Ia Taofimau i Mea Paia
O mea paia ua tatau ona saga taulimaina ma le faaeteete, ma faaaloalo atili i ai, ma ia mafaufau i ai ma se migao loloto.
Pe a ma le 1,500 tausaga ao lei fanau mai Keriso, sa faalatalata atu ai se leoleo mamoe i le laau na mu i luga o le Mauga o Orepa. O lena fetaiaiga paia na amata ai le liuaina o Mose mai se leoleo mamoe i se perofeta ma lana galuega sa i ai o le leoleoina o mamoe, i le faapotopotoina o Isaraelu. O le afe tolu selau tausaga mulimuli ane, sa loloto se aafiaga na oo i se faitaulaga talavou faamanuiaina i totonu o le lotoa a le tupu ona o se molimau a se perofeta na tuu’aifuaina. O lena fetaiaiga na amatalia ai le tuputupu ae o Alema mai se auauna faalemalo i se auauna a le Atua. Pe a ma le 2,000 tausaga mulimuli ane, sa ulufale atu ai se tama talavou e 14 tausaga i le togavao e sailia se tali i se fesili faamaoni. O le tulaga na oo ia Iosefa Samita i le vao na tuuina ai o ia i le ala o le avea ma se perofeta ma se toefuataiga.
O Mose, Alema, ma Iosefa Samita na suia uma o latou olaga ina ua fetaiai ma mea paia. Na faamalolosia i latou e nei aafiaga ina ia tumau ma le faamaoni i le Alii ma Lana galuega i o latou olaga atoa, e ui i le tele o tulaga faafeagai ma luitau faigata mulimuli ane.
Atonu o o tatou aafiaga ma mea paia e le tuusao maia pe matua iloga, po o le taufaamata’u mai foi o o tatou luitau. Ae ui i lea, o le i ai o perofeta, o lo tatou malosi e tumau ai ma le faamaoni ua faalagolago lea i le iloaina, manatuaina, ma le taofimau i le paia o mea na tatou maua mai lugā.
O aso nei, ua toefuatai mai ai le pule, ki, ma sauniga i luga o le fogaeleele. Ua i ai foi ia tusitusiga paia ma molimau faapitoa. O i latou o e saili le Atua e mafai ona papatisoina mo le faamagaloina o agasala ma le faamauga “i le faaee atu o lima mo le papatisoga i le afi ma le Agaga Paia” (MF&F 20:41). O nei meaalofa taua toefuataiina, o a tatou fetaiaiga paia o le a tele lava ina aofia ai le tagata lona tolu o le Aiga Atua, o le Agaga Paia lea.
O se leo filemu ititiiti, e talanoa mai ai le Agaga ia te au
E taitai au, e puipui ma laveai a’u.
(“The Still Small Voice,” Children’s Songbook, 106)
Agaga e taitai mai;
Mea moni ta’u mai.
Molimau mai ia Iesu,
Faapupula i matou.
(“Agaga e Taitai Mai,” Viiga, nu. 78)
A o tatou saili atu i ni tali mai le Atua, tatou te lagonaina le musumusu mai o le leo, filemu itiiti i o tatou agaga. O nei lagona—o nei uunaiga—e tupufua mai ma maaleale ma e ono mafai ona tatou le amana’iaina ma taulai atu ai i mafuaaga po o le taumatemate. O nei savali e patino lava i le tagata e molimau mai i le alofa patino ma popolega o le Atua lava ia mo Ana fanau ma a latou misiona patino i le olaga nei. O le mafaufau i ai i aso uma ma tusitusia uunaiga ia e sau mai le Agaga e taulima ai faamoemoega uma e lua o le fesoasoani ia i tatou (1) ia iloa o tatou fetaiaiga patino ma mea paia ma le (2) ia teumalu ai mo i latou lava faapea a tatou fanau. O le tusiaina mo se faamamaluga ma se faailoaga aloaia lea o lo tatou lotofaafetai i le Atua, aua “ua leai se mea e faatausuai ai le tagata i le Atua, pe ua leai ni isi e faamumu faasaga i ai lona toasa, tau lava o i latou o e latou te le tautinoina lona aao i mea uma” (MF&F 59:21).
