Linda K. Burton

Kinatibuk-ang Presidente sa Relief Society

Sa pagka-tin-edyer, may kalit nga naamguhan si Linda Kjar Burton atol sa usa ka miting sa Simbahan sa Christchurch, sa New Zealand. “Nahibalo ko nga tinuod ang ebanghelyo,” miingon siya. “Nakahibalo ko nga nasayud ako niini.” Kana nga pagpamatuod makasuporta sa iyang pagserbisyo karon isip kinatibuk-ang presidente sa Relief Society.

Natawo sa Siyudad sa Salt Lake, Utah, USA, kang Marjorie C. ug Morris A. Kjar, 13 anyos si Sister Burton dihang mibiya ang iyang pamilya sa Utah aron makadumala ang iyang papa sa New Zealand South Mission. Si Sister Burton—nga ikaduha sa unom ka anak—mieskwela sa Church College of New Zealand ug barkada sa mga Santos sa Ulahing mga Adlaw nga mga batan-on gikan sa Pasipiko. Mibalik siya sa Siyudad sa Salt Lake dala ang dili lamang gugma sa lain-laing kultura ug tradisyon apan sa labaw nga gugma alang sa Ginoo ug sa iyang pamilya.

Si Sister Burton nag-eskwela sa University of Utah dihang nahimamat ug naminyo kang Craig P. Burton niadtong Agosto 1973 sa Templo sa Salt Lake. Midisider ang magtiayon nga dili langayon ang pagsugod og pamilya; ang una sa unom nila ka anak natawo dayon sa wa pay tuig.

Nakigtambayayong sa iyang bana, nag-atiman ra siya sa mga bata samtang ang iyang bana nagtrabaho sa real estate. Ang sayo nga mga hagit sa panalapi nakatudlo kanila sa paglantaw sa ugma nga masaligon “kay nahibalo kami nga nalatasan namo ang kalisud uban sa tabang sa Ginoo,” mipasabut siya.

Ang pamilya may simpli lang nga mga pagbakasyon ug malingaw nga magkauban. Si Sister Burton nakaserbisyo sa Young Women, Primary, ug Sunday School ug sa Primary ug Relief Society general board. Kauban siyang miserbisyo dihang nangulo ang iyang bana sa Korea Seoul West Mission sugod 2007 hangud 2010. Didto sa misyon, naamguhan ni Sister Burton—sama sa unang katuigan sa New Zealand—nga ang gugma mopatigbabaw sa pinulongan ug kultura.

Nanghinaut siya nga sa bag-o niyang buluhaton iyang magamit pag-usab ang iyang nakat-unan gikan sa usa ka higala sa Korea: “Mobati sila sa imong gugma.”