O Le Avea o le Konafesi ma Vaega o o Tatou Olaga

Mafaufau e faaaoga nisi o nei gaoioiga ma fesili e fai ma vaega amata mo talanoaga faaleaiga po o mafaufauga loloto faaletagata lava ia.

O numera o le itulau o loo lisiina atu i lalo e faailoa atu ai le itulau muamua o le lauga.

Mo Tamaiti

Sa faasoa mai e Peresitene Dieter F. Uchtdorf ni upu se lua na te manao ia i tatou ia manatua pe a tatou lagonaina le faaosoosoina ia agaleaga atu i se tagata (itulau 70). E te manatua pe o a na upu e lua? Talanoa ma ou matua e uiga i nisi o amioga sa ia fautua mai ia i tatou e tuu. Mafaufau pe mafai faapefea ona avea atili oe e faapei o Iesu Keriso i le ala e te taulimaina ai isi.
Sa talanoa mai Elder Russell M. Nelson e uiga i le tele o tomai ofoofogia o o tatou tino faaletino (itulau 77), ma Elder Ronald A. Rasband sa aoao mai e alofa lo tatou Tama Faalelagi ia i tatou e tusa lava pe le atoatoa o tatou tino (itulau 80). O a ni ou lagona i le i ai o se tino? Mafaufau e uiga i mea eseese uma e mafai ona fai e lou tino. Pe a fai au tatalo, mafaufau e uiga i mea e mafai ona e tau atu i le Tama Faalelagi e faafetai ai ia te Ia mo lenei meaalofa.

Mo Le Autalavou

Pe e te iloaina ia tagata na fesiligia ia fesili e tolu ia na lisiina e le perofeta i lana saunoaga i le sauniga o le taeao o le Aso Sa (itulau 90): “O fea sa tatou o mai ai? Aisea ua tatou i ai iinei? O fea tatou te o i ai pe a tatou tuua lenei olaga?” Faitau i ana tali i na fesili ma mafaufau e uiga i ala e ono mafai ona e faasoa atu ai na upumoni i tagata latou te lei mauaina lava.
O nisi tagata e le o malamalama lava e talitonu ma mulimuli le Au Paia o Aso e Gata Ai ia Iesu Keriso. Faitau le lauga a Elder Dallin H. Oaks, “Taulaga,” ma mafaufau i lenei faamatalaga: “o o tatou olaga o le auauna atu o faaaliga aupito talafeagai ia o la tatou tautinoga e auauna atu i le Matai ma o tatou uso a tagata” (itulau 19). O le a le mea o tau atu e le ala o e ola ai i lou olaga e uiga i lau molimau o le Faaola?
Sa aoao mai ia Elder Quentin L. Cook, “Pe a le lagona e se tasi le musika o le faatuatua, o le a ia le lagonaina le Agaga” (itulau 41). Mafaufau pe faape’i le leo o se mea faifaaili pe a pa’ulua ma pe o le a se mea e mafua ai ona pa’ulua se mea faifaaili. O a ni mea patino e mafai ona e faia e aloese ai mai le “lē lagonaina o le musika o le faatuatua”?
E tele ni failauga i lenei konafesi sa talanoa mai e uiga i o latou aiga—e aofia ai aiga e le auai nisi i le ekalesia, aiga e i ai matua nofotoatasi, ma aiga o loo feagai ma soo se ituaiga o faigata. O a mea na aoao mai ma talisapaia e nei failauga mai o latou aiga? O a ni mea e te fiafia ma talisapaia ai lou aiga? E mafai faapefea ona e saofaga atu ma siitia tagata o lou aiga?

Mo Tagata Matutua

Sa aoao mai ia Peresitene Boyd K. Packer, “O se tasi o mea sili ua mauaina o le tulaga faamatua o le tatou aoaoina sili lea o mea e taua moni lava mai i a tatou fanau nai lo mea na tatou aoaoina mai i o tatou matua” (itulau 6). Afai o oe o se matua, mafaufau i nisi o lesona taua na e maua mai lau fanau, ia pe afai foi e le o oe o se matua, mafaufau i ni lesona sa e aoaoina mai ni tamaiti e te iloaina. Mafaufau e faasoa atu na lesona—ma tulaga sa e aoaoina ai na lesona—i lou toalua, se uo, lau fanau, po o isi.
E mafai ona laveaiina i tatou mai le leaga pe a tatou liliu atu i aoaoga o tusitusiga paia, sa aoao mai ai ia Elder L. Tom Perry (itulau 94). Na faapefea e aoaoga mai tusitusiga paia ona fesoasoani e laveai oe? Na faapefea ona fesoasoani ia te oe e filifili le mea sao?
O nisi o lauga sa taulai atu i feagaiga, aemaise lava i feagaiga o le malumalu. Mafaufau i le mea na saunoa mai ai Elder Robert D. Hales: “Ia tatou fesili ifo i tatou lava ia i le faaata, ‘O fea o o’u tu ai i le tausiga o a’u feagaiga?’” (itulau 34). Mafaufau i lau tali ma atonu po o a mea e mafai ona e faia e tausia atili ai au feagaiga—ma valaaulia isi ia osia ma tausia a latou foi feagaiga.
Sa lauga Elder Jeffrey R. Holland (itulau 31), Elder Neil L. Andersen (itulau 111), ma isi e uiga i le avea ai ma soo ma le faagasologa o le o mai ia Keriso. O le a sa oe ia faagasologa o le avea ai ma soo o loo i ai? O a mea sa e aoaoina mai nei lauga po o isi lauga e uiga i le faaauau pea ona o mai ia Keriso?
“O la tatou poloaiga autu,” sa aoao mai ai ia Elder D. Todd Christofferson, “o le aoao atu lea o le talalelei a Iesu Keriso, Lana mataupu faavae, i le lalolagi atoa” (itulau 86). Ia iloilo le lauga a Elder Christofferson faapea ai foi ma le lauga a Elder Donald L. Hallstrom (itulau 13) ma mafaufau pe o le a le uiga o le talalelei a Iesu Keriso. O a ni avanoa o e mauaina i lou aiga, lou valaauga, ma au fegalegaleaiga [ma isi] e aoao atu ai?