Elder Richard J. Maynes

Sa Kapangulohan sa Seventy

“Ang tanang tawo sa tibuok kalibutan anak sa Dios, ug Siya patas nga naghigugma sa tanan Niyang mga anak,” miingon si Elder Richard John Maynes, bag-ong gitawag ngadto sa Kapangulohan sa Seventy. Niana, siya miingon, mao ang unang baruganan sa ebanghelyo nga iyang nahunahunaan samtang namalandong sa iyang dakong pagserbisyo, naglakip sa iyang mga buluhaton sa Uruguay, Paraguay, Mexico, Ecuador, Peru, ug sa Pilipinas.

“Ang mahangturong mga panalangin gikan sa pagdawat ug pagsunod sa gitudlo nga mga baruganan ni Jesukristo, sa katapusan mobayaw sa tanang mga anak sa Langitnong Amahan, bisan asa sila nagpuyo o bisan unsa nga mga hagit nga ilang giatubang niining panahon sa pagsulay,” siya midugang.

Si Elder Maynes, natawo niadtong Oktubre 1950 sa Berkeley, California, USA, ngadto nila ni Stan ug Betty Maynes, nagsugod sa iyang internasyonal nga pagserbisyo niadtong 1969 sa dihang siya nagserbisyo og full-time nga misyon sa Paraguay ug Uruguay hangtud 1971.

Iyang giminyoan si Nancy Purrington, nga iyang naila-ila samtang nagtrabaho sa usa ka resort sa Idaho, niadtong Agosto 1974 sa Templo sa Manti Utah. Sila adunay upat ka mga anak.

Si Elder Maynes migradwar sa samang tuig sa Brigham Young University sa business management ug sa wala madugay nakaangkon og MBA gikan sa Thunderbird School of Global Management. Siya ang tag-iya ug CEO sa usa ka kompaniya nga eksperto sa factory automation.

Si Elder Maynes nagserbisyo isip presidente sa Mexico Monterrey Mission gikan 1989 hangtud 1992. Siya gitawag isip General Authority niadtong 1997. Sukad niadto siya nagserbisyo sa kapangulohan sa South America Northwest, South America West, ug Philippines Areas. Nakaserbisyo usab siya sa Church’s Priesthood Executive Council, isip Assistant Executive Director sa Missionary Department, ug isip Executive Director sa Family History Department.

Siya gitawag niadtong Enero 20, 2012, nga moserbisyo sa Kapangulohan sa Seventy, mopuli ni Elder Steven E. Snow, kinsa gitawag isip Church Historian and Recorder.