E tusa ai ma le mea ua tatou maua e ala i le Agaga, na fetalai mai le Alii: “Ia manatua o le mea e sau mai luga ua paia” (MF&F 63:64). O lana faamatalaga ua sili atu nai lo se faamanatu; o se faauigaga ma se faamalamalamaga foi. O le malamalama ma le poto mai le lagi e paia. Ua paia aua o le lagi lona autu.
O le paia o lona uiga o le agavaa e faamamalu ma faaaloalo i ai. O le atofaina o se mea e paia, ua faailoa mai ai e le Alii le tulaga maualuga o le faatauaina ma e faamuamua nai lo isi mea. O mea paia ua tatau ona saga taulimaina ma le faaeteete, ma faaaloalo atili i ai, ma ia mafaufau i ai ma se migao loloto. O le tulaga paia e maualuga i le faatulagaga o tulaga faatauaina faalelagi.
O mea e paia i le Atua e paia foi ia i tatou, i le na o le faaaogaina o le faitalia; e tatau i tagata taitoatasi ona filifili e talia ma taofimau i le paia o mea ia ua faauigaina e le Atua e paia. Na te auina mai le malamalama ma le poto mai le lagi. Ua Ia valaaulia i tatou ia mauaina ma taulimaina o se mea e paia.
Ae peitai “e i ai le faafeagai o mea uma” (2 Nifae 2:11). O le faafeagai o le paia o le upuleaga po o le faaleolaga nei—lea e faaletino pe faalelalolagi. E tauva e le aunoa mea faalelalolagi ma mea paia mo lo tatou gauai atu atoa ma mea tatou te faamuamua. O le malamalama faalelalolagi e taua i o tatou olaga faaletino i aso uma. Ua aoaoina i tatou e le Alii ia saili le aoaoina ma le poto, ia suesue ma aoao mai totonu o tusi sili ona lelei, ma ia faamasani i gagana, tautala, ma tagata (tagai i le MF&F 88:118; 90:15). O le mea lea, o filifiliga e tuu mea paia i luga atu o mea faalelalolagi o se mea e tatau ona faamuamua; e le faatapulaaina; “e lelei le aoaoina pe afai [tatou] te faalogologo i fautuaga a le Atua” (2 Nifae 9:29; faaopoopo le faamamafa).
O le taua faifai pea mo mea e faamuamua i le va o mea paia ma mea faalelalolagi i loto o tagata taitoatasi, ua mafai ona iloaina i le aafiaga o Mose i le laau na mu. O iina na maua ai e Mose lona valaauga paia mai ia Ieova ina ia laveai mai le fanauga o Isaraelu mai le nofo pologa. Peitai, o lona malamalama faalelalolagi i le amataga e uiga i le malosi o Aikupito faapea ma le farao na mafua ai lona masalosalo. Na iu lava ina filifili Mose e faatuatua i le afioga a le Alii, e faatoilalo lona malamalama faalelalolagi ma faalagolago atu i le tulaga paia. O lena talitonuga na ia maua ai le mana e faatoilalo ai tofotofoga faaletino ma taitai ese mai ai le fanauga a Isaraelu mai Aikupito.
Ina ua sola ese mai i autau a Noa, sa pau atu i lima o Amulona ma faapologaina ai, semanu e mafai lava ona le mautonu Alema i le molimau faaleagaga lea na ia mauaina a o faalogologo atu ia Apinati. Ae ui i lea, sa talitonu o ia i le paia, ma sa tuuina atu ai ia te ia le malosi e tumau ai ma sola ese ai mai ona tofotofoga le tumau.
Sa feagai Iosefa Samita ma se faigata tali tutusa i le popo fou o le faaliliuina o le Tusi a Mamona. Sa ia iloa le natura paia o papatusi ma le galuega o le faaliliuga. Ae sa faatauanauina pea o ia e Matini Harisi e tuu atu le faamuamua i popolega faalelalolagi o faigauo ma tupe, ia na feteenai ma faatonuga paia. O se taunuuga la, sa leiloloa ia tusitusiga o faaliliuga. Sa aoaiina e le Alii ia Iosefa mo le tuuina atu o “mea ua paia, i e amioleaga” (MF&F 10:9) ma sa aveesea mai ai ia te ia mo se taimi ia papatusi faapea ma le meaalofa e faaliliu ai. Ina ua toe faatulagaina lelei e Iosefa mea e tatau ona faamuamua, sa toe faafoi atu mea paia ia te ia ma sa faaauau ai le galuega.
