O Mana o le Lagi
O i latou e umia le perisitua o ē talavou ma ē matutua e manaomia le pule ma le mana—le faatagaga e tatau ai ma le malosi faaleagaga e avea ai ma sui o le Atua i le galuega o le faaolataga.
Ou uso pele, ou te faafetai lava ina ua mafai ona tatou tapuai faatasi o se tino tele o e umia le perisitua. Ou te alofa ma talisapaia outou i lo outou agavaa ma a outou uunaiga mo le lelei i le lalolagi atoa.
Ou te valaaulia outou taitoatasi e mafaufau pe faapefea ona e tali atu i fesili nei na tuuina atu i tagata o le Ekalesia i le tele o tausaga ua mavae e Peresitene Tavita O. MaKei: “Afai e talosagaina outou taitoatasi e faaupu mai i se fuaiupu po o se fasifuaitau se tasi le mea aupito taua o Le Ekalesia a Iesu Keriso o le Au Paia o Aso e Gata Ai, mata o le a lau tali?” (“The Mission of the Church and Its Members,” Improvement Era, Nov. 1956, 781).
O le tali na tuuina mai e Peresitene MaKei i lana lava fesili o le “pule paia” o le perisitua. E tu ese lava le Ekalesia a Iesu Keriso o le Au Paia o Aso e Gata Ai mai isi ekalesia o loo fai mai o la latou pule e tuufaasolo mai lea tagata i lea tagata, o tusitusiga paia, po o aoaoga faafaifeau. Tatou te faia le tautinoga ma’oti o le pule o le perisitua na faaee mai e ala i le faaee mai o lima na tuusao mai e avefeau faalelagi i le Perofeta o Iosefa Samita.
O la’u savali e taulai atu i lenei perisitua paia ma mana o le lagi. Ou te tatalo faatauanau mo le fesoasoani mai o le Agaga o le Alii a o tatou aoaoina faatasi nei upumoni taua.
Pule o le Perisitua ma le Mana
O le perisitua o le pule a le Atua ua faamatuu mai i alii i le fogaeleele e galulue ai i mea uma mo le faaolataga o le tagata (tagai i le Spencer W. Kimball, “The Example of Abraham,” Ensign, June 1975, 3). O le perisitua o le auala lea e galue ai le Alii e ala i tama tane e laveai agaga. O se tasi o mata iloga o le Ekalesia a Iesu Keriso, e le gata i aso anamua ae faapea foi i ona po nei, o Lana pule. E le mafai lava ona i ai se Ekalesia moni e aunoa ma le pule paia.
Ua tuuina atu i alii e le taualoa le pule o le perisitua. O le agavaa ma le naunautai—e le o le poto masani, tomai, po o le a’oga—o agavaa ia e faauu ai i le perisitua.
O le mamanu mo le mauaina o le pule o le perisitua o loo faamatala mai i le mataupu faavae lona lima o le faatuatua: “Matou te talitonu e ao ina valaauina se tagata e le Atua, e ala i le valoaga, ma ala i le faaeega o lima o i latou o e o i ai le pule, e tala’i atu ai le Talalelei ma faia sauniga o i ai.” O lea, e mauaina e se tama [boy] po o se alii le pule o le perisitua ma ua faauuina i se tofi patino e se tasi ua umia le perisitua ma ua faatagaina e se taitai e i ai ki e tatau ai o le perisitua.
E faamoemoe i se tasi e umia le perisitua, na te faaaogaina lenei pule paia e tusa ai ma le mafaufau, finagalo, ma faamoemoega o le Atua. E leai se mea o faatatau faapea e faapito’au le perisitua. O le perisitua e faaaogaina i taimi uma e auauna atu ai, faamanuia, ma faamalolosia ai isi tagata.
O le perisitua maualuga, e mauaina i se feagaiga paia e aofia ai le matafaioi e galue ai i le pule (tagai i le MF&F 68:8) ma le tofi (tagai i le MF&F 107:99) lea ua mauaina. I le avea ai ma e e tauaveina le pule paia a le Atua, o i tatou o sui e galulue ai ae le o ni meafaitino e faatalitali se’i tau galueaiina (tagai i le 2 Nifae 2:26). O le perisitua e galue lava ia ae le tau faagalueaiina.
Na aoao mai e Peresitene Ezra Taft Benson:
“E le lava le mauaina o le perisitua ona nofonofo lea ma faatalitali sei eueu mai i tatou e se tasi e galulue. A tatou mauaina le perisitua, ua ia i tatou le matafaioi e galulue punouai ai ma le naunautai i le faalauiloaina o le faavae o le amiotonu i le lalolagi, aua fai mai le Alii:
“‘… O ia o le e le faia e ia se mea seia poloaiina ai o ia, ma talia se poloaiga ma le loto masalosalo, ma ia tausia ma le paie, o ia lava lea e tausalaina’ [MF&F 58:29]” (So Shall Ye Reap [1960], 21).
