Paghimo sa Komperensya nga Kabahin sa Atong mga Kinabuhi

Hunahunaa ang paggamit sa pipila niini nga mga kalihokan ug mga pangutana isip pagsugod sa panaghisgutan o personal nga pagpamalandong.

Ang mga numero sa pahina nga gilista sa ubos nagpakita sa unang pahina sa pakigpulong.

Para sa mga Bata

Si Presidente Dieter F. Uchtdorf mipakigbahin og duha ka importante nga mga pulong nga gusto niyang atong hinumduman kon kita mobati nga gitintal nga dili magmabination sa usa ka tawo (pahina70). Nakahinumdom ba kamo unsa kadtong duha mga pulong? Pakigsulti sa inyong mga ginikanan bahin sa pipila ka kinaiya nga iyang gisugyot nga atong hunungon. Hunahunaa kon unsaon ninyo nga mas mahisama ni Jesukristo sa paagi sa inyong pagtagad sa uban.
Si Elder Russell M. Nelson naghisgot og daghang makapatingala nga mga abilidad sa atong pisikal nga lawas (pahina 77), ug si Elder Ronald A. Rasband mitudlo nga ang atong Langitnong Amahan nahigugma nato bisan og dili perpekto ang atong lawas (pahina 80). Unsay inyong gibati nga kamo dunay lawas? Hunahunaa ang tanang lain-laing mga butang nga mahimo sa inyong lawas. Kon mag-ampo mo, hunahunaa unsay inyong masulti ngadto sa Langitnong Amahan sa pagpasalamat Kaniya niini nga gasa.

Para sa mga Kabatan-onan

Nasayud ba mo nga ang mga tawo nga mangutana sa tulo ka pangutana nga gilista sa propeta sa iyang pakigpulong atol sa sesyon sa Dominggo sa buntag (pahina 90): “Diin man kita gikan? Nganong ania kita dinhi? Asa kita paingon human kita mobiya niini nga kinabuhi?” Basaha ang iyang mga tubag sa mga pangutana ug hunahunaa ang mga paagi nga kamo makabahin niadtong mga kamatuoran uban sa mga tawo nga wala pa niini.
Ang ubang mga tawo wala makasabut nga ang mga Santos sa Ulahing mga Adlaw nagtuo ug nagsunod ni Jesukristo. Basaha ang pakigpulong ni Elder Dallin H. Oaks, “Sakripisyo,” ug hunahunaa kini nga pamahayag: “Ang atong kinabuhi sa pagserbisyo ug pagsakripisyo mao ang labing tukma nga pahayag sa atong pasalig sa pagserbisyo sa Manluluwas ug sa atong isigkatawo” (pahina 19). Sa unsa nga paagi nga inyong pagkinabuhi nagsulti sa inyong pagpamatuod sa Manluluwas?
Si Elder Quentin L. Cook mitudlo, “Diin nagpabungol-bungol sa musika sa pagtuo, siya dili mahiangay sa Espiritu” (pahina 41). Hunahunaa kon unsay tingog sa instrumento nga wala maangay ug unsay hinungdan nga ang instrumento wala maangay. Unsa ang mga butang nga inyong mahimo aron kamo dili magpabungol-bungol sa musika sa pagtuo”?
Daghang mga mamumulong niini nga komperensya naghisgot sa ilang mga pamilya lakip na sa part-member nga mga pamilya, mga pamilya sa nag-inusarang nga ginikanan, ug mga pamilya nga nag-atubang og daghang kalisdanan. Unsa ang nakat-unan ug gipasalamatan niini nga mga mamumulong bahin sa ilang pamilya? Unsay inyong gimahal ug gipasalamatan sa inyoha? Sa unsang paagi kamo makatampo ug pagbayaw sa mga sakop sa inyong pamilya?

Para sa mga Hamtong

Si Presidente Boyd K. Packer mitudlo, “usa sa nindot nga madiskubrihan sa pagkaginikanan mao nga makat-on kita gikan sa atong mga anak kay sa atong mga ginikanan” (pahina 6). Kon kamo usa ka ginikanan, hunahunaa ang importante nga mga leksyon nga inyong nakuha gikan sa inyong mga anak o kon dili mo ginikanan, hunahunaa ang mga leksyon nga inyong nakat-unan gikan sa mga anak nga inyong nailhan. Hunahunaa ang pagpakigbahin niadtong mga leksyon—ug ang mga kahimtang diin kamo nakakat-on—uban sa inyong kapikas, higala, inyong mga anak, o uban.
Kita maluwas gikan sa dautan kon kita mosunod sa mga pagtulun-an sa mga kasulatan, tudlo ni Elder L. Tom Perry (pahina 94). Sa unsa nga paagi nga ang mga pagtulun-an gikan sa mga kasulatan nakatabang nga kamo maluwas? Sa unsa nga paagi nga kini nakatabang ninyo sa pagpili sa matarung?
Daghang mga pakigpulong naghisgot sa mga pakigsaad, ilabi na sa mga pakigsaad sa templo. Hunahunaa unsay gisulti ni Elder Robert D. Hales: “Pangutan-a ang inyong kaugalingon, “Asa nga dapit ako magpakabuhi sa akong mga pakigsaad?’” (pahina 34). Hunahunaa ang inyong mga tubag ug tingali unsay inyong mahimo pa sa pagtuman sa inyong mga pakigsaad ug sa pag-imbitar sa uban sa paghimo ug pagtuman sa ilaha.
Si Elder Jeffrey R. Holland (pahina 31), Elder Neil L. Andersen (pahina 111), ug ang uban naghisgot bahin sa pagkadisipulo ug sa proseso sa pagduol ngadto ni Kristo. Unsa man ang inyong kaugalingogn proseso sa pagkadisipulo? Unsa nga mga butang ang inyong nakat-unan gikan niini o sa ubang mga pakigpulong bahin sa pagpadayon sa pagduol ngadto sa Manluluwas?
“Butang kini nga aktong gihangop,” mitudlo si Elder D. Todd Christofferson, “mao ang pagtudlo sa ebanghelyo ni Jesukristo, sa Iyang doktrina, sa tibuok kalibutan” (pahina 86). Ribyuha ang pakigpulong ni Elder Christofferson ingon man usa kang Elder Donald L. Hallstrom (pahina 13) ug hunahunaa unsa ang ebanghelyo ni Jesukristo. Unsa nga mga oportunidad ang naa ninyo diha sa inyong panimalay, sa inyong calling, ug sa inyong mga asosasyon sa pagtudlo niini?