.org i gagana e 10 ia i latou ua valaauina o ni tagata tomai faapitoa a le siteki mo tagata e le atoatoa le malosi ia faamalolosia tagata o le Ekalesia e le atoatoa le malosi.