Na faamamafa mai foi ma le alofa e Peresitene Spencer W. Kimball le natura moni o le perisitua: “E solia e se tasi le feagaiga o le perisitua e ala i le solia o poloaiga— ae faapena foi i le le faia o tiute. O lona uiga, na o le le faia lava e se tasi o se mea, e solia ai lenei feagaiga” (O Le Vavega o le Faamagalo Atu [1969], 96).
A tatou faia le mea sili tatou te mafaia e faataunuu ai o tatou tiute o le perisitua, e mafai ona faamanuiaina i tatou i le mana o le perisitua. O le mana o le perisitua, o le mana lea o le Atua e faagaoioi ai e ala i alii ma tama [boys] e faapei o i tatou ma e manaomia ai le amiotonu o le tagata lava ia, faamaoni, usiusitai, ma le maelega. E mafai e se tama po o se alii ona maua le pule o le perisitua e ala i le faaeeina atu o lima, ae o le a leai se mana o le perisitua pe afai e le usiusitai; e le agavaa, pe le naunau e tautua.
“O aia a le perisitua ua fesootai e le mavavaeeseina ma mana o le lagi, ma … o mana o le lagi e le mafai ona pulea pe faaaogaina tau lava i mataupu autu o le amiotonu.
“Atonu e mafai ona faaee mai i latou i luga o i tatou, e moni; ae a tatou taumafai e ufiufi a tatou agasala, pe faamalie lo tatou faamaualuga, lo tatou fia lauiloa le aoga, pe faaaoga ai le pule po o le puleaga po o le faamalosi i luga o agaga o le fanauga a tagata, i soo se tikeri o le amioletonu, faauta, e aveese e le lagi i latou lava; e faanoanoa le Agaga o le Alii; ma a aveesea, Amene i le perisitua po o le pule a lena tagata” (MF&F 121:36–37; faaopoopo le faamamafa).
Uso e, mo se tama po o se alii ia mauaina le pule o le perisitua ae faatamala i le le faia o mea e tatau ai ina ia agavaa ai mo le mana o le perisitua, e le taliaina e le Alii. O i latou e umia le perisitua o ē talavou ma ē matutua e manaomia le pule ma le mana—le faatagaga e tatau ai ma le malosi faaleagaga e avea ai ma sui o le Atua i le galuega o le faaolataga.
O Se Lesona mai i Lo’u Tama
Sa ou ola ae i se aiga e i ai se tina faamaoni ma se tama ofoofogia. O lo’u tina e tupuga mai i paionia o e sa ositaulagaina mea uma mo le Ekalesia ma le malo o le Atua. O lo’u tama e le o se tagata o la tatou Ekalesia, ma a o talavou o ia, sa manao o ia e avea ma se patele o le Lotu Katoliko. Na iu ina ia filifili e le alu i se seminalio faafaifeau, ae sa ia tulimata’ia se matata o se tagata e gaosia meafaigaluega ma vali.
O le tele o lona olaga faaipoipo, sa auai ai lo’u tama i sauniga a Le Ekalesia a Iesu Keriso o le Au Paia o Aso e Gata Ai, ma lo matou aiga. O le mea moni, o le toatele o tagata o la matou uarota sa matua le iloa lava o lo’u tama e le o se tagata o le Ekalesia. Sa taalo o ia ma faiaoga i le au sofipolo a le matou uarota, sa fesoasoani i gaoioiga a le Sikauti, ma lagolagoina lo’u tina i ona tofiga ma tiutetauave eseese. Ou te fia ta’uina atu ia te outou se tasi o lesona silisili sa ou aoaoina mai i lo’u tama e uiga i le pule ma le mana o le perisitua.
A o ou laitiiti, sa tele taimi ou te fesili ai i lo’u tama i vaiaso taitasi po o afea e papatiso ai. Sa tali mai o ia ma le alofa ae mausali i taimi uma ou te faasoesa ai ia te ia: “David, o le a ou le auai lava i le Ekalesia ona o lou tina, po o oe, po o se isi lava tagata. O le a ou auai i le Ekalesia pe a ou iloa o le mea sa’o lea e fai.”
