Elder Randy D. Funk
Sa Seventy
Si Elder Randy Dennis Funk sa Ikaduhang Korum sa Seventy nagkinabuhi uban niining nag-una nga baruganan: “Salig sa Ginoo ug sa Iyang kamaayo.”
Atol sa ikatulo niyang tuig sa eskwelahan sa abogasiya, mabdos ang iyang asawa sa ikaduha nilang anak ug siya usa ka associate editor of law review dihang ang tawag miabut nga moserbisyo siya isip presidente sa elders quorum. “Niining mahagiton nga panahon akong gidawat ang tawag ug nag-ampo ko sa Langitnong Amahan sa paglig-on kanako sa akong pagserbisyo,” miingon siya. “Akong gikinahanglan ang tabang sa paghimo sa akong calling, molampus sa akong edukasyon, makatrabaho, ug makaatiman sa akong bag-ong pamilya. Ang mga panalangin nga among nadawat mas labaw pa kay sa unsay angay kanamo. Kadto nga kasinatian nakahatag kanako og mas dakong pagtuo sa kamaayo sa Ginoo ug sa Iyang mga panalangin ngadto sa maningkamot sa pagserbisyo Kaniya.”
Natawo niadtong Agosto 1952 kang C. Dennis ug Rebecca Funk, nagdako siya sa Manti, Utah; Madison, Wisconsin; ug sa Smithfield, Utah, USA. Nakita niya ang iyang papa nga matinud-anong miserbisyo sa Simbahan ug natudloan sa kaimportante sa pagtuman sa mga katungdanan sa priesthood.
Human makaserbisyo og misyon sa Indonesia, nagminyo siya ni Andrea Clyde pagka Mayo 29, 1976, sa Templo sa Logan Utah. Ginikanan sila sa unom ka anak. Si Elder Funk nakaangkon og degree sa history sa Utah State University ug usa ka juris doctorate sa University of Utah. Partner siya sa dakong kompanya sa pamalaod sa Denver, Colorado, sa wala pa siya matawag sa full-time niya nga pagserbisyo sa Simbahan, nga nagsugod sa iyang tawag isip presidente sa India Bangalore Mission niadtong 2010.
“Dihang nangadto mi sa India, duna kami hugot nga pagtuo sa mga pulong sa Manluluwas: ‘Ug usab, Ako moingon nganha kanimo, nga bisan kinsa ang imong ipadala diha sa akong ngalan, pinaagi sa tingog sa imong mga kaigsoonan, ang Napulog Duha, sa tarung girekomendar ug gihatagan og pagtugot pinaagi kanimo, makabaton og gahum sa pag-abli sa pultahan sa akong gingharian ngadto sa bisan diin nga nasud ikaw mopadala kanila’ (D&P 112:21).” Si Elder Funk nakaserbisyo isip presidente sa elders quorum, presidente sa Young Men, bishop, presidente sa stake, ug isip Area Seventy.