O loo aumaia foi e le Tusi a Mamona nisi faataitaiga o tauiviga e tuu le faamuamua i mea e paia. O loo talanoa e uiga i tagata talitonu lea na taitaiina atu i latou e o latou faatuatua i le laau o le ola ina ia aai i lona fua paia, o le alofa lea o le Atua. Ae ona o le faatauemu mai o i latou i le fale tele ma gaogao na mafua ai ona sui le mea e taula’i i ai mai mea paia i mea faalelalolagi. (Tagai i le 1 Nifae 8:11, 24–28.) Mulimuli ane, sa filifili e sa Nifae le faamaualuga ma faafitia le agaga o valoaga ma faaaliga, “ma faatauemu i mea paia” (Helamana 4:12). Na oo lava i nisi o e sa vaai i faailoga ma vavega lea e o faatasi ma le fanau mai o le Alii sa filifili e teena faaaliga paia mai le lagi ae gauai atu i nisi o faamatalaga faalelalolagi (tagai i le 3 Nifae 2:1–3).
O loo faauau pea le tauiviga i le asō. Ua faatupulaia le aofai ma le malosi o leo faalelalolagi. Ua faateleina ona uunaia tagata talitonu e lafoai talitonuga ua manatu le lalolagi e faavalevalea ma lē faavaea. Ona “ua tatou vaai ai faanenefu i le faaata” (1 Korinito 13:12) ma ua “le iloa le uiga o mea uma” (1 Nifae 11:17), e i ai taimi atonu tatou te lagonaina le vaivai ma tatou manaomia ni faamautinoaga sili atu faaleagaga. Na ta’u atu e le Alii ia Oliva Kaotui:
“Afai e te manao i se isi molimau, liliu ane lou mafaufau i le po na e tagi mai ai ia te a’u i lou loto, ina ia mafai ona e iloa e uiga i le moni o nei mea.
“Ou te lei tautala atu ea le filemu i lou mafaufau e uiga i le mataupu? O le a se molimau sili atu e mafai ona e maua mai lo lena mai le Atua?” (MF&F 6:22–23).
Sa toe faamanatu mai e le Alii ia Oliva ma i tatou ina ia faalagolago i molimau patino ua uma ona mauaina, pe a luitauina lo tatou faatuatua. E faapei o Mose, Alema, ma Iosefa muamua, o nei fetaiaiga paia e avea ma taula faaleagaga tatou te saogalemu ai ma tumau ai i luga o le ala i taimi o tofotofoga.
E le mafai ona filifili e lafoai mea paia. O i latou o e filifili e lafoaia e oo lava i se mea paia e tasi, o le a faapouliuligia o latou mafaufau (tagai i le MF&F 84:54), ma seiloga ua latou salamo, o le a aveesea mai ia i latou lo latou malamalama (tagai i le MF&F 1:33). O le le taulaina i mea paia, o le a latou iloa ai mo i latou lava le felafoaiina e amioga le mama i se vasa faalelalolagi. O se faatusatusaga, o e filifili e taofi i mea paia, e mauaina folafolaga: “O le mea e mai i le Atua o le malamalama lea; ma o ia o le e mauaina le malamalama, ma tumau pea i le Atua, mauaina le malamalama atili; ma o lena malamalama o le a tupu susulu malamalama tele pea lava pea seia oo i le aso e atoatoa ai” (MF&F 50:24).
Ia faamanuiaina tatou e le Alii ina ia tatou iloa i taimi uma, manatua, ma taofimau i mea paia ia ua tatou maua mai lugā. Ou te molimau atu o lo tatou faia o ia mea, o le a tatou maua ai le malosi e onosaia ai ia tofotofoga ma manumalo ai i luitau o o tatou aso. I le suafa o Iesu Keriso, amene.