Elder Craig A. Cardon

Sa Seventy

Si Elder Craig Allen Cardon, bag-ohay lang gitawag ngadto sa Unang Korum sa Seventy gikan sa Ikaduhang Korum, miila sa impluwensya sa Espiritu sa tanang maayong mga butang sa iyang kinabuhi.

“Ang akong inahan ug amahan mitabang kanako sa pag-ila sa tingog sa Espiritu sa dihang bata pa ko, sa pagkasayud unsa ang akong gibati,” siya mihinumdom. “Kana nga komunikasyon gikan sa Ginoo anaa sa tanan niadtong makugihong nagtinguha niini ug mahinungdanon niining talagsaong buhat.”

Human og misyon sa Italy, giminyoan ni Elder Cardon si Deborah Louise Dana niadtong Nobyembre 1970 sa Templo sa Mesa Arizona. Mga 13 lang ka tuig ang milabay, si Elder Cardon nahimong presidente sa Italy Rome Mission. Niadtong higayona, pito sa ilang walo ka anak ang natawo ug nanag-edad og siyam ka bulan hangtud 11 anyos.

“Kana lang daghan na kamo og mahibaloan kabahin ni Sister Cardon,” miingon si Elder Cardon. “Ang iyang hugot nga pagtuo, gugma, kamapailubon ug kamabination usa ka talagsaong panalangin alang nako, sa among pamilya, ug sa tanang nakaila kaniya.”

Gikan 2006 hangtud 2011, si Elder Cardon miserbisyo sa Kapangulohan sa Africa West Area, usa ka kasinatian nga iyang gihulagway nga “talagsaong panalangin nga makatrabaho uban sa gimahal.”

Sa tibuok niyang kinabuhi, si Elder Cardon migahin sa iyang panahon sa pagtabang sa mga tawo uban sa nasyonal ug internasyonal nga organisasyon sa pamilya ug mga kabatan-onan.

Si Elder Cardon natawo ngadto nila ni Wilford Pratt ug Vilate Allen Cardon sa Mesa, Arizona, USA, niadtong Disyembre 1948. Human maangkon ang bachelor’s degree sa accounting gikan sa Arizona State University, siya nagnegosyo. Sa wala madugay nakaangkon niya ang MPA gikan sa Harvard University’s Kennedy School.

Sa wala pa ang iyang calling isip General Authority, siya nagserbisyo isip elders quorum president, stake missionary, mission president, bishop, stake president, Gospel Doctrine teacher, ug institute instructor.

“Gipundok sa Ginoo ang Iyang anak sa tibuok kalibutan,” miingon si Elder Cardon. “Dili igsapayan ang indibidwal nga kahimtang, ang grasya ni Jesukristo paigo sa tanang moduol Kaniya.”