Bag-ong Impormasyon alang sa mga Disability Specialists Gidugang diha sa LDS.org
Si Julie Brink nga taga-Indiana, USA, nagpadako og anak nga babaye nga Bungol ug nagserbisyo sa daghang katuigan isip American Sign Language interpreter sa iyang stake. Si Elaine Allison nga taga-Arizona, USA, dugay nang nagtrabaho isip magtutudlo sa publiko nga eskwelahan, diin may direkta siyang pakig-uban sa mga estudyanteng may mga kakulangan. Duna sab siyay pag-umangkon nga may Down syndrome ug suod nga mga higala nga nag-antus sa sakit nga multiple sclerosis ug ALS, o Lou Gehrig.
Sila si Sister Brink o Sister Allison wala mokonsiderar sa ilang kaugalingon nga mga “eksperto” diha sa pundok sa may mga kakulangan, hinoon sila nagserbisyo isip stake disability specialists, usa ka calling diin ang bag-ong impormasyon gidugang diha sa seksyon sa Serving in the Church sa LDS.org sa 10 ka pinulongan. (Ang calling unta naa usab sa stake o ward o, diin kining duha gikinahanglan.)
Bisan og ang calling sa ward o stake nga disability specialist daklit rang gihisgutan diha sa Handbook 2: Administering the Church, ang ubang lider naglibug kon unsa gayud kini nga calling.
“Dunay mga sitwasyon diin ang mga lider sa ward dili makamatikod sa panginahanglan o masayud unsay buhaton agig tubag sa partikular nga panginahanglan kon nakita nila kini,” miingon si Christopher Phillips, manager sa Disability Services sa Simbahan. “Dunay daghang sitwasyon diin ang disability specialist mapuslanon, apan dili tanan ang nakahibalo nga duna ba diay kini nga calling.
“Kining bag-o nga seksyon diha sa internet nga Serving in the Church wala maghatag og detalye sa tanang buhatunon niini nga calling,” mipadayon siya, “apan naghatag kini og mga ideya ug kapanguhaan aron ang nagserbisyo niini nga posisyon makatabang sa mga lider, magtutudlo, ug mga pamilya nga dunay mga problema sa kakulangan.”
Ang impormasyon nga gisulod sa LDS.org sa 10 ka pinulongan nag-focus sa unsang paagi makatabang ang mga specialist sa mga lider sa ward ug sa stake:
-
Pag-ila ug pagkaila sa mga tawo nga may kakulangan ug sa ilang mga pamilya diha sa ward o stake.
-
Pagpaapil sa mga miyembro nga may kakulangan diha sa mga miting ug kalihohan.
-
Pagtubag sa mga pangutana kabahin sa kakulangan ug problema gikan sa mga ginikanan, lider, ug ubang mga tawo.
-
Pag-ila sa makahuluganong mga oportunidad sa pagpaserbisyo sa mga miyembro nga may kakulangan.
-
Pag-ila sa pihong panginahanglan sa pamilya (lakip ang pag-atiman) ug, kon angay, pag-ila sa naa nga mga kapanguhaan sa komunidad, ward, ug stake nga ikatabang sa mga nanginahanglan.
Importanting hinumduman nga dili kay ang disability specialist ra ang mohimo niini. Hinoon, ang iyang tahas mao ang pagtabang sa ubang mga lider nga mas makasabut ug makaserbisyo sa may mga kakulangan. Agig dugang, ang disability specialist usab “motabang sa mga tawo ug ginikanan nga naapektuhan sa may kakulangan nga mopakigbahin sa impormasyon sa mga miyembro sa ward ug mga lider sa mapuslanong paagi.”
Ang Bag-ong impormasyon sa LDS.org sa 10 ka pinulongan makatabang sa mga gitawag isip stake disability specialists sa paglig-on sa mga miyembro sa Simbahan nga may mga kakulangan.