Paghimo sa Komperensya nga Kabahin sa Atong mga Kinabuhi

Hunahunaa ang paggamit sa pipila niini nga mga kalihokan ug mga pangutana isip pagsugod sa panaghisgutan o personal nga pagpamalandong.

Ang mga numero sa pahina nga gilista uban sa ideya nagpakita sa unang pahina sa pakigpulong.

Para sa mga Bata

Si Presidente Thomas S. Monson namulong sa kaimportante sa pagkamasulundon ug sa unsa nga paagi nga ang dili pagsunod kanunay adunay sangputanan (pahina 89). Paghunahuna og higayon nga inyong gisunod ang mga lagda sa pamilya. Ang panahon nga kami misunod sa mga lagda sa Dios? Unsay inyong gibati nga kamo nagmasulundon?
Si Elder M. Russell Ballard sa Korum sa Napulog Duha ka mga Apostoles miistorya sa gamay nga babaye kinsa mitanom og tamatis gikan sa gamay nga liso (pahina 18). Basaha o i-istorya pag-usab isip pamilya ug hisguti unsa ang gitudlo niini unsaon nga kamo mahisama sa Langitnong Amahan. Makahimo mo og tumong nga mas mahiduol ngadto sa Langitnong Amahan.
Si Elder Enrique R. Falabella sa Seventy namulong kon unsay makapalig-on sa mga pamilya (pahina 102). Mitudlo siya nga ang pinakaimportante nga mga pulong nga gamiton sa inyong pamilya mao ang “Gihigugma ko ikaw,” “Salamat kaayo nimo,” ug “Pasayloa ko.” Si Sister Rosemary M. Wixom, kinatibuk-ang presidente sa Primary, misugyot nga nag-ingon, “Gihigugma nako ang tanan bahin nimo” (pahina 81). Tan-awa unsay mahitabo kon inyong gamiton kini nga mga pulong sa inyong pamilya. Nakapalipay ba kini nila? Unsa ang inyong bation?

Para sa mga Kabatan-onan

Si Presidente Thomas S. Monson mitudlo og upat ka mga baruganan sa pagpangandam sa misyonaryo nga buhat—dili lang isip a full-time nga misyonaryo apan isip usa usab ka miyembro sa Simbahan (pahina 66). Mahimong tun-an ninyo ang iyang pakigpulong uban niini nga pangutana: Unsay akong mabuhat aron mahimong mas maayo nga misyonaryo karon?
Si Elder Jeffrey R. Holland sa Korum sa Napulog Duha ka mga Apostoles mitudlo nga OK ra nga magduha-duha ug dunay mga pangutana, apan mitudlo usab siya: “Panggunit og hugot sa unsay inyo nang nahibaloan ug barug nga malig-on hangtud moabut ang dugang nga kahibalo. … Pagmatinud-anon sa pagtuo nga anaa ninyo” (pahina 93). Isulat sa inyong journal ang mga pagtuo, pagpamatuod, ug ubang espirituhanong mga kasinatian nga inyong nasinati. Isulat usab ang inyong mga pangutana ug tipigi kini aron nga samtang kamo magbasa sa mga kasulatan ug niini nga isyu, makapangita kamo sa mga tubag.
Daghang mga mamumulong ang naghisgot sa pagkamasulundon ug sa mga panalangin niini. Pananglit, si Presidente Monson mitudlo, “Ang kahibalo sa kamatuoran ug ang mga tubag sa atong mga pangutana moabut kanato kon kita magmasulundon sa mga sugo sa Dios” (pahina 89). Siksika kini nga isyu sa pagpangita o pagsulat sa daghang mga panalangin sa pagkamasulundon. Ilha kini nga mga panalangin nga makadasig ninyo sa pagpadayon sa pagpuyo sa matarung nga paagi.
Daghang mga mamumulong ang mitudlo nga makaserbisyo kamo bisan unsang orasa, dili lang sa mga proyekto sa pagserbisyo. “Mangalagad sa matag adlaw,” gitudlo ni Brother David L. Beck, kinatibuk-ang presidente sa Young Men. “Ang oportunidad naa ra sa palibut.” Sa pakigpulong ni Brother Beck, mabasa ninyo ang mga ehemplo sa kabatan-onan nga nagserbisyo sa uban (pahina 55).

Para sa mga Hamtong

Daghang mga mamumulong ang mipamatuod ni Jesukristo. Unsay inyong makat-unan mahitungod sa Iyang balaan nga kinaiya, misyon, ug pangalagad gikan sa mga pakigpulong sa mga pahina 22, 70, 96, 99, ug 109?
Ang hilisgutan sa kurikulom sa kabatan-on sa Mayo mahitungod sa mga propeta ug pagpadayag. Kon kamo adunay mga batan-on sa simbahan o adunay tin-edyer nga mga anak, mahimo ninyong hisgutan uban nila ang kurikulom ug kini nga pangutana: Ngano nga importante ang pagpaminaw ug pagsunod sa buhi nga mga propeta? I-konsiderar ang pagtuon niini nga isyu sa pag-ila sa mga panagna ug mga pasidaan nga, kon patalinghugan, makatabang nato nga makalahutay sa masamok nga mga panahon.
Daghang mga mamumulong ang nag-focus sa pagpalig-on sa pamilya. Pananglit, si Elder Richard G. Scott sa Korum sa Napulog Duha ka mga Apostoles mitudlo, “Kon [ang Manluluwas] ang sentro sa inyong panimalay, adunay kalinaw ug kahilom” (pahina 29). Pangita og mga paagi nga ang Manluluwas mao ang sentro sa inyong panimalay samtang kamo magtuon sa pakigpulong ni Elder Scott ingon man usab sa mga pakigpulong sa mga pahina 6, 81, 83, ug 102.