Ou te talitonu o le sefulu ma ona tupu o o’u tausaga na fai ai la ma’ua talanoaga lea ma lo’u tama. Faatoa o matou foi mai lava i le fale sa matou auai faatasi i la matou lotu i le Aso Sa, ma sa ou fesili ai i lo’u tama po o afea e papatiso ai. Sa ataata o ia ma fai mai, “O oe lava lea e fesili pea lava pea i lo’u papatisoga. O le asō, e i ai la’u fesili mo oe.” Sa vave ma sa ou sagisagi fiafia ma la’u faaiuga faapea, o lea ua agaigai i luma!
Sa faaauau le tala a lo’u tama, “David, e aoao e la outou ekalesia faapea na aveesea le perisitua mai le lalolagi anamua, ma sa toefuatai mai e avefeau faalelagi i le Perofeta o Iosefa Samita, e sa’o?” Sa ou tali atu e sa’o lana tala. Ona ia fai mai lea, “O la’u fesili la lea. O vaiaso taitasi i sauniga a le au perisitua, ou te faalogo ai i le epikopo ma isi taitai perisitua o faamanatu, tauanau, ma aioi atu i alii e fai a latou asiasiga i aiga ma faataunuu o latou tiute faaleperisitua. Afai la e i ai moni i la outou ekalesia le perisitua toefuataiina a le Atua, aisea ua matuai toatele ai alii i la outou lotu e leai se eseesega i le faia o o latou tiute faalelotu nai lo tamaloloa o la’u lotu?” Na vave ona leai se mea i lo’u mafaufau i lena taimi. Sa leai sa’u tali talafeagai mo lo’u tama.
Ou te talitonu sa sese lo’u tama i le faamasinoina o le moni o le aia tatau a la tatou Ekalesia i le pule paia ona o faaletonu o tagata o loo mafuta i ai o ia i la matou uarota. Ae sa i ai i lana fesili se mate sa’o e faapea, o alii o loo tauaveina le perisitua paia a le Atua e tatau ona ese mai isi tagata. O alii e umia le perisitua, e le faapea e ola mai i latou e ese nai lo isi alii, ae e tatau ona ese a latou amioga. O alii e umia le perisitua e le gata e tatau ona umia le pule o le perisitua, ae ia agavaa foi e avea ma meafaigaluega o le mana o le Atua. “Ia mama outou o e e tauaaoina ipu a le Alii” (MF&F 38:42).
E le galo lava ia te au ia lesona e uiga i le pule ma le mana o le perisitua sa ou aoaoina mai i lo’u tama, o se alii lelei e le auai i lo tatou faatuatuaga, ae sa tele mea na ia faamoemoeina mai alii fai mai o loo latou tauaveina le perisitua a le Atua. O lena talanoaga i le aoauli o le Aso Sa ma lo’u tama i le tele o tausaga ua mavae, na fua mai ai ia te a’u se naunautaiga ia avea o se “tama lelei.” Sa ou le manao e avea ma faataitaiga leaga ma se maagao i le alualu i luma o lo’u tama i le aoaoina o le talalelei toefuataiina. Sa na ona ou manao lava ia avea o se tamaitiiti lelei. E manaomia e le Alii i tatou uma o ni ē tauaveina Lana pule o ni alii e faamamalu, amiomama, ma lelei i taimi uma ma i nofoaga uma.
Atonu tou te fia iloaina, ina ua mavae ni nai tausaga mulimuli ane, sa papatisoina lo’u tama. Ma i taimi ina ua talafeagai, sa ou maua le avanoa e faaee atu ai ia te ia le Perisitua Arona ma le Perisitua Mekisateko. O se tasi o aafiaga sili i lo’u olaga o le matauina lea o lo’u tama ua mauaina le pule, ma i’u ai ina maua le mana o le perisitua.
Ua ou faamatala atu ia te outou lenei lesona taua sa ou aoaoina mai i lo’u tama, e faamamafa atu ai se upumoni faigofie. O le mauaina o le pule o le perisitua e ala i le faaee atu o lima, o se amataga taua, ae e le lava ai. O le faauuga e faaee atu ai le pule, ae e manaomia le amiotonu e galue ai i le mana a o tatou taumafai e siitia agaga, e aoao atu ma tautino atu, e faamanuia ai ma fautuaina, ma faalautele le galuega o le faaolataga.
I lenei vaitau iloga o le talafaasolopito o le lalolagi, o oe ma a’u o ē umia le perisitua, e manaomia ona avea o ni alii amiotonu ma ni meafaigaluega mataalia i aao o le Atua. E manaomia ona tatou tutulai a’e o ni tagata o le Atua. O le a lelei mo oe ma a’u ona aoao mai ma gauai atu i le faataitaiga a Nifae, le atalii o le atalii o Helamana ma le tagata muamua o soo muamua e toasefululua na valaauina e le Faaola i le amataga o Lana galuega i tagata sa Nifae: “Ma e tele mea sa auauna atu ai [Nifae] ia te i latou. … Ma sa auauna atu Nifae i le mana ma le pule tele” (3 Nifae 7:17).
“Faamolemole Fesoasoani i Lo’u Toalua ia Malamalama”
I le faaiuga o faatalanoaga o pepa faataga o le malumalu sa ou faafoeina o se epikopo ma se peresitene o le siteki, e tele lava ina ou fesili i tuafafine ua faaipoipo pe mafai faapefea ona ou auauna ia i latou ma o latou aiga. O le fuatasi lava o tali sa ou mauaina mai na tamaitai lalelei, e aoga ma e maofa ai. E seāseā tomumu pe faitio tuafafine, ae e tele lava ina latou tali mai faapea: “Faamolemole fesoasoani i lo’u toalua ia malamalama i lona tiutetauave o se taitai perisitua i lo matou aiga. Ou te fiafia lava e taulamua i a matou suesuega o tusitusiga paia, tatalo faaleaiga, ma afiafi faaleaiga, ma o le a ou faia pea lava. Peitai ou te moomoo lava maimau e pe ana o se paaga tutusa i ma’ua ma lo’u toalua, ma tuuina mai le taitaiga faaleperisitua malosi lea e na o ia e mafai ona aumaia. Faamolemole fesoasoani i lo’u toalua e aoao ia avea ma se peteriaka ma se taitai perisitua i lo matou aiga, o lē e pulefaamalumalu ma puipuia.”
E tele taimi ou te mafaufau ai i le faamaoni o na tuafafine ma la latou talosaga. O loo faalogo foi taitai perisitua i atugaluga faapena i le taimi nei. E toatele ava o loo aioi mai mo ni tane e le gata ina i ai le pule o le perisitua ae faapea foi le mana o le perisitua. Latou te naunau mai ina ia tauave tutusa ma se tane faamaoni ma se soa faaleperisitua le galuega o le fatuina o se aiga e faatotonugalemu ia Keriso ma taulai atu i le talalelei.
Uso e, ou te folafola atu afai o le a tatou mafaufau loloto ma le agaga tatalo i aioiga a nei tuafafine, o le a fesoasoani le Agaga Paia tatou te vaai ai ia i tatou lava e pei ona tatou i ai moni (tagai i le MF&F 93:24) ma fesoasoani tatou te iloaina ai mea e tatau ona tatou suia ma faaleleia atili. Ma o le taimi e faatino ai, o nei lava!
Ia Avea ma Faataitaiga o le Amiotonu
O le po nei ou te toe faamamafa atu ai aoaoga a Peresitene Thomas S. Monson, o le sa valaauliaina i tatou o e o umiaina le perisitua ina ia avea ma “faataitaiga o le amiotonu.” Ua faatele ona ia faamanatu mai o loo tatou i ai i le feau a le Alii ma ua ia i tatou le aia tatau i Lana fesoasoani e faavae i lo tatou agavaa (tagai “O Faataitaiga o le Amiotonu,” Liahona, May 2008, 65–68). Ua tatou umia le pule o le perisitua lea na toe faafoi mai i le lalolagi i lenei tisipenisione e avefeau faalelagi, o Ioane le Papatiso ma Peteru, Iakopo, ma Ioane. O lea la, i alii uma ua mauaina le Perisitua Mekisateko, e mafai ona tosi sa’o i tua lona laina patino o le pule i le Alii o Iesu Keriso. Ou te faamoemoe o tatou maua le agaga faafetai mo lenei faamanuiaga ofoofogia. Ou te tatalo o le a tatou mama ma agavaa e avea ma sui o le Alii a o tatou faaaogaina lenei pule paia. Tau ina ia agavaa i tatou taitoatasi mo le mana o le perisitua.
Ou te molimau atu e moni lava o le pule paia o le perisitua ua toefuatai mai i le fogaeleele i nei aso e gata ai, ma o loo maua i Le Ekalesia a Iesu Keriso o le Au Paia o Aso e Gata Ai. Ou te molimau atu foi o Peresitene Thomas S. Monson o le faitaulaga sili pulefaamalumalu o le perisitua maualuga a le Ekalesia (tagai i le MF&F 107:9, 22, 65–66, 91–92) ma e na o le pau lea o le tagata i luga o le fogaeleele o loo umia ma ua faatagaina e faaaoga ia ki uma o le perisitua. Ou te molimau atu ai ma le paia a’ia’i i nei mea i le suafa paia o le Alii o Iesu Keriso